EKLESIASTIS 4 - Khasi CL Bible (BSI)

¹ Nangta nga la khmih biang ha baroh ki jingbymlehhok kaba trei ha kane ka pyrthei. Kiba la shah banbeiñ ki lynñiar, bad ym don mano mano ban ïarap ïa ki. Ym don mano mano ban ïarap ïa ki namar ki nongbanbeiñ jong ki, ki don ka bor ha ka liang jong ki.

² Nga bishni ïa kito kiba la ïap bad kiba la leit noh; ki long kiba kham bha ban ïa kito kiba dang im.

³ Hynrei kham bha ban ïa kine baroh ar long kito ki bym pat shym la kha, ki bym pat ïohi ïa ka jingbymlehhok kaba trei ha ka pyrthei.

⁴ Nga la tip ruh balei ba ki briew ki trei shitom ban jop: Ka dei namar ba ki bishni ïa kiei kiei kiba ki paramarjan jong ki, ki don. Hynrei ka long ka bymmyntoi. Ka long kum ka jingbeh ïa ka lyer.

⁵ Ki ong ba ngin long ki bieit ban kli ïa ki kti jong ngi bad ai ïa lade ban shahjingit haduh ban ïap.

⁶ Ka lah ban long kumta, hynrei ka long kaba kham bha ban don tang khyndiat, bad ka jingpalei jingmut, ban ïa kaba bunkam shi lynter da ki kti baroh ar tylli, da kaba pyrshang ban kem ïa ka lyer.

⁷ Nga la ïohi ïa kawei pat kaei kaei ha ka jingim kaba long ka bymmyntoi.

⁸ Hangne don uwei uba shong basah marwei. Um don khun shynrang lymne u para, pynban u ïai trei, um ju sngewhun ïa ka spah kaba u don. Na ka bynta jongno ba u trei shitom haduh katta katta bad ba u khanglad ïa lade hi na kano kano ka jingpynsngewbha? Kane ruh ka long ka bymmyntoi — bad ka lynti ba-isangsot ban im.

⁹ Ar ngut ki kham bha ban ïa kaba marwei, namar ryngkat lang ki lah ban trei kham bha shibun.

¹⁰ Lada uwei na ki u kyllon, uwei pat u lah ban khyllie joit ïa u. Hynrei lada uno uno u don marwei bad u kyllon; ka long kaba sangsot tam, namar ym don mano mano ban ïarap ïa u.

¹¹ Lada ka khriat, ki ar ngut ki lah ban ïathiah lang bad ban neh ha ka jingsyiad, hynrei kumno phin pynneh jingsyiad tang ma phi da lade hi?

¹² Ar ngut ki briew ki lah ban ïada na ka jingtur ïaleh kaba lah ban jop ïa u briew ba tang marwei. U tyllai uba la jyrthiaw da ki lai tylli ki tyllai u long uba jwat ban dkut.

^13-14 Uno uno u lah ban kiew na ka jingduk ban long u syiem jong ka ri jong u, lane u ban leit na ka ïingbyndi sha ka khet, hynrei lada ha ka jinglong tymmen jong u, u long uba bieit eh ban shim ïa ka jingaibuit, um long uba kham bha kum u samla uba duk hynrei uba shemphang.

¹⁵ Nga la pyrkhat shaphang ki briew baroh kiba shong basah ha kane ka pyrthei, bad nga la sngewthuh ba hangno re hangno hapdeng jong ki don u samla u ban shimti ïa ka jaka jong u syiem.

¹⁶ Ka lah ban ym don pud ïa ka jingdon ki briew kiba u syiem u synshar; haba um don shuh, ym don mano mano uba sngewnguh ïa kaei kaba u la leh. Ka long ka bymmyntoi. Ka long kum ka jingbeh ïa ka lyer.