EKSODOS 11 - Khasi CL Bible (BSI)

U Moses u pynbna ïa ka jingïap ki khun shynrang kiba nyngkong

¹ Nangta U Trai u ong ha u Moses, “Ngan phah sa tang kawei ka jingpynshitom ha u Pharaoh bad ki briew jong u. Hadien kata, un sa shah ba phin ïamihnoh. Ha ka jingshisha, un sa beh lut ïa phi nangne.

² Mynta kren ha ki paid Israel bad ong ïa ki baroh ban pan na la ki paramarjan ïa ki jingdeng ksiar bad ki jingdeng rupa.”

³ U Trai u pynlong ïa ki nong Ijipt ba kin sngewburom ïa ki Israel. Shisha, ki rangbah synshar bad ki briew baroh ki ñiew ba u Moses u dei u briew uba khraw katta katta.

⁴ Te u Moses u ong ha u Pharaoh, “U Trai U ong, ‘Ha ka por shiteng synñia ngan ïaid lyngba ïa ka Ijipt,

⁵ bad man la u khun nyngkong ha Ijipt un ïap, naduh u khun nyngkong jong u syiem u ban ïoh ïa ka khet, haduh u khun nyngkong jong ka mraw kaba tylliat kew. Kiba kha nyngkong na ki jingri baroh ruh kin ïap.

⁶ Kan don ka jinglynñiar kaba jam ha kylleng ka ri Ijipt, ka bym pat ju don mynno mynno kaba kum kata lane ka ban ym don shuh lano lano.

⁷ Hynrei wat u ksew ruh un ym wiar ïa ki Israel lane ïa ki jingri jingdup jong ki. Te men tip ba nga U Trai nga pynïapher hapdeng ki nong Ijipt bad ki Israel.’ ”

⁸ U Moses u pynkut da kaba ong, “Ki rangbah synshar jong phi baroh kin sa wan sha nga bad dem khrup ha khmat jong nga, bad kin sa kyrpad ïa nga ban ïalam noh ïa ki briew jong nga baroh bad ban mihnoh. Hadien kata ngan sa leit.” Nangta u Moses u mihnoh na u Pharaoh da ka jingbitar bakhraw.

⁹ U Trai u la lah ong ha u Moses, “U Pharaoh un ïai kyntait ban shahshkor ïa phi khnang ba nga lah ban leh kham bun ki kambah jong nga ha Ijipt.”

¹⁰ U Moses bad u Aaron ki la leh ïa kine ki kambah baroh ha khmat u Pharaoh, hynrei U Trai u la pynmutlop ïa u, bad um shym la shah ïa ki Israel ban mihnoh na ka ri jong u.