EKSODOS 18 - Khasi CL Bible (BSI)

U Jethro u wan jngoh ïa u Moses

¹ U Jethro, u lyngdoh ka Midian, u kthaw kurim u Moses, u ïohsngew ïa kaei kaei baroh kaba U Blei u la leh na ka bynta u Moses bad ki paid Israel mynba u la ïalam noh ïa ki na ka ri Ijipt.

² Kumta u la wan ha u Moses, u da ïalam ruh ïa ka Sipporah, ka tnga jong u Moses, kaba u khlem ïalam lang,

³ bad ïa u Gershom bad u Elieser ki ar ngut ki khun shynrang jong ka. (U Moses u la ong, “Nga long u sohshnong ha ka ri nongwei”; kumta u la jer kyrteng ïa uwei na ki “u Gershom”.

⁴ U la ong ruh, “U Blei jong u kpa jong nga u la ïarap ïa nga bad u la pyllait ïa nga na kaba shah pynïap ha u Pharaoh”; kumta u khot kyrteng ïa uwei pat u khun “u Elieser”.)

⁵ U Jethro u la wan bad ka tnga jong u Moses lem bad ki ar ngut ki khun shynrang jong ka sha ka ri shyiap ha kaba u Moses u la sher dara ha u lum bakhuid.

⁶ U la phah ktien sha u Moses ba ki la ïawan,

⁷ kumta u Moses u mih ban leit ïakynduh ïa u, u dem ha khmat jong u, bad u doh ïa u. Ki ïakylli para ma ki kumno ki ïalong, bad nangta ki la leit sha ka ïingjaiñ jong u Moses.

⁸ U Moses u la ïathuh ha u Jethro ïa kaei kaei baroh kaba U Trai u la leh ïa u Pharaoh bad ïa ki nong Ijipt khnang ba un ïoh pyllait im ïa ki Israel. U la ïathuh ruh ha u ïa ki jingeh ba ki Israel ki la ïakynduh ha lynti bad kumno U Trai u la pyllait im ïa ki.

⁹ Haba u Jethro u la ïohsngew ïa kane baroh, u la kmen bad u la ong,

¹⁰ “Ïaroh ïa U Trai uba la pyllait im ïa phi na u Pharaoh bad na ki nong Ijipt! Ïaroh ïa U Trai uba la pyllait im ïa une u paidbah na ka jinglongmraw!

¹¹ Mynta nga tip ba U Trai u kham khraw ban ïa ki blei baroh, namar u la leh ïa kane mynba ki nong Ijipt ki la lehbeiñ shaba palat ïa ki Israel.”

¹² Nangta u Jethro u la wanrah ïa ka jingainguh ban thang tylli bad ïa kiwei kiwei de ki jingainguh ban ai jingkñia sha U Blei; bad u Aaron lem bad nongïalam jong ki Israel baroh ki la ïaleit bad u ban bam ïa ka jingbam kaba kyntang kum ka dak ka jingmane ïa U Blei.

Kaba thung ïa ki nongbishar

¹³ Ha ka sngi kaba bud, u Moses u dang pynbeit ïa ki jingïakajia hapdeng u paidbah, bad kumta u la bunkam naduh mynstep haduh ban da miet.

¹⁴ Haba u Jethro u la ïohi ïa kaei kaei baroh kaba u Moses u dei ban leh, u la kylli, “Kaei keiñ kane kaba phi leh na ka bynta u paidbah? Balei phi shu leh hi marwei ïa kane baroh katba ki briew ki shu ïa-ïeng hangne naduh dang step haduh ban da miet ban ïasyllok bad me.”

¹⁵ U Moses u jubab, “Nga dei ban leh ïa kane namar ki briew ki ïawan sha nga ban tip ïa ka mon U Blei.

¹⁶ Haba don kano kano ka jingïakajia hapdeng ar ngut, ki wan sha nga, nga hap ban bishar bad rai mano na ki uba dei, bad nga ïathuh ha ki ïa ki hukum bad ki aiñ U Blei ki ong.”

¹⁷ Nangta u Jethro u ong, “Phim shym leh satia ïa kane ha ka rukom kaba dei.

¹⁸ Phin shu ïa-pynthait ïa lade bad ruh ïa kine ki briew. Kane ka khia than eh ba phin leh tang marwei hi.

¹⁹ Mynta shah ngan ai buit lem ïa phi, bad U Blei un don lem bad phi. Ka long kaba dei ba phin mihkhmat ïa kine ki briew ha khmat U Blei, bad ban leit rah ïa ki jingïakajia jong ki sha u.

²⁰ Phi dei ban hikai ïa ki shaphang ki hukum jong U Blei bad batai ïa ki kumno ki dei ban im bad aïu ki dei ban leh.

²¹ Hynrei nalor kata, phi dei ban jied katto katne ngut ki rangbah kiba tbit, bad thung ïa ki kum ki nongïalam jong u paidbah: ki nongïalam ïa ki hajar, ïa ki spah, ïa ki sanphew, bad ïa ki phew. Ki dei ban long ki briew kiba sheptieng ïa U Blei, kiba lah ban shaniah, bad kiba ym lah ban pynbam sap.

²² Ai kin shakri kum ki nongbishar ha ki por baroh. Ki lah ban wallam sha phi ïa baroh ki kam kiba eh; hynrei ki hi ki lah ban rai ïa ki jingïakajia kiba rit. Kata kan pynsuk shibun ïa phi, namar kin ïakit lang ïa ka jingkit jong phi.

²³ Lada phi leh ïa kane, kumba U Blei u hukum, phin ym pynthait ïa lade, bad kine ki briew baroh ki lah ban leit sha ïing hadien ba la bishar ïa ki jingïakajia jong ki.”

²⁴ U Moses u pdiang ïa ka jingai jingmut jong u Jethro

²⁵ bad u la jied ïa ki rangbah kiba tbit napdeng ki Israel baroh. U la thung ïa ki kum ki nongïalam ïa ki hajar, ki spah, ki sanphew, bad ki phew.

²⁶ Ki la shakri kum ki nongbishar na ka bynta u paidbah ha ki por baroh, da kaba wallam ïa ki kam kiba eh sha u Moses hynrei ki bishar hi ïa ki jingïakajia kiba rit.

²⁷ Nangta u Moses u khublei ïakhlad bad u Jethro, bad u Jethro u leit phai pat sha la ïing.