EKLESIASTIS 11 - Khasi CL Bible (BSI)

Aïu u briew uba stad u leh

¹ Thep ïa ka pisa jong phi ha ka jingkhaïi bar ri bad ha kawei na kine ki sngi phin ïohnong.

² Buh ïa ki jingthep pisa jong phi ha ki jaka babun — wat ha kiba bun ki jaka — namar ba phim tip da lei lei ka jait jingsniewbok aïu kaba phin ïoh ha kane ka pyrthei.

³ Kam pher sha kano ka liang u dieng u khyllem, un don ha ka jaka kaba u la kyllon. Haba ki lyoh ki dap, ka slap.

⁴ Lada phi ap haduh ba ka lyer bad ka jinglong ka suiñbneng kin bit kin biang, da lei lei phin ym thung ei ei bad phin ym ïoh ot ei ei.

⁵ U Blei u thaw ïa kiei kiei baroh, bad phim lah ban shemphang shuh ïa kaei kaba u leh ban ïa kaba phi sngewthuh kumno ka jingim bathymmai ka sdang ha ka kpoh jong ka kynthei kaba armet.

⁶ Thung ïa ki jingthung jong phi mynstep bad janmiet ruh. Da lei lei phin ym tip la baroh kin san bha lane la kawei ka rukom thung kan kham bha ban ïa kawei pat.

⁷ Ka long kaba bha ba yn lah ban lehkmen ïa ka jingshai itynnat jong ka sngi.

⁸ To long uba sngewnguh ïa kawei pa kawei ka snem ba phi im. Kam pher haduh katno phi im, kynmaw ba phin ïap kham slem. Kam don kano kano ruh ïa ka ban khmih lynti.

Ka jingai jingmut ïa ki samla

⁹ Ko samla, to lehkmen ïa ka jinglong samla jong phi. To kmen katba phi dang samla. Leh ïa kaei kaba phi kwah ban leh, bad bud ïa ka jingkwah ka dohnud jong phi. Hynrei kynmaw ba U Blei un bishar ïa phi ïa kaei kaei kaba phi leh.

¹⁰ Wat shah ïa kano kano ban pynkhuslai ïa phi lane pynpang ïa phi. Phin ym neh sah ha ka jinglong samla.