EKLESIASTIS 5 - Khasi CL Bible (BSI)

Wat pynlong ki jingkular khlem pyrkhat

¹ Da sumar shaphang kaba leit sha ka Templ. Ka kham bha ban leit hangta ban ïoh jinghikai ban ïa kaba ai jingkñia kum ki briew ba-bieit ki bymtip ïa kaba dei na kaba bakla.

² Da pyrkhat shuwa ba phin kren, bad wat pynlong kino kino ki jingkular kyrkieh ha U Blei. U don ha bneng bad ma phi ha khyndew, kumta wat ong ei ei palat ban ïa kaba phi dei ban ong.

³ Kat phi nang bun jingkhuslai, katta phin ïoh ki jingphohsniew kynsha, bad kat phi nang bunktien katta phin liat ha kaba kren ïa kaei kaei kaba bieit.

⁴ Kumta haba phi pynlong ka jingkular ha U Blei, pyndep kloi ïa ka katba lah. Um donkam ïa u bieit. Leh ïa kaei kaba phi kular ban leh.

⁵ Kham bha ban ym kular ei ei ban ïa kaba pynlong ka jingkular hynrei khlem bat ïa ka.

⁶ Wat ai ba ki kyntien jong phi kin ïalam ïa phi sha ka pop, ba kumta phi hap ban ïathuh ïa u lyngdoh jong U Blei ba phim shym mut shisha. Balei ban pynlong ïa U Blei ban bitar ïa phi? Balei yn shah ïa u ban pynjot thiaw ïa kaei kaba phi la trei?

⁷ Kam pher haduh katno phi phohsniew, haduh katno phi trei ïa ka kam bymmyntoi, lane haduh katno phi kren, phi dei ban ïeng ha ka jingtiengburom ïa U Blei.

Ka jingim ka long ka bymmyntoi

⁸ Wat lyngngoh haba phi ïohi ba ka sorkar ka banbeiñ ïa kiba duk bad kam ai ha ki ïa ka jinglehhok bad ïa ki hok jong ki. Ïa uwei pa uwei u rangbah synshar la ïada da uno uno uba kham halor bad ïa baroh ar la ïada da ki rangbah synshar kiba kham halor.

⁹ Wat u syiem u shaniah ha ka jingot.

¹⁰ Lada phi ieit ïa ka pisa da lei lei ruh phin ym ïoh jinghun, lada phi angnud ban riewspah, phin ym ïoh ïa baroh kaba phi kwah. Ka long ka bymmyntoi.

¹¹ Kat phi nang roi ha ka spah, katta ki shyntur phin hap ban bsa. Baroh kaba phi ïohnong ka dei ka jingtip ba phi long uba riewspah.

¹² Ki nongtrei ki lah ne kim lah ban don kat ban biang ban bam, hynrei la kumno kumno ki ïoh ka jingïohthiah kaba bang. Pynban, kiba riewspah, ki don bun haduh katta katta ha kaba kim ïohthiah namar ka jingkhuslai.

¹³ Hangne ka don kaei kaei kaba shyrkhei kaba nga la ïohi ha ka pyrthei: Ki briew ki lah ban bat tang shipor ïa la ka pisa haba ki lah ban donkam ïa ka,

¹⁴ bad nangta ki duh lut ïa ka ha ki katto katne ki jingïakhaïi basniew bad ki kut ha ka jingbymdon ei ei shuh ban ai pateng ha la ki khun ki kti.

¹⁵ Ngi ieh ïa kane ka pyrthei kumba ngi la wan rung sha ka — da kaba thylli. Nalor ka kam jong ngi baroh ym don kano kano kaba ngi lah ban rah bad ngi.

¹⁶ Hato kam dei kumta? Ngi leit kumba ngi wan. Ngi trei, da kaba pyrshang ban kem ïa ka lyer bad aïu ngi ïoh?

¹⁷ Ngi ïoh ban im ka jingim jong ngi ha ka jingdum bad ka jingsngewsih kthang, ngi khuslai, bitar bad ïohpang.

¹⁸ Kane ka dei kaei kaba nga la shem: Kaba bha tam kaba ngi lah ban leh ka long ban bam bad ban dih bad ban lehkmen ïa kaei kaba ngi la trei ha ka jingim balyngkot kaba U Blei u la ai ïa ngi; kane ka dei ka kupar jong ngi.

¹⁹ Lada U Blei u ai ha ngi ka spah bad ka jingdon jingem bad to ngin lehkmen ha ki, ngi dei ban sngewnguh bad lehkmen ïa kaei kaba ngi la trei. Ka dei ka jingai na U Blei.

²⁰ Namar U Blei u la shah ïa ngi ban kmen, ngin ym khuslai shibun shaphang katno ka jingim ka long kaba lyngkot.