EKLESIASTIS 12 - Khasi CL Bible (BSI)

¹ Kumta to kynmaw ïa la U Nongthaw katba phi dang samla ha shuwa ka jingwan kito ki sngi bad ki snem ba-dum ha kaba phin ong, “ngam sngewtynnat ïa ka jingim.”

² Kata ka long haba ka jingshai jong ka sngi, u bnai, bad ki khlur kan sdang lip ïa phi, bad ki lyoh slap kin ym leit noh da lei lei.

³ Nangta ki kti jong phi, kiba la ïada ïa phi, kin khynñiuh, bad ki kjat jong phi, kiba khlaiñ mynta, kin sdang tlot. Ki bniat jong phi kin long tang khyndiat eh ban ktha ïa ka jingbam jong phi, bad ki khmat jong phi ki byr-ïe shaba palat ban ïohi shai kdar.

⁴ Ki shkor jong phi kin ym ïohsngew ïa ka jingsawa ha ki lynti. Da kaba shitom phin lah ban ïohsngew ïa ka jingtylliat haba ka tylliat, bad ïa ka sur jingtem haba ka sawa, hynrei wat ka jingpah jong ka sim kan kyrsiew ïa phi na ka jingïohthiah.

⁵ Phin sheptieng ïa ki jaka kynjang bad ka jingïaid lynti kan long kaba ma. U shñiuh jong phi un kylla lieh; da kaba shitom eh phin tan pynïaid ïa lade, bad baroh ki jingkwah jong phi kin duh noh. Ngi leit sha ka jaka shongthait kaba khatduh, bad nangta kan don ka jingïambriew ha ki lynti.

⁶ U kynjri rupa un dkut, bad ka sharak ksiar kan hap bad kan pait; u tyllai ha ka pukri um un dkut; bad ïa u khra um yn pynpait.

⁷ Ki met jong ngi kin kylla sha u pui pui khyndew, bad ka jingpyrsad ka jingim kan leit phai pat sha U Blei, uba la ai ïa ka ha ngi.

⁸ Ka bymmyntoi, ka bymmyntoi, ong u Stad saiñpyrkhat. Baroh ka long ka bymmyntoi.

Ka jingkyllum lang

⁹ Hynrei namar ba u Stad saiñpyrkhat u long uba stad, u ïai hikai ïa ki briew ïa kaei kaba u tip. U la pule bniah ïa ki proberb bad da kaba sngur mynsiem u da tynjuh ïa ka jingshisha jong ki.

¹⁰ U Stad saiñpyrkhat u la pyrshang ban shem ïa ki kyntien pyntngen, hynrei ki ktien kiba u thoh ki long kiba lah ban shaniah.

¹¹ Ki jingong jong ki briew kiba stad ki long kum ki dieng banep kiba ki nongap langbrot ki pyndonkam ha kaba ïalam lynti ïa ki langbrot, bad ki proberb kiba la lum ki neh slem kum ki preg kiba la sah pynskhem. Ki long kiba la ai da U Blei, U Nongap Langbrot jong ngi baroh.

¹² Ko khun jong nga, don sa kawei pat kaba phi hap ban ap khmih lynti. Ym don jingkut ïa ka jingthoh kot bad ka jingpule bniah shaba palat kan pynlwait ïa phi.

¹³ Hadien kane baroh, don tang kawei ban ong: To tiengburom ïa U Blei, bad kohnguh ïa ki hukum jong u, namar dei ïa kane keiñ ba la thaw ïa u briew.

¹⁴ U Blei un bishar ïa kaei kaei baroh kaba ngi leh, la kaba bha ne kaba sniew, wat ïa kiei kiei kiba la leh ha kaba rieh.