EKSODOS 12 - Khasi CL Bible (BSI)

Ka Niam Ka Jinglait

¹ U Trai u kren ha u Moses bad u Aaron ha Ijipt:

² “Une un long ha phi u bnai uba nyngkong jong ka snem.

³ Ai ïa kine ki jingbthah ha u paid Israel baroh: ha ka sngi kaba shiphew jong une u bnai, uwei pa uwei u rangbah un jied ïa u khunlangbrot lane ïa u khunblang na ka bynta la ka jong ka ïing.

⁴ Lada ka longïing jong u ka don tang khyndiat ngut ki dkhot bad kam lah bam lut ïa uta u jingri, uta u rangbah un ïasam lang ïa uta u jingri bad uba marjan ïing jong u kat kum ka jingdon briew, bad kat kumba uwei uwei u briew u lah ban bam.

⁵ Lah ban jied da ka langbrot ne da ka blang, tangba u dei ban long u shynrang uba shisnem bad u bym don kano kano ka jingduna.

⁶ Nangta, ha ka janmiet jong ka sngi kaba khatsaw jong une u bnai, ki paid Israel baroh kin ïa-pynïap ïa kita ki mrad.

⁷ Ki briew ki dei ban shim khyndiat na ka snam bad tah ïa ka ha ki shawkad bad ha khlieh jingkhang jong kita ki ïing ha kiba kin ïabam ïa kita ki mrad.

⁸ Ha kata ka miet, ïa ka doh dei ban syang, bad bam ïa ka lem bad u kpu khlem thiat bad ki jhur kthang.

⁹ Ym dei ban bam im ne phon ïa ka, hynrei bam ïa ka da kaba shu syang tylli kynthup ïa ka khlieh, ki kjat bad ki doh jem.

¹⁰ Phim dei ban pynsah ei ei haduh mynstep; lada don kaba sah, dei ban thang noh ïa ka.

¹¹ Phi dei ban ïabam kyrkieh ïa ka, namar phi dei ban riam na ka bynta ban leit jingleit, lem bad ki juti ha ki kjat jong phi bad u diengduh ha ka kti jong phi. Ka dei ka Jingkhawai Niam Ka Jinglait ban pyndonburom ïa nga, U Trai.

¹² “Ha kata ka miet ngan ïaid lyngba ïa ka ri Ijipt, da kaba pynïap ïa u khun nyngkong baroh, la u dei u briew ne u mrad, bad ngan pynshitom ïa ki blei ka ri Ijipt baroh. Nga long U Trai.

¹³ Ka snam ha ki shawkad kan long ka dak ban pyn-i ïa ki ïing ha kiba phi shong. Haba nga ïohi ïa kata ka snam, ngan ïaid lait na phi, bad ngan ym ktah ïa phi haba nga pynshitom ïa ki nong Ijipt.

¹⁴ Phi dei ban rakhe ïa kane ka sngi kum ka Jingkhawai Niam ban pynkynmaw ïa phi ïa kaei kaba nga, U Trai, nga la leh. Rakhe ïa ka pateng la pateng bynriew.”

Ka Jingkhawai Niam U Kpu Bakhlem Thiat

¹⁵ U Trai u la ong, “Hynñiew sngi lynter phin ym bam ïa u kpu ba la khleh thiat — bam tang ïa u kpu bakhlem thiat. Ha ka sngi kaba nyngkong phi dei ban bret noh ïa u thiat baroh na ïing jong phi, namar lada uno uno u bam ïa u kpu ba la khleh thiat ha kita ki hynñiew sngi, yn ym kheiñ shuh ïa u kum uwei na ki briew jong nga.

¹⁶ Ha ka sngi kaba nyngkong bad kumjuh ruh ha ka sngi kaba hynñiew, phi dei ban ïakynduh lang ban mane Blei. Phim bit ban trei ei ei ha kita ki sngi, hynrei phi lah ban pynkhreh jingbam.

¹⁷ Rakhe ïa kane ka Jingkhawai Niam, namar dei ha kane ka sngi ba nga la ïalam noh ïa ki jait jong phi na ka ri Ijipt. Pateng la pateng phi dei ban rakhe ïa kane ka sngi kum ka Jingkhawai Niam.

¹⁸ Naduh ka janmiet jong ka sngi kaba khatsaw jong u bnai uba nyngkong haduh ka janmiet jong ka sngi kaba arphew wei jong uta u bnai, phin ym ïabam ïa u kpu ba la khleh thiat.

^19-20 Hynñiew sngi lynter ym dei ban lap ïa u thiat ha ki ïing jong phi; namar lada uno uno u bam ïa u kpu uba la khleh thiat la u dei u nongwei ne u traishnong, yn ym kheiñ shuh ïa u kum uwei na ki briew jong nga.”

Ka jingrakhe banyngkong ïa Ka Jingkhawai Niam Ka Jinglait

²¹ U Moses u khot ïa ki nongïalam baroh jong ki Israel, bad u ong ha ki, “Phi baroh phin jied ïa la u khunlangbrot ne u khunblang bad pynïap ïa u, khnang ba ki ba-ha-ïing ha-sem jong phi kin ïoh ban rakhe ïa ka Niam Ka Jinglait.

²² Shim shi song u Hissop bad wieh ïa u ha ka pliang kaba don ïa ka snam jong uta u mrad, bad tah ïa kata ka snam ha ki shawkad bad ha u bim ha khlieh ka jingkhang ïing jong phi. Uwei ruh um bit ban mih shabar na ïing haduh mynstep.

²³ Haba U Trai u ïaid lyngba ïa ka ri Ijipt ban pynïap ïa ki nong Ijipt, un ïohi ïa ka snam ha u bim bad ha ki shawkad bad un ym shah ïa u Angel jong ka Jingïap ban rung shapoh ki ïing jong phi bad pynïap ïa phi.

²⁴ Ma phi bad ki khun ki kti jong phi, phin bud pyrkhing junom ïa kine ki jingbuhbeit ryntih.

²⁵ Haba phi rung sha ka ri ïa kaba U Trai u la kular ban ai ha phi, phi dei ban leh ïa kane ka jinglehniam.

²⁶ Haba ki khun jong phi ki kylli ïa phi, ‘Ka mut aïu kane ka jinglehniam?’

²⁷ Phin jubab, ‘Ka long ka jingkñia jong ka Niam Ka Jinglait ban pyndonburom ïa U Trai, naba u la ïaid lait ïa ki ïing jong ki Israel ha ka ri Ijipt. U la pynïap ïa ki nong Ijipt, hynrei u la pyllait im ïa ngi.’ ” Ki Israel ki la dem khohsiew bad ki la mane.

²⁸ Nangta ki la leit bad leh kumta kumba U Trai u la hukum ïa u Moses bad u Aaron.

Kaba pynïap ïa u khun nyngkong

²⁹ Hamar shiteng synñia U Trai u la pynïap ïa u khun nyngkong baroh ha Ijipt, naduh u khun nyngkong jong u Pharaoh, u ban sa kiew khet, haduh u khun nyngkong jong u koidi uba ha ïingbyndi; ïa baroh kiba la kha nyngkong na ki mrad ruh la pynïap.

³⁰ Ha kata ka miet, la pynkyndit ïa u Pharaoh, ïa ki rangbah synshar jong u, bad ïa baroh ki nong Ijipt. Ka jinglynñiar kaba jam ka la don ha kylleng ka ri Ijipt, namar ym shym don kawei ruh ka ïing kaba ym don u khun uba khlem ïap.

³¹ Ha kata kajuh ka miet, u Pharaoh u la phah khot mar mar ïa u Moses bad u Aaron, bad u ong, “Khie mihnoh na ka ri jong nga, ma phi bad ki Israel! Khie leit bad mane ïa U Trai kumba phi la pan.

³² Ïalam ïa la ki langbrot, ki blang, bad ki masi, bad khie mihnoh. Duwai ruh na ka bynta ka jingkyrkhu halor jong nga.”

³³ Kita ki nong Ijipt ki la kyrpad jur ïa ki Israel ban pynstet bad mihnoh na kata ka ri. “Ngin sa ïap lut lada phim leit noh,” ki ong.

³⁴ Kumta ki paidbah ki pyndap ïa ki khiew shet jong ki da u kpu bakhlem thiat, ki song ïa ki ha ki jaiñ, bad ki bah ïa ki ha la ki tyrpeng.

³⁵ Ki Israel ki la leh kumba u Moses u la lah ong; bad ki la pan na ki nong Ijipt ïa ki jingdeng ksiar bad ki jingdeng rupa, bad ïa ki jaiñkup jaiñsem de.

³⁶ U Trai u pynlong ïa ki nong Ijipt ba kin ñiewburom ïa ki Israel bad ba kin ai kat ïa kaba ki pan. Dei da kumne ba ki Israel ki rah noh ïa ka spah ki nong Ijipt.

Ki Israel ki mihnoh na Ijipt

³⁷ Ki Israel ki mihnoh bad ki ïaid da ka kjat na Rameses haduh Sukkoth. Ki ïadon baroh kumba hynriew lakh ngut ki rangbah, nalor ki kynthei bad ki khynnah.

³⁸ Kiwei ki briew ruh kiba bun lem bad ki langbrot, ki blang, bad ki masi, ki leit ryngkat bad ki.

³⁹ Ki shet ïa u kpu bakhlem thiat na uta u kpu im ba ki wanrah na Ijipt, naba ki la shah beh kynsan na ka ri Ijipt ba kim ïoh por ban da khreh jingbam lane ban pynkhreh ïa u kpu im.

⁴⁰ Ki Israel ki sah ha Ijipt sawspah laiphew snem.

⁴¹ Ha ka sngi kaba kut jong kita ki sawspah laiphew snem, baroh ki paid U Trai ki mihnoh na Ijipt.

⁴² Kata ka dei ka miet ba U Trai u ap miet ban ïalam noh ïa ki na ka ri Ijipt. Ïa kane kajuh ka miet la pynkyntang sha U Trai pateng la pateng kum ka miet ha kaba ki Israel ki dei ban ap miet.

Ki jingbuhbeit ryntih ïa Ka Niam Ka Jinglait

⁴³ U Trai u ong ha u Moses bad u Aaron, “Kine ki long ki jingbuhbeit ryntih ïa ka Niam Ka Jinglait: U nongwei um bit ban bam ïa ka jingbam kaba ïadei bad ka Niam Ka Jinglait;

⁴⁴ hynrei uno uno u mraw ba phi la thied u lah ban bam ïa ka lada phi otsher shuwa ïa u.

⁴⁵ U nongshong basa ne u nongbylla um bit ban bam ïa ka.

⁴⁶ Dei ban bam ïa ka jingbam baroh hapoh ka ïing ha kaba la khreh ïa ka; phim bit ban rah ïa ka shabar; bad ym dei ban pynkheiñ wat tang kawei ruh ka shyieng jong u mrad.

⁴⁷ Ka jaitbynriew Israel baroh ka dei ban rakhe ïa kane ka Jingkhawai Niam, hynrei uno uno u bym shym otsher um lah ban bam ïa ka.

⁴⁸ Lada u nongwei uba shong basah bad phi u kwah ban rakhe ïa ka Jingkhawai Niam Ka Jinglait ban pyndonburom ïa U Trai, nyngkong eh phi dei ban otsher shuwa ïa ki shynrang baroh na ka ïing jong u. Hadien kata, lah ban kheiñ ïa u kum u traishnong, bad nangta u lah ban ïashim bynta ha ka Jingkhawai Niam.

⁴⁹ Kine ki jingbuhbeit ryntih kin teh kumjuh ïa ki traishnong bad ïa ki nongwei kiba shong basah bad phi.”

⁵⁰ Baroh ki Israel ki la kohnguh bad leh kumba U Trai u la hukum ïa u Moses bad u Aaron.

⁵¹ Ha kata ka sngi U Trai u ïalam noh ïa ki Israel na ka ri Ijipt.