EKSODOS 2 - Khasi CL Bible (BSI)

Ka jingkha ïa u Moses

¹ Ha kata ka por, uwei u briew na ka jait Lebi u shongkurim ïa ka khun jong uwei u Lebi bad ka la kha khun shynrang ïa u.

² Haba ka ïohi ba u long u khunlung uba bhabriew, ka buhrieh ïa u lai bnai.

³ Hynrei haba kam lah shuh ban buhrieh ïa u, ka shim kawei ka shang ba la shna na u khah bad ka lape ïa ka da ka bsiang ban ym pei um. Ka pynthiah ïa uta u khunlung hapoh kata ka shang bad ka buh ïa ka hapdeng ki khah harud jong ka wah.

⁴ Ka hynmen jong uta u khunlung ka ap khmih kham na pajih ban ïohi kan jia aïu ïa u.

⁵ Ka khun u Pharaoh ka la wan hiar sha ka wah ban sum, katba ki shakri kynthei jong ka pat ki nang ïa-ïaid kai harud wah. Kynsan ka la ïohi ïa kata ka shang hapdeng ki khah, bad ka phah ïa ka mraw ban leit shim ïa ka.

⁶ Haba ka plied ïa ka, ka ïohi ïa u khunlung. Uta u khunlung u ïam, bad ka sngewsynei ïa u. “Une te u dei uwei na ki khun Hebru,” ka la ong.

⁷ Nangta ka hynmen jong u ka ong ha ka khun u Pharaoh, “Hato ngan leit khot ïa kawei ka kynthei Hebru ba kan ri bad sumar ïa une u khunlung na ka bynta jong phi?”

⁸ Ka khun u Pharaoh ka ong ha ka, “Khie leit.” Kumta kata ka khynnah ka leit bad ka wan ïalam da ka kmie jong uta u khunlung hi.

⁹ Ka khun u Pharaoh ka ong ha ka, “Shim ïa une u khunlung bad ri ïa u na ka bynta jong nga, bad ngan da siew ïa pha.” Kumta kata ka kynthei ka shim ïa uta u khunlung, bad ka ri ka sumar ïa u.

¹⁰ Ynda uta u khunlung u la san, ka leit ïalam ïa u sha ka khun u Pharaoh; ka ruh ka ri ïa u kum la u khun, bad ka khot kyrteng ïa u, u Moses, “Namar,” ka ong, “nga la sei ïa u na ka um.”

U Moses u phet sha Midian

¹¹ Ha kawei ka sngi, haba u la rangbah, u Moses u leit jngoh ïa la ki para jait, ki Hebru, bad u ïohi kumno la pynbor ïa ki ban trei ïa ki kam kiba shitom sat. U ïohi ruh ïa uwei u nong Ijipt ba u pynïap ïa uwei u Hebru, u para jait jong u Moses hi.

¹² U Moses u peit shane shatai, bad haba u ïohi ba ym don mano mano ba peit sha u, u pynïap ïa u, bad u tep ïa u hapoh u shyiap.

¹³ Haba u leit sa ha kawei pat ka sngi, u ïohi ar ngut ki Hebru kiba ïashoh. U ong ha uta uba leh bymdei, “Balei me da shoh ïa la u para Hebru?”

¹⁴ Uta u briew u jubab, “Mano ba thung ïa phi kum u syiem bad nongbishar jong ngi? Hato phi mut ban pynïap ïa nga kumba phi la pynïap ïa uto u nong Ijipt?” Kumta u Moses u la sheptieng, bad u pyrkhat, “Pleng, ki briew ki la tip ïa kaei ba nga la leh.”

¹⁵ Haba u Pharaoh u ïohsngew ïa kata, u pyrshang ban phah pynïap ïa u Moses; hynrei u Moses u la phet ïap, bad u leit shong noh ha ri Midian.

¹⁶ Ha kawei ka sngi, katba u Moses u dang shongthait harud kawei ka pukri, hynñiew ngut ki khun kynthei jong u Jethro, u lyngdoh ka Midian, ki ïawan tong um ban pyndap ïa ki shyngoid ba kin ïoh ai um ïa ki langbrot bad ki blang jong u kpa jong ki.

¹⁷ Hynrei don ki nongap langbrot kiba wan beh noh ïa ki. Te u Moses u leit ban ïada ïa ki bad u ïarap ai um ruh ïa ki jingri jong ki.

¹⁸ Ynda ki leit phai sha la u kpa, u kylli ïa ki, “Kumno phi ïawan kloi mynta ka sngi?”

¹⁹ “Uwei u nong Ijipt u pyllait ïa ngi na ki nongap langbrot,” ki jubab; “u pyntong um lem ïa ngi, bad u ïarap ai um de ïa ki jingri jong ngi.”

²⁰ “Ha-ei u don?” u kylli ïa la ki khun. “Balei phi shu ieh ïa uta u briew? Khie leit khot ïa u ban ïabam bad ngi.”

²¹ Kumta u Moses u la mynjur ban shong ban sah noh hangta, bad u Jethro ruh u pynshongkurim ïa u bad ka Sipporah ka khun jong u kaba la kha khun shynrang ïa u Moses.

²² U Moses u ong ha lade, “nga long u sohshnong ha kane ka ri, bad kumta nga kyrteng ïa u, u Gershom.”

²³ Bun snem hadien kane, u syiem Ijipt u ïap noh, hynrei ki Israel ki dang ïai ud namar kata ka jinglongmraw jong ki bad ki pyrta ban ïoh jingïarap.

²⁴ Kata ka jingud jong ki ka kiew sha U Blei, uba la ïohsngew ïa ka jingud jong ki bad kynmaw ïa la ka jutang bad u Abraham, u Isaak bad u Jakob.

²⁵ U ïohi ïa ka jinglongmraw jong ki Israel, bad u la sngewkhia na ka bynta jong ki.