EKSODOS 13 - Khasi CL Bible (BSI)

Kaba pynkyntang ïa uba la kha nyngkong

¹ U Trai u ong ha u Moses,

² “Pynkyntang ha nga ïa uba la kha nyngkong baroh, namar kat uba la kha nyngkong napdeng ki Israel, la u briew ne u mrad, u long u jong nga.”

Ka Jingkhawai Niam U Kpu Bakhlem Thiat

³ U Moses u kren ha u paidbah, “Kynmaw ïa kane ka sngi — ka sngi ha kaba phi mihnoh na ka ri Ijipt, ka ri ha kaba phi long ki mraw. Kane ka dei ka sngi ba U Trai u la ïalam noh ïa phi da ka borbah jong u. Wat bam ïa u kpu ba la khleh thiat.

⁴ Phi ïamihnoh na ka ri Ijipt ha kane ka sngi jong u bnai uba nyngkong, u bnai Abib.

⁵ U Trai u la kular skhem ha ki kpa tymmen jong phi ba un ai ha phi ïa ka ri jong ki Kanaan, ki Hit, ki Amor, ki Hib, bad ki Jebus. Ynda u la wallam ïa phi sha kata ka ri kaba tuid da ka dud bad ka ngap, phi dei ban rakhe ïa kane ka Jingkhawai Niam man ka snem ha u bnai uba nyngkong.

⁶ Hynñiew sngi lynter phin ïabam ïa u kpu bakhlem thiat, bad ha ka sngi kaba hynñiew phin pynlong ïa ka Jingkhawai Niam ban pyndonburom ïa U Trai.

⁷ Ha kita ki hynñiew sngi, phim dei ban bam ïa u kpu ba la khleh thiat; ym dei ban don u thiat ne u kpu ba la khleh thiat hangno hangno ha ka ri jong phi.

⁸ Ha kaba sdang jong ka Jingkhawai Niam, pynsngewthuh ha ki khun shynrang jong phi ba phi leh ïa kane baroh namar kaei kaba U Trai u la leh ha phi mynba phi mihnoh na ka ri Ijipt.

⁹ Kane ka jingrakhe kan long ka jingpynkynmaw, kum kaei kaei kaba la teh ha ka kti jong phi ne ha ka shyllangmat jong phi; kan pynkynmaw ïa phi ban ïai kren bad ïai puson ïa ka Aiñ U Trai, namar U Trai u la ïalam noh ïa phi na ka ri Ijipt da ka borbah jong u.

¹⁰ Rakhe ïa kane ka Jingkhawai Niam ha ka por ba la buh man ka snem.

U khun ba kha nyngkong

¹¹ “U Trai un wallam ïa phi sha ka ri ki Kanaan ïa kaba u la kular skhem ha phi bad ha ki kpa tymmen jong phi.

¹² Ynda u ai ïa ka ha phi, phi dei ban ai sha U Trai ïa u khun nyngkong baroh. Man uba la kha nyngkong na ki mrad u long u jong U Trai.

¹³ Ïa u khun kada ba la kha nyngkong baroh phin bujli da u khunlangbrot. Lada phim kwah ban bujli ïa uta u khun kada, phi dei ban pynkheiñ ïa ka ryndang jong u. Phi dei ruh ban pyllait ïa u khun nyngkong jong phi baroh.

¹⁴ Hadien habud, ynda u khun jong phi u kylli ïa phi ka mut aïu kane ka jingrakhe, phin jubab ïa u, ‘Da kaba pyndonkam ïa la ka borbah, U Trai u la ïalam noh ïa ngi na ka ri Ijipt, ka ri ha kaba ngi la long ki mraw.

¹⁵ Haba u Pharaoh u mutlop bad u kyntait ban shah ïa ngi ban leit, U Trai u la pynïap ïa uwei pa uwei u khun nyngkong ha Ijipt, uba na u briew bad na u mrad ruh. Dei namar kata ba ngi kñia ainguh ha U Trai ïa uwei pa uwei uba la kha nyngkong na ki mrad, hynrei ngi pyllait pat ïa la ki khun shynrang baroh kiba la kha nyngkong.

¹⁶ Kane ka jingrakhe ka long ka jingpynkynmaw, kum kaei kaei kaba la teh ha ka kti jong ngi ne ha ka shyllangmat jong ngi; kan pynkynmaw ïa ngi ba U Trai u la ïalam noh ïa ngi na ka ri Ijipt da ka borbah jong u.’ ”

U Rishot Lyoh bad u Rishot Ding

¹⁷ Mynba u Pharaoh u shah ïa uta u paidbah ban leit noh, U Blei um shym ïalam ïa ki na ka lynti kaba poi shatei sha ka phang Philistia, wat la ka long kaba jan tam. U Blei u ong, “Ngam kwah ba kine ki briew kin kylla dien bad kin leit phai pat sha Ijipt haba ki ïohi ba ki hap ban ïaleh thma.”

¹⁸ Kumta u ïalam ïa ki da ka lynti kyllaiñ lyngba ka ri shyiap kaba poi sha ka Duriaw Basaw. Ki Israel ki long kiba la kieng atiar ban ïaleh thma.

¹⁹ U Moses u la rah bad u ïa ka met u Joseph, kumba u Joseph u la pynsmai ïa ki Israel. U Joseph u la lah ong, “Haba U Blei u wan pyllait ïa phi, phi dei ban kit noh ïa ka met jong nga na kane ka jaka.”

²⁰ Ki Israel ki ïamihnoh na Sukkoth bad ki sher dara ha Etham, ha ka tduh jong ka ri shyiap.

²¹ Mynsngi, U Trai u ïaid ha shuwa jong ki ha u rishot lyoh ban kdew lynti ïa ki, bad mynmiet pat u ïaid ha shuwa jong ki ha u rishot ding ban ai jingshai ïa ki, khnang ba ki lah ban ïaid mynsngi bad mynmiet.

²² Uta u rishot lyoh u don borabor ha shuwa uta u paidbah ha ka por mynsngi, bad u rishot ding pat, mynmiet.