EKLESIASTIS 3 - Khasi CL Bible (BSI)

Ka por ïa kiei kiei baroh

¹ Baroh kaba jia ha kane ka pyrthei ka jia ha ka por kaba U Blei u jied.

² U buh ka por ban kha bad ka por ban ïap, ka por ban thung bad ka por ban rat noh,

³ ka por ban pynïap bad ka por ban pynkhiah, ka por ban pynkhyllem bad ka por ban tei.

⁴ U buh ka por ban sngewsih bad ka por ban kmen, ka por ban ïam sngewsih bad ka por ban shad,

⁵ ka por ban phylliew jingieit bad ka por ban ym phylliew jingieit, ka por ban ïadoh bad ka por ban ym ïadoh.

⁶ U buh ka por ban shem bad ka por ban jah, ka por ban kynshew bad ka por ban bret noh,

⁷ ka por ban tar bad ka por ban syrdep, ka por ban sngap jar bad ka por ban kren.

⁸ U buh ka por ban ieit bad ka por ban isih, ka por ïa ka thma bad ka por ïa ka jingsuk.

⁹ Aïu ngi ïohnong na ka kam jong ngi baroh?

¹⁰ Nga tip ïa ki jingkit bakhia kiba U Blei u la buh halor jong ngi.

¹¹ U la buh ka por kaba dei ïa kaei kaei baroh. U la ai ha ngi ka jingkwah ban tip ïa ka lawei, hynrei um ju ai ha ngi ka jinghun ban sngewthuh lut ïa kaei kaba u leh.

¹² Kumta nga la sngewthuh ba baroh kaba ngi lah ban leh ka long ban kmen bad leh ïa kaba bha tam kaba ngi lah katba ngi dang im.

¹³ Baroh na ngi, ngi dei ban bam bad dih bad lehkmen ïa kaei kaba ngi la trei. Ka dei ka jingai jong U Blei.

¹⁴ Nga tip ba kaei kaei kaba U Blei u leh kan neh junom. Phim lah ban bynrap ei ei ha ka lane shim noh ïa kano kano na ka. Bad kawei kaba U Blei u leh ka long ban pynlong ïa ngi ban ïeng ha ka jingburom ïa u.

¹⁵ Kaei kaei kaba jia lane kaba lah ban jia ka la lah jia mynshuwa. U Blei u pynlong ïa kajuh ban jia bad ïai jia.

Ka jingbymlehhok ha ka Pyrthei

¹⁶ Shuh shuh, nga la ïohi ruh ba ha kane ka pyrthei phi shem ka jingbymman ha ka jaka kaba ka jinglehhok bad ka hok ki dei ban don.

¹⁷ Nga ong ha lade, “U Blei un bishar kumjuh ïa uba hok bad uba sniew, namar kaei kaei baroh, kano kano ka jingleh, kan jia ha ka por ba la buh ïa ka hi.”

¹⁸ Nga la rai ba U Blei u tynjuh ïa ngi, ban pyn-i ïa ngi ba ngim long kham bha ban ïa ki mrad.

¹⁹ Nalor baroh, kajuh ka kupar ka ap ïa ki briew bad ïa ki mrad kumjuh. Uwei u ïap kum uwei pat. Ki long kijuh ki jingthaw. U briew um long uba kham bha ban ïa ka mrad, namar ka jingim kam don jingmut ïa ki baroh ar.

²⁰ Baroh ar ki leit sha kajuh ka jaka — ka khyndew. Baroh ar ki la wan na ka bad baroh ar kin leit phai pat sha ka.

²¹ Kumno uwei un sngewthikna ba ka mynsiem briew ka kiew artet katba ba ka mynsiem jong ka mrad ka hiar sha tbian sha ka khyndew?

²² Kumta nga la sngewthuh te ba kaba bha tam kaba ngi lah ban leh ka long ban lehkmen ïa kaei kaba ngi la trei. Ym don kano kano kawei pat kaba ngi lah ban leh. Ym don kano kano ka lynti ïa ngi ban tip kaei ka ban jia ynda ngi ïap.