EKLESIASTIS 7 - Khasi CL Bible (BSI)

Ki jingpyrkhat shaphang ka jingim

¹ Ka nam kaba bha ka kham kor ban ïa ka jingiwbih baremdor, bad ka sngi kaba phi ïap ka kham bha ban ïa ka sngi ha kaba la kha ïa phi.

² Ka kham bha ban leit sha ka ïing ha kaba don ka jingïambriew ban ïa kata ha kaba don ka jingïaleh-sngewbha, namar kiba im ki dei ban pynkynmaw ïa lade ba ka jingïap ka ap ïa ngi baroh.

³ Ka jingsngewsih ka kham bha ban ïa ka jingrkhie; ka lah ban pynsngewsih ïa ka durkhmat jong phi, hynrei ka pynnep ïa ka jingshemphang jong phi.

⁴ Uno uno uba ïai pyrkhat shaphang ka jingkmen u dei u bieit. U briew uba stad u pyrkhat shaphang ka jingïap.

⁵ Ka kham bha ban don ki briew kiba stad kiba sneng ïa phi ban ïa kaba don ki briew kiba tasngeng kiba rwai ki jingïaroh ïa phi.

⁶ Haba u bieit u rkhie, ka long kum ka jingsawa ki dieng shiah ha ka ding. Kam don jingmut ei ei.

⁷ Phi lah ban long uba stad, hynrei lada phi shukor ïano ïano, phi leh la kum u bieit. Lada phi shim klop, phi pynjot ïa la ka jinglong jingim.

⁸ Kaba kut jong kaei kaei ka kham bha ban ïa ka jingsdang jong ka. Ka jingïaishah ka kham bha ban ïa ka jingsarong.

⁹ Bat synshar ïa la ka jingkhluit khlieh; ka long ka jingbieit ban pynlang ïa ka jingbatnud.

¹⁰ Wat ju ong, “O! balei mo kiei kiei ki kham bha shibun ha ki sngi mynbarim?” Kam long ka jingkylli kaba shemphang.

¹¹ Uwei pa uwei uba im u dei ban long uba stad; ka long kaba bha kum ka jingïohpdiang ïa ka jingïohpateng

¹² bad kan ai ha phi ka jingshngain kumba lah ka pisa. Ka jingstad ka ri pynim ïa phi — kane ka dei ka kabu jong ka jingtip.

¹³ Pyrkhat ïa kaei kaba U Blei u la leh. Kumno keiñ uno uno un pynbeit ïa kaei kaba U Blei u la pynkdor.

¹⁴ Haba kiei kiei ki bit ki biang ïa phi, to kmen, bad haba ka jingjynjar ka wan, shu kynmaw: U Blei u phah ïa ka jingkmen bad ka jingjynjar; phin ym tip da lei lei kaei ka ban jia hadien.

¹⁵ Ka jingim jong nga ka long ka bym don jingmut, hynrei ha ka nga la ïohi ïa kaei kaei baroh. Katto katne ki briew kiba bha ki lah ban ïap katba kiwei pat ki dang im wat haba ki long kiba sniew.

¹⁶ Kumta te wat long uba bha palat ne uba stad palat — balei yn pynïap ïa lade hi?

¹⁷ Hynrei wat long kiba sniew palat ne kiba bieit palat, ym kawei ruh na ki — balei phin ïap haba phim pat dei?

¹⁸ Kiar ïa baroh ar tylli ki tduh. Lada phi don ka jingtiengburom ïa U Blei, la kumno kumno phin long kiba jop.

¹⁹ Ka jingstad ka lehbha bun shah ïa u briew ban ïa kaba ki shiphew ngut ki nongsynshar ki lah ban leh ïa ka nongbah.

²⁰ Ym don uno uno ha ka pyrthei uba leh ïa kaba bha ha ki por baroh bad u bym ju leh bakla.

²¹ Wat pynleit jingmut ha kaei kaei baroh kaba ki briew ki ong — phi lah ban ïohsngew ba u shakri jong phi u ibeiñ ïa phi,

²² bad phi tip ïa lade ba phi la ibeiñ ïa kiwei ki briew bun bunsien.

²³ Nga la pyndonkam ïa la ka jingstad ban tynjuh ïa kane baroh. Nga la kut jingmut ban long uba stad, hynrei ka la long palat pud ïa nga.

²⁴ Kumno uno uno un shem aïu ka jingim ka mut? Ka long kaba jylliew eh ïa ngi, kaba eh than ban sngewthuh.

²⁵ Hynrei nga la pynleit ïa lade ha ka jingtip bad ha ka jingpule bniah; nga la kut jingmut ban shem ïa ka jingstad bad ïa ki jubab ïa ki jingkylli jong nga, bad ban tip haduh katno ka jingtasngeng ka long kaba sniew bad kaba bieit.

²⁶ Nga la shem ïa kaei kaei kaba kham kthang ban ïa ka jingïap — ka kynthei kaba long kum ka jingriam. Ka jingieit ba ka ai ïa phi kan kem ïa phi kum ka jar, bad ki kti jong ka sawdong jong phi kin bat ïa phi kum u kynjri. U briew uba pynsngewbha ïa U Blei u lah ban lait, hynrei kan kem ïa u nongpop.

²⁷ Ho-oid, ong u Stad saiñpyrkhat, nga la shem ïa kane khyndiat pa khyndiat katba nga dang wad ïa ki jubab.

²⁸ Nga la khmih ïa kiwei pat ki jubab hynrei ngam shem ei ei. Nga la shem uwei u briew na ki shihajar ngut uba nga lah ban burom, hynrei ym don kawei ruh ka kynthei.

²⁹ Kane ka long baroh kaba nga la tip: U Blei u la thaw ïa ngi kiba synlar, hynrei ngi la pynjyrthiaw shibun eh ïa lade.