EKSODOS 19 - Khasi CL Bible (BSI)

Ki Israel ha u Lum Sinai

^1-2 Ki paid Israel ki mihnoh na Rephidim, bad ha ka sngi kaba nyngkong jong u bnai uba lai naduh ba ki mih na Ijipt ki wan poi ha ka ri shyiap Sinai. Ki sher dara hangta ha kjat u Lum Sinai,

³ bad u Moses u la leit kiew sha u lum ban ïashem bad U Blei. U Trai u la khot ïa u na u lum bad u la bthah ïa u ban ong ha ki Israel, ki khun ki ksiew u Jakob:

⁴ “Phi la ïohi aïu ma nga, U Trai nga la leh ïa ki nong Ijipt bad kumno ba nga la kit ïa phi kum ka pukni kaba kit ïa la ki khun ha ki thapniang jong ka, bad nga la wan ïalam ïa phi sha nga ha kane ka jaka.

⁵ Te mynta, lada phin kohnguh ïa nga bad sumar ïa ka jutang jong nga, phin long ki briew jong nga. Ka pyrthei baroh kawei ka long ka jong nga, bad phi pat phin long ki briew kiba nga la jied,

⁶ ka jaitbynriew ba la pynkyntang sha nga, bad phin shakri ïa nga kum ki lyngdoh.”

⁷ Kumta u Moses u wan hiar bad u la khot lang ïa ki nongïalam jong ki Israel, bad ïathuh ha ki ïa kaei kaei baroh kaba U Trai u la hukum ïa u.

⁸ Nangta u paidbah baroh u la jubab lang, “Ngin leh ïa kaei kaei baroh kaba U Trai u la kren,” bad u Moses u la leit ïathuh ïa kane ha U Trai.

⁹ U Trai u ong ha u Moses, “Ngan wan ha me ha u lyoh uba rben, khnang ba u paidbah un ïohsngew ïa nga ba nga ïakren bad me, bad un sa ngeit ïa me naduh mynta.” U Moses u la ïathuh ha U Trai ïa ka jubab jong uta u paidbah,

¹⁰ bad U Trai u ong ha u Moses, “Khie leit sha ki paidbah bad ong ïa ki ba kin pynkhuid ïa lade mynta ka sngi bad la shai ruh khnang ba ki lah ban mane.

¹¹ Ki dei ban sait ïa la ki jaiñkup bad ban long kiba la khreh la shi sngi. Ha kata ka sngi ngan wan hiar ha u Lum Sinai; ha kaba ki briew baroh kin ïohi ïa nga.

¹² Buh dak sawdong uta u lum khnang ba ki briew kim dei ban jam palat, bad ong ïa ki ba kin ym leit kiew sha u lum, lane wat ban leit tur sha jan jong u. Lada uno uno u leit ïuhkjat ha u lum, yn pynïap ïa u;

¹³ dei ban shu lynthem ïa u da u maw, ne ban siat ïap ïa u da ki khnam, khlem da ktah kti mano mano ïa u. Kane ka treikam ïa ki briew bad ki mrad; dei ban pynïap ïa ki. Hynrei haba la put ïa ka turoi, te ki briew kin sa leit kiew sha u lum.”

¹⁴ Nangta u Moses u la wan hiar na u lum bad u ong ïa ki paidbah ba kin pynkhreh ïa lade na ka bynta ka jingmane.

¹⁵ Kumta ki sait ïa la ki jaiñkup, bad u Moses u ong ha ki, “La shi sngi, phi dei ban long kiba la pynkhreh bad ha kajuh ka por phim dei ban ïathiah shongkha.”

¹⁶ Ha ka step jong ka sngi kaba lai, la don u pyrthat bad ka leilieh, u lyoh uba rben u la paw halor u lum, bad la ïohsngew ïa ka turoi kaba sawa jam. Baroh ki briew kiba don ha ka jaka sher dara ki la kyiuh da ka jingsheptieng.

¹⁷ U Moses u ïalam ïa ki shabar ka jaka sher dara ban ïashem bad U Blei, bad ki la ïeng ha kjat jong u lum.

¹⁸ Ïa u Lum Sinai baroh uwei la tap da ka tdem, namar U Trai u la wan hiar ha u ha ka ding. Ka tdem ka kiew kum kaba mih na ka lawar ding, bad ki briew baroh ki la kyiuh shibun eh.

¹⁹ Ka jingsawa ka turoi ruh ka nang jam nang jam. U Moses u la kren, bad U Blei u jubab ïa u ha ka sur u pyrthat.

²⁰ U Trai u wan hiar halor u Lum Sinai, bad u la khot ïa u Moses sha kliar jong u lum.

²¹ U Moses u leit, bad U Trai u ong ha u, “Khie leit hiar bad maham ïa ki briew ban ym jam ïa u pud ban wan khmih ïa nga; lada ki leh kumta, bun na ki kin ïap.

²² Wat ki lyngdoh kiba wan sha jan jong nga ki dei ban pynkhuid ïa lade, lym kumta ngan pynshitom ïa ki.”

²³ U Moses u ong ha U Trai, “Ki briew kim lah ban wan kiew shajrong, naba me la hukum ïa ngi ban kheiñ kyntang ïa u lum bad ban buh dak sawdong jong u.”

²⁴ Te U Trai u ong ha u Moses, “Khie leit hiar, bad wan ïalam pat bad me ïa u Aaron. Hynrei ki lyngdoh bad ki briew kim bit ban jam ïa u pud ban wan sha nga, ïoh nga pynshitom ïa ki.”

²⁵ U Moses u la leit hiar sha ki briew bad u la ïathuh ha ki ïa kaei kaba U Trai u la lah ong.