EKLESIASTIS 10 - Khasi CL Bible (BSI)

¹ Ki skain kiba ïap ki lah ban pyniwtung ïa baroh ka jingiwbih hapoh ka dabi, bad tang khyndiat ka jingmutlop ka lah ban pynduh ïa ka jingstad kaba khraw tam.

² Ka long kaba ju long ba u briew uba stad u leh ïa kaei kaba dei bad uba bieit u leh ïa ka bymdei.

³ Ka jingmutlop jong u ka paw wat ha ki nongwei kiba u ïakynduh ha ka lynti; u ailad ïa iwei pa iwei ban tip ba u dei u bieit.

⁴ Lada u nongsynshar jong phi u bitar ïa phi, wat nym ai ïa ka jingiehnoh kam jong phi; ïa ki jingbakla kiba khia lah ban map lada phi long jai jai.

⁵ Kane ka dei ka jingbymlehhok kaba jia ha ka pyrthei — ka jingbymlehhok kaba la pynlong da ki nongsynshar.

⁶ Ïa ki briew ba-mutlop la ai ki kyrdan ba don iktiar katba ïa kiba riewspah la leh bymsuidñiew.

⁷ Nga la ïohi ïa ki mraw ba ki shong da ki kulai katba ki riewdonburom ki ïaid da ka kjat kum ki mraw.

⁸ Lada phi tih ïa ka thliew, phin hap hapoh jong ka, lada phi phrung lyngba ka kynroh, u bseiñ un puh ïa phi.

⁹ Lada phi trei ha ka par maw, phi ïoh jingmynsaw na ki maw. Lada phi thlieh dieng, phi ïoh jingmynsaw haba phi leh ïa ka.

¹⁰ Lada u sdie jong phi u luin bad phim shym shut pynnep ïa u, phi hap ban trei kham tyngeh ban pyndonkam ïa u. Ka long kaba kham don jingmut ban pynkhreh lypa.

¹¹ Kaba tip kumno ban pynshohbieit ïa u bseiñ ka long ka bymdonkam lada phi shah ïa u bseiñ ban puh nyngkong.

¹² Kaei kaba u briew uba stad u kren ka wanrah ha u ïa ka burom, hynrei ïa u bieit la pynjot da ki ktien jong u hi.

¹³ U sdang da ka jingkren bieit bad u kut ha ka jinglamwir.

¹⁴ U bieit u kren bad ïai kren. Ym don mano mano batip kaei ka ban jia marbud, bad ym don mano mano ba lah ban ïathuh kan jia aïu hadien ba ngi ïap.

¹⁵ Tang uta uba mutlop shaba palat ban lap ka lynti sha ïing un pynthait ïa lade da ka jingtrei.

¹⁶ Ka ri ka don ha ka jingjynjar haba u syiem jong ka u dei u samla bad ki nongïalam jong ka ki ïakhawai baroh shi miet.

¹⁷ Hynrei ka ri ka long kaba donbok ban don u syiem uba pynlong ïa la ki jong ki rai bad ki nongïalam kiba bam ha ka por kaba dei, kiba bat synshar ïa lade bad ki bym buaid.

¹⁸ Haba u briew u jaipdeh shaba palat ban shna pynbha ïa ka tnum ïing jong u, kan jaw um, bad ka ïing kan khyllem.

¹⁹ Ka jingbam khawai ka pynkmen ïa phi bad ka waiñ ka pyndap jingkmen ïa phi, hynrei phin ym ïoh ïa kano kano na kine khlem ka pisa.

²⁰ Wat wad daw ïa u syiem, wat ha kaba jar jar, bad wad daw ïa kiba riewspah, wat ha ka jingkyrpang ka kamra thiah jong phi. Ka sim ka lah ban rah ïa ka khubor bad ïathuh ha ki ïa kaei kaba phi kren.