EKLESIASTIS 8 - Khasi CL Bible (BSI)

¹ Tang u briew uba stad u tip aïu kiei kiei ki kit jingmut shisha. Ka jingstad ka pynlong ïa u ban phuh samrkhie bad ka pynjah ïa ka jingnoh sngewsih ka durkhmat jong u.

Kohnguh ïa u syiem

² Leh ïa kaei kaba u syiem u ong, bad wat pynlong kano kano ka jingkular ha U Blei khlem da pyrkhat bha.

³ U syiem u lah ban leh ïa kano kano kaba u mon, kumta mihnoh na khmat jong u; wat shong ha kaba kum kane ka jaka ba ma.

⁴ U syiem u trei bad ka iktiar, bad ym don uba lah ban pyrshah ïa kaei ba u leh.

⁵ Katba phi dang kohnguh ïa ki hukum jong u, phi don ha ka jingshngain, bad u briew uba stad u tip kumno bad lano ban leh ïa ka.

⁶ Ka don ka por kaba dei bad ka lynti kaba dei ban leh ïa kiei kiei, hynrei ngi tip tang khyndiat eh!

⁷ Ym don mano mano na ngi batip ïa kaei ka ban jia, bad ym don mano mano ruh ban ïathuh ha ngi.

⁸ Ym don mano mano ruh ba lah ban pyllait ïa lade na ka ban ïap lane pynslem ïa ka sngi ka jingïap jong u. Kata ka dei ka thma kaba ngim lah ban lait; ngim lah ban pyllait ïa lade da ka jingshukor.

Ki bymman bad ki bahok

⁹ Nga la ïohi ïa kane baroh haba nga pyrkhat ïa kiei kiei kiba la leh ha kane ka pyrthei, ka pyrthei ha kaba katto katne ki briew ki don ka bor bad kiwei pat ki dei ban shahshitom hapoh jong ki.

¹⁰ Ho-oid nga la ïohi ïa ki riewbymman ba la tep bad hapoh ki jingtep jong ki, hynrei ha ka lynti leit phai na lum jingtep ki briew ki ïaroh ïa ki ha kata ka nongbah ha kaba ki la leh ïa ki kam sniew jong ki. Ka long ka bym don jingmut.

¹¹ Balei ki briew ki stet haduh katta katta ban leh ïa ki kam sniew? Namar ïa ka kam sniew ym ju kham pynshitom kloi.

¹² U nongpop u lah ban leh shispah tylli ki kam runar bad u dang im. O! ho-oid, nga tip ïa kaei ba ki ong: “Lada phi kohnguh ïa U Blei, kiei kiei baroh kin bit kin biang,

¹³ hynrei kan ym long bha ïa ki bymman. Ka jingim jong ki ka long kum ka syrngiew, bad kin ïap haba ki dang samla, namar ba kim kohnguh ïa U Blei.”

¹⁴ Hynrei kane ka long ka bym don jingmut. Khmih kaei kaba jia ha ka pyrthei: Teng teng uba hok u ïoh ïa ka jingshah pynshitom jong u bymman, bad ki riewbymman ki ïoh ïa ka bainong jong kiba hok. Nga ong ba ka long ka bymmyntoi.

¹⁵ Kumta nga la pdiang ba u briew u dei ban pynsngewbha ïa lade namar ka jingpynsngewbha kaba tang ma ka kaba u ïoh ha kane ka jingim ka long ka jingïabam bad ka jingïadih bad ka jinglehsngewbha ïa lade. U lah la kumno kumno ban leh ïa kane katba u trei ha ka jingim kaba U Blei u la ai ha u ha kane ka pyrthei.

¹⁶ Man ba nga pyrshang ban long stad bad ban tip kaei kaba jia ha ka pyrthei, nga la sngewthuh ba phi lah ban peitmat, miet la bad sngi

¹⁷ bad phin ym lah da lei lei ban sngewthuh aïu U Blei u leh. Wat haba phi pyrshang tyngeh ruh, phin ym shem da lei lei. Ki briew kiba stad ki lah ban kam ba ki tip, hynrei kim tip.