EKLESIASTIS 2 - Khasi CL Bible (BSI)

¹ Nga la kut jingmut ban pynkmen ïa lade bad ban shem ka jingkmen ka long kaei. Hynrei nga la shem ba kane ruh ka long ka bymmyntoi.

² Nga la shem ba ka jingrkhie ka dei ka jingbieit, ba ka jingsngewbha kam wanrah kaei kaei kaba bha ïa phi.

³ Haba la pynkhih ïa nga da ka jingkwah ïa ka jingstad, nga la rai ban pynsngewbha ïa la ka dohnud da ka waiñ bad ban ïoh ka por basngewtynnat. Nga la pyrkhat ba kane ka lah ban long ka lynti kaba bha tam ba ki briew ki lah ban pynlut ïa ka jingim jong ki kaba lyngkot ha ka pyrthei.

⁴ Nga la pyndep kiei kiei kiba khraw, nga la tei ïa lade ki ïing bad thung ki bri sohwaiñ.

⁵ Nga la thung ki kper bad ki bri sohwaiñ lem bad bun jait ki diengsoh ha ki.

⁶ Nga la tih ki pung-um ban ai um ïa ki.

⁷ Nga la thied shibun ki mraw bad la don bun ki mraw kiba la kha ha ka ïing jong nga. Nga la don bun ki jingri ban ïano ïano ba la ju shong ju sah ha Jerusalem.

⁸ Nga la kynton ruh ka rupa bad ka ksiar na ki jingkynshew syiem jong ki ri kiba nga la synshar. Ki shynrang bad ki kynthei ki la rwai ban pynbyrngia ïa nga, bad nga la don baroh ki kynthei kiba u briew u lah ban kwah.

⁹ Ho-oid nga la long uba khraw, kham khraw ban ïa uno uno uwei pat uba la im ha Jerusalem, bad ka jingstad jong nga kam ju shetkylla ïa nga.

¹⁰ Kano kano kaba nga la kwah, nga la ïoh. Ngam shym la pynduh ïa lade ïa kano kano ka jingpynsngewbha. Nga la sngewsarong ïa kaei kaei baroh kaba nga la trei bad kane baroh ka dei ka bainong jong nga.

¹¹ Nangta nga la pyrkhat ïa baroh kaba nga la leh bad haduh katno nga la trei shitom ïa ka bad nga la sngewthuh ba kam kit jingmut ei ei. Ka la long kum ka jingbeh ïa ka lyer — ka bymmyntoi ei ei.

¹² Nalor baroh, u syiem u lah ban leh tang ïa kaei kaba ki syiem kiba ha shuwa ki la leh. Kumta nga la sdang ban pyrkhat aïu ka mut ban long uba stad lane uba thurmur lane uba bieit.

¹³ O! Nga tip, “Ka jingstad ka kham bha ban ïa ka jingbieit, kumba ka jingshai ka kham bha ban ïa ka jingdum.

¹⁴ Kiba stad ki lah ban ïohi shano ki leit, bad ki bieit kim lah.” Hynrei nga ruh nga tip ba kajuh ka kupar ka ap ïa ngi baroh.

¹⁵ Nga la pyrkhat ha lade, “Kaei kaba jia ha ki bieit kan jia ruh ha nga. Kumta nga la ïohnong aïu da kaba long uba stad bha?” “Ym don ei ei” nga la jubab “ym don kano kano ruh.”

¹⁶ Ym don mano mano ba kynmaw ïa ki briew kiba stad, bad ym don mano mano ba kynmaw ïa kiba bieit. Ha ki sngi ban wan, ïa ngi baroh yn klet. Ngi baroh ngin sa ïap — kiba stad bad kiba bieit kumjuh.

¹⁷ Kumta ka jingim ka wan long ka bym don jingmut ei ei ïa nga, namar baroh kaba ha ka, kam shym wallam ei ei ïa nga hynrei tang ka jingjynjar. Baroh ka la long ka bymmyntoi, nga la beh ïa ka lyer.

¹⁸ Ym don kata kaba nga la trei bad kamai kaba long ei ei ïa nga, namar nga tip ba nga dei ban iehnoh ïa ka ha u nongmih bujli jong nga,

¹⁹ bad u lah ban long uba stad, lane u lah ban long uba bieit — mano batip? Pynban un long trai ïa kaei kaei baroh kaba nga la trei, baroh kaba ka jingstad jong nga ka la kamai ïa nga ha kane ka pyrthei. Baroh ka long ka bymmyntoi.

²⁰ Kumta nga la sngew babe ba nga la trei shitom bha.

²¹ Phi trei ïa kaei kaei da ka jingstad, ka jingtip bad ka jingtbit jong phi baroh, bad nangta phi dei ban iehnoh ïa ka baroh ha uwei pat u bym shym la trei ïa ka. Ka long ka bymmyntoi, bad kam long kaba dei!

²² Phi trei bad khuslai ïa la ka lynti lyngba ka jingim, bad aïu phi don ban pyn-i ïa ka?

²³ Katba phi dang im, baroh kaba phi leh kam wallam ei ei hynrei tang ka jingkhuslai bad ka jingpangnud. Wat mynmiet ka jingmut jong phi kam lah ban shongthait. Baroh ka long ka bymmyntoi.

²⁴ Kaba bha tam kaba u briew u lah ban leh ka long ban bam bad dih bad ban lehkmen ïa kaei kaba u la kamai. Bad wat la katta, nga la sngewthuh ba wat kane ka wan na U Blei.

²⁵ Da kumno pat phi lah ban don ei ei ban bam lane lehkmen da lade hi?

²⁶ U Blei u ai ka jingstad, ka jingtip bad ka jingkmen ha kito kiba pynsngewbha ïa u, hynrei u pynlong ïa ki nongpop ban trei, ban kamai bad ban kynshew, ba kumta kaei kaba ki ïoh lah ban ai ha kito kiba pynsngewbha ïa u. Baroh ka long ka bymmyntoi. Ka long kum ka jingbeh ïa ka lyer.