EKSODOS 15 - Khasi CL Bible (BSI)

Ka jingrwai u Moses

¹ Nangta u Moses bad ki Israel ki rwai ïa kane ka jingrwai ha U Trai: “Ngan rwai ha U Trai namar ka jingjop kaba khraw jong u; sha duriaw u la bret ïa ki kulai bad ki nongshong kulai.

² U Trai u long u nongïada uba khlaiñ jong nga; u long ma u, uba la pyllait im ïa nga. U dei U Blei jong nga, bad ngan ïaroh ïa u, U Blei jong u kpa jong nga, bad ngan rwai shaphang ka jingkhraw jong u.

³ U Trai u long u khla-ka-wait; Ka kyrteng jong u ka long U Trai.

⁴ “U bret ïa ka kynhun shipai jong ka Ijipt bad ïa ki kali ïapom jong ka sha ka duriaw; ki rangbah pynïaidkam bakynsai jong ka ki la ïap jyllop ha ka Duriaw Basaw

⁵ Ka duriaw kaba jylliew ka la tap ïa ki; ki la ngam sha trai duriaw kum u maw.

⁶ “Ka kti kamon jong me, A Trai, ka long kaba khraw eh ha ka bor; ka pynlwet thiaw ïa u nongshun.

⁷ Da ka jingjop bakhraw me pynliem ïa ki nongshun jong me; ka jingbitar jong me ka meh bad ka bam duh ïa ki kum ïa u phlangïap.

⁸ Me la pyrsad ïa ka duriaw bad ka um ka kynton shajrong eh; ka ïeng beit thik kum ka kynroh; ka bynta bajylliew tam jong ka duriaw ka kylla eh.

⁹ U nongshun u ong, ‘Ngan beh kthong bad kem ïa ki, ngan ïabynta ïa ka spah jong ki, bad ngan shim kat ïa kaba nga mon; ngan sei ïa la ka waitlam, bad ngan shim ïa baroh kaba ki don.’

¹⁰ Pynban tang shisien pyrsad na me, ko Trai, ka la pynïap jyllop ïa ki nong Ijipt; ki ngam kum ka sisa ha ka umbah bashyrkhei.

¹¹ “Ko Trai, uei uba kat ma me hapdeng ki blei? Uei keiñ uba kum ma me, uba phylla ha ka jinglongkhuid? Uei uba lah ban leh ki kambah bad ki kamphylla kum ma me?

¹² Me kner ïa la ka kti kamon, bad ka khyndew ka nguid ïa ki nongshun jong ngi.

¹³ Me bat ïa la ka kular, me la ïalam noh ïa ki briew kiba me la pyllait im; da ka bor jong me, me la btin ïa ki sha ka ri kaba kyntang jong me.

¹⁴ Ki jaitbynriew ki la ïohsngew, bad ki la kyiuh da ka jingsheptieng; ïa ki Philistia la kynrup da ka jingsngewtriem.

¹⁵ Ki nongïalam jong ka Edom ki la sngewshyrkhei; ki rangbah bakhlaiñbor jong ka Moab ki sngewkyiuh; ki briew ka Kanaan ki duh noh ïa ka jingshlur jong ki.

¹⁶ Ka jingshyrkhei bad ka jingkhuslai ki wan hap halor jong ki. Ki ïohi ïa ka bor jong me, ko Trai, ki ïeng khlem lait kren da ka jingtieng, tad haduh ba ki briew jong me ki la ïaid lait sha shiliang — ki briew kiba me la pyllaitluid na ka jinglongmraw.

¹⁷ Me wan ïalam ïa ki shapoh bad me buh ïa ki ha u lumbah jong me, ha ka jaka kaba me, ko Trai, me la jied na ka bynta ka ïing jong me, ka Templ kaba me hi me la tei.

¹⁸ Ma me, ko Trai, men long u syiem junom la junom.”

Ka jingrwai jong ka Miriam

¹⁹ Ki Israel ki la ïaid lyngba ïa ka duriaw ha ka khyndew kaba rkhiang. Hynrei haba ki kali ïapom jong ki nong Ijipt lem bad ki kulai bad nongñiah ki leit shapoh ka duriaw, U Trai u pynïadait pat ïa ka um bad ka la tyllep ïa ki.

²⁰ Te ka Miriam ka nongïathuhlypa, ka para jong u Aaron, ka la shim ïa la ka kanjari, bad ki kynthei baroh ruh ki la ïabud nadien jong ka, ki da tem ïa ki kanjari, bad ki da ïashad ruh.

²¹ Ka Miriam ka la rwai na ka bynta jong ki: “To rwai ha U Trai namar ba u la jop ka jingjop badonburom; u la bret ïa ki kulai bad ïa ki nongshong jong ki sha ka duriaw.”

Ki um bakthang

²² Nangta u Moses u ïalam noh ïa ki Israel na ka Duriaw Basaw sha ka ri shyiap Shur. Lai sngi lynter ki la ïaid lyngba ïa ka ri shyiap, hynrei kim shym lap um satia.

²³ Nangta ki la wan poi ha ka jaka ïa kaba la khot ka Marah, hynrei ka um hangta ka long kaba kthang haduh katta katta ba kim lah ban dih ïa ka. Dei na kata ka daw ba la khot kyrteng ïa ka, ka Marah.

²⁴ Kita ki paidbah ki la ïakhñium ïa u Moses, bad ki la kylli, “Ngin ïadih da-ei?”

²⁵ U Moses u kyrpad jur ïa U Trai, bad U Trai u pyn-i ha u ïa uwei u lyngkhot dieng, ïa uba u la bret hapoh ka um; bad ka um ka la kylla long kaba bit ban dih. Dei hangta ba U Trai u ai ha ki ïa ki aiñ ba kin bud, bad dei hangta ruh ba u la tynjuh ïa ki.

²⁶ U la ong, “Lada phi kohnguh ïa nga naduh ka dohnud da kaba leh ïa kata kaba nga ñiew ba ka long kaba dei, bad da kaba sumar ïa ki hukum jong nga, ngan ym pynshitom ïa phi da kano kano ka jingpang kaba nga la pynngat ha ki nong Ijipt. Nga long U Trai uba pynkhiah ïa phi.”

²⁷ Nangta ki la wan poi ha Elim, ha kaba la don khat-ar tylli ki umpohliew bad hynñiewphew tylli ki dieng Tlai; bad hangta ki la ïasher dara harud um.