EKSODOS 21 - Khasi CL Bible (BSI)

Ka Hukum shaphang ki mraw

¹ “Ai ha ki Israel ïa kine ki hukum harum:

² Lada phi thied ïa u mraw Hebru, u dei ban shakri ïa phi hynriew snem. Ha ka snem kaba hynñiew, u dei ban ïoh laitluid khlem da hap siew ei ei.

³ Lada u dang marwei mynba u wan long u mraw jong phi, um dei ban ïalam ïa ka tnga jong u haba u mihnoh; hynrei lada u la shongkurim mynba u wan long u mraw jong phi, u lah ban ïalam ïa la ka tnga lem bad u.

⁴ Lada u kynrad jong u, u pynïoh ïa u ka tnga, bad ka ïoh khun shynrang ne kynthei na u, kata ka briew bad ki khun jong ka kin long ki jong u kynrad jong ka, bad uta u briew un mihnoh tang marwei.

⁵ Hynrei lada u mraw u pynbna ba u ieit ïa la u kynrad, ïa la ka tnga, bad ïa la ki khun, bad um kwah ban ïoh laitluid,

⁶ te u kynrad jong u un ïalam ïa u sha ka jaka mane Blei. Hangta un pynïeng ïa u ha ka jingkhang ne ha ka shawkad bad un sam shkor ïa u. Te un sa long u mraw jong u shi rta.

⁷ “Lada u briew u die mraw ïa la ka khun, kam lah ban ïoh laitluid kumba ki mraw shynrang ki ïoh.

⁸ Lada la die ïa ka ha uno uno uba mut ban pynlong ïa ka, ka tnga jong u, hynrei um sngewbha ïa ka, te u dei ban die pat ïa ka ha u kpa jong ka; u kynrad jong ka um lah ban die ïa ka ha ki nongwei, namar u la leh bymdei ïa ka.

⁹ Lada u briew u thied mraw ïa ka kynthei ban ai ïa ka ha la u khun, u dei ban ñiew ïa ka kum la ka khun.

¹⁰ Lada u briew u shim tnga sa kawei, u dei ban ai ïa ka tnga banyngkong jong u katjuh ka bam bad ka jaiñkup jaiñsem, bad ïa kijuh ki hok, kumba ka ju ïoh.

¹¹ Lada um pyndep ïa kine ki kamram ha ka, u dei ban pyllaitluid noh ïa ka khlem da siew ei ei.

Ki Aiñ shaphang ki kam leh jubor

¹² “Uta uba shoh ïa la u parabriew kat haduh ba un da ïap u dei ban shah pynïap.

¹³ Hynrei lada ka long tang kaba shu jia ryngkhat, bad um shym da mut shisha ban pynïap ïa u, u lah ban phet sha ka jaka kaba ngan jied na ka bynta jong phi, bad hangta un shngain.

¹⁴ Hynrei haba u briew da kaba bitar u pynïap khnang ïa uwei pat, dei ban pynïap ïa u, wat la u wan ban rieh ha ka duwan jong nga.

¹⁵ “Uta uba shoh ïa la u kpa ne ïa la ka kmie u dei ban shah pynïap.

¹⁶ “Uta uba rong tuh ïa u briew da kaba mut ban die mraw ne ban ri mraw ïa u, u dei ban shah pynïap.

¹⁷ “Uta uba tim ïa la u kpa ne ïa la ka kmie u dei ban shah pynïap.

¹⁸ “Haba ki briew ki ïakajia, bad uwei u shoh da u maw ne u kura da ka kti ïa uwei pat khlem da pynïap ïa u, yn ym pynshitom ïa u,

¹⁹ lada uta uba shah shoh u hap thiah pang, hynrei hadien u lah ban khie pat bad ban ïaid shabar da kaba kyrshan ha u diengduh, uta uba shoh ïa u, u dei ban buria ïa ka por kaba u la duh bad ban sumar na ka bynta jong u haduh ba un da jem bha.

²⁰ “Lada u briew u shoh da u dieng ïa la u mraw, la u shynrang ne ka kynthei, bad uta u mraw u ïap ha shen, uta u kynrad u dei ban shah pynshitom.

²¹ Hynrei lada uta u mraw u im shi sngi lane ar sngi, uta u briew um dei ban shah pynshitom. Ka jingduh jong u ïa la u mraw uba long ka spah jong u ka la long hi ka jingpynshitom.

²² “Lada ki rangbah kiba ïashoh ki pynmynsaw ïa ka kynthei kaba punkhun, bad kata ka briew ka hap khun, hynrei kam shym mong shym mynsaw da kumwei pat, uta uba pynmynsaw ïa ka un shah shaiñ kuna kat kumba u tnga jong kata ka briew u dawa, bad u dei ban siew kumba la buh dor ki nongbishar.

²³ Hynrei lada kata ka kynthei ka mynsaw, ka jingpynshitom ka dei ban long ka jingim namar ka jingim,

²⁴ ka khmat namar ka khmat, ka bniat namar ka bniat, ka kti namar ka kti, ka kjat namar ka kjat,

²⁵ kaba ing namar kaba ing, ka jingmong namar ka jingmong, ka jingjngem snam namar ka jingjngem snam.

²⁶ “Lada u briew u shoh na ka pyllew khmat ïa la u mraw, shynrang ne kynthei, bad kata ka khmat ka sep-ei noh, u dei ban pyllaitluid ïa uta u mraw kum ka jingsiew namar kata ka khmat.

²⁷ Lada u lop ïa ka bniat jong u mraw, shynrang ne kynthei, u dei ban pyllaitluid ïa uta u mraw kum ka jingsiew namar kata ka bniat.

Ki Aiñ shaphang ka jingkitkhlieh jong ki trai jingri

²⁸ “Lada u masi kyrtong u tynrah ïano ïano, shynrang ne kynthei, haduh ba un da ïap, dei ban lynthem maw ïa u, bad ïa ka doh jong u ym bit ban bam; hynrei u trai jong uta u masi un ym shah pynshitom.

²⁹ Hynrei lada uta u masi kyrtong mynshuwa ruh u dei uba la tynrah briew teng, bad u trai jong u um shym set ïa u wat haba la maham ïa u — te, lada u tynrah ïano ïano, shynrang ne kynthei haduh ban da ïap, dei ban lynthem maw ïa u, bad u trai jong u ruh u dei ban shah pynïap.

³⁰ La katta ruh, lada shah ïa uta u trai ban siew da ka kuna, ban pyllait im ïa u, u dei ban siew dep ïa ka dor kaba dei ban siew.

³¹ Dei ban bud ïa kane kajuh ka aiñ lada uta u masi kyrtong u pynïap ïa u khynnah shynrang ne ïa ka khynnah kynthei.

³² Lada uta u masi kyrtong u pynïap ïa u mraw, shynrang ne kynthei, uta u trai masi u dei ban siew ïa u kynrad jong uta u mraw laiphew ki sbai rupa, bad ïa uta u masi dei ban lynthem maw.

³³ “Lada u briew u weng ïa ka jingtap na ka thliew, ne lada u tih thliew bad um tap ïa ka, bad u masi ne u kada u hap hangta,

³⁴ u trai jong kata ka thliew u dei ban buria da ka pisa ïa u trai jong uta u jingri, bad un ïoh ïa ka metïap jong u.

³⁵ Lada u masi kyrtong jong uwei u briew u pynïap ïa u masi kyrtong jong uwei pat, kita ki trai kin die ïa u masi kyrtong uba dang im bad kin ïasam ïa ka pisa; kin ïasam ruh ïa ka doh jong uta u mrad uba shah pynïap.

³⁶ Hynrei lada la tip ba uta u masi kyrtong mynshuwa ruh u dei uba la tynrah teng, bad u trai jong u um shym set ïa u, u dei ban buria da kaba ai ïa uta uwei pat da u masi kyrtong uba im, bad un ïoh ma u ïa uta uba ïap.