EKSODOS 20 - Khasi CL Bible (BSI)

Ki Shiphew Hukum

¹ U Blei u la kren, bad kine ki dei ki ktien jong u:

² “Nga long U Trai U Blei jong phi uba la wan ïalam ïa phi na ka ri Ijipt, ka ri ha kaba phi la long ki mraw.

³ “Wat mane ïa uwei pat u blei hynrei tang ïa nga.

⁴ “Wat thaw durblei na ka bynta ïa lade, ïa kaei kaei kaba don ha bneng shajrong, ne ha ka khyndew sha tbian, ne ha ka um hapoh ka khyndew.

⁵ Wat dem lane mane ïa kano kano ka bleithaw, naba nga, nga long U Trai U Blei jong phi bad ngam lah shah ïano ïano ba pyrshah ïa nga. Nga wallam ka jingpynshitom ha kito kiba isih ïa nga bad ha ki khun ki ksiew jong ki haduh kaba lai bad kaba saw pateng bynriew.

⁶ Hynrei nga pyn-i ïa ka jingieit jong nga ha ki hajar ki pateng bynriew jong kito kiba ieit ïa nga bad kiba kohnguh ïa ki hukum jong nga.

⁷ “Wat pyndonkam ïa ka kyrteng jong nga na ka bynta ki jingthmu kiba sniew, naba nga, U Trai U Blei jong phi, ngan pynshitom ïa uno uno uba pyndonkam thala ïa ka kyrteng jong nga.

⁸ “Kynmaw ban rakhe ïa ka Sabbaton bad sumar kyntang ïa ka.

⁹ Phi don hynriew sngi ban trei bad ban leh ïa ki kam jong phi,

¹⁰ hynrei ka sngi kaba hynñiew ka dei ka sngi shongthait ba la pynkyntang sha nga. Ha kata ka sngi phim bit ban leh ïa kano kano ka kam — ma phi, ne ki khun jong phi, ne ki mraw jong phi, ne ki jingri jong phi, ne ki nongwei kiba shong basah ha ka ri jong phi.

¹¹ Ha ki hynriew sngi, ma nga, U Trai, nga la thaw ïa ka bneng, ïa ka khyndew, ïa ka duriaw, bad ïa kiei kiei baroh kiba don ha ki, hynrei ha ka sngi kaba hynñiew nga la shongthait. Namar kata, nga U Trai, nga la kyrkhu ïa ka Sabbaton, bad nga la pynkyntang khuid ïa ka.

¹² “Burom ïa la u kpa bad ïa la ka kmie, ba phi lah ban im slem ha ka ri kaba nga ai ha phi.

¹³ “Wat pynïap briew.

¹⁴ “Wat klim.

¹⁵ “Wat tuh.

¹⁶ “Wat sakhi lamler ïano ïano.

¹⁷ “Wat kwah rhah ïa ka ïing u paramarjan jong phi; wat ikwah ïa ka tnga jong u, lane ïa ki mraw jong u, lane ïa ki masi jong u, lane ïa ki kada jong u, lane ïa kaei kaei ruh kaba dei ka jong u.”

Ka jingsheptieng jong ki paidbah

¹⁸ Haba ki paidbah ki la ïohsngew ïa ka jingtied u pyrthat bad ïa ka jingsawa ka turoi, bad ïohi ïa ka leilieh bad ïa uta u lum uba mih tdem, ki la kyiuh da ka jingsheptieng bad ki la ïeng noh sha jngai.

¹⁹ Ki ong ha u Moses, “Lada phi kren ha ngi, ngin shahshkor; hynrei ngi sheptieng ba lada U Blei u kren ha ngi, ngin ïap.”

²⁰ U Moses u jubab, “Wat sheptieng, U Blei u la wan tang ban tynjuh ïa phi bad pynlong ïa phi ban ïai kohnguh ïa u, khnang ba phin ym leh pop.”

²¹ Hynrei ki paidbah ki dang ïeng hi sha jngai, bad tang u Moses uba la leit sha jan u lyoh uba rben ha uba U Blei u don.

Ki Aiñ shaphang ki duwan

²² U Trai u la hukum ïa u Moses ban ong ha ki Israel: “Phi la ïohi kumno ma nga, U Trai, nga la kren ha phi na bneng.

²³ Wat thaw na ka bynta ïa lade ki blei kiba da ka rupa ne da ka ksiar ban mane ïa ki nalor jong nga.

²⁴ Tei ïa nga kawei ka duwan da ka khyndew, bad kñia ïa ki langbrot bad ki masi jong phi halor jong ka kum ki jingainguh thang bad ki jingainguh ïasyllok. Ha man la ka jaka ba nga pynkyrpang ba phin mane ïa nga, ngan wan bad kyrkhu ïa phi.

²⁵ Lada phi tei ïa nga ka duwan kaba da u maw, wat tei ïa ka da ki maw ba la shniah, namar lada phi pyndei nar ha kita ki maw, kim long kiba bit ba ngan pyndonkam.

²⁶ Wat shna ïa ka duwan kaba don ki kyrdon kiba kiew sha ka; lada phi leh kumta, phi pynpaw khlem akor ïa lade haba phi kiew ïa ki.