EKLESIASTIS 1 - Khasi CL Bible (BSI)

Ka jingim ka long ka bymmyntoi

¹ Kine ki long ki kyntien jong u Stad saiñpyrkhat, u khun jong u Dabid, uba long u syiem ha Jerusalem.

² Ka long ka bymmyntoi, ka bymmyntoi, ong u Stad saiñpyrkhat. Ka jingim ka long ka bymmyntoi, baroh ka long ka bymmyntoi.

³ Phi pynlut la ka jingim ha kaba treikam, kaba trei shitom, bad phi don aïu ban pyn-i ïa ka?

⁴ Ki pateng ki wan bad ki pateng ki leit, hynrei ka pyrthei ka shu ïaisah kumjuh.

⁵ Ka sngi ka dang ïai mih bad ka dang ïai sep, ka da leit phai da ka jingthait sha ka jaka ha kaba ka dep ban sdang biang.

⁶ Ka lyer ka beh shaphang shathie, ka lyer ka beh shaphang shatei — tawiar pyllun ka wan biang.

⁷ Kawei pa kawei ka wah ka tuid sha ka duriaw, hynrei ka duriaw kam pat shym dap. Ka um ka wan phai sha ka jaka ha kaba ki wah ki mih, bad ki sdang biang.

⁸ Baroh kaei kaei ka lam sha ka jingngiah — ka jingngiah kaba khraw palat ïa ki kyntien. Ki khmat jong ngi kim lah ban ïohi shibun kat ban ïoh jinghun, ki shkor jong ngi kim lah da lei lei ban ïohsngew shibun.

⁹ Kaei kaba la jia mynshuwa kan wan jia biang. Kaei kaba la pyndep mynshuwa yn leh biang. Ym don kano kano kaba thymmai ha ka pyrthei baroh kawei.

¹⁰ “Ha khmih,” ki ong, “hangne ka don kaei kaei kaba thymmai!” Hynrei, em, baroh ka lah jia mynshuwa, slem bah shuwa ban kha ïa ngi.

¹¹ Ym don mano mano ba kynmaw ïa kaei kaba la jia ha ka mynnor, bad ym don mano mano ha ki sngi ban wan ki ban kynmaw ïa kaei kaba jia hapdeng kaba mynta bad kaba myn ha kato.

Ka jingïohmad jong u Stad saiñpyrkhat

¹² Ma nga, u Stad saiñpyrkhat, nga la long u syiem halor ka Israel ha Jerusalem.

¹³ Nga la kut jingmut ban da khmih bniah bad wad bniah ïa kiei kiei baroh ba la leh ha kane ka pyrthei. U Blei u la buh ka kupar basyrtok halor jong ngi.

¹⁴ Nga la ïohi ïa kaei kaei baroh ba la leh ha ka pyrthei, bad nga ong ha phi ba baroh ka long ka bymmyntoi. Ka long kum ka jingbeh ïa ka lyer.

¹⁵ Phim lah ban pynbeit ïa kaei kaba la kdor, phim lah ban ñiew ïa kiei kiei ki bym don hangta.

¹⁶ Nga ong ha lade, “Nga la long u briew uba khraw, uba kham stad palat ban ïa uno uno uba la synshar ha Jerusalem shuwa jong nga. Nga tip aïu ka jingstad bad ka jingtip ki long shisha kiba kumno.”

¹⁷ Nga la kut jingmut ban tip ka jingïapher hapdeng ka jingtip bad ka jingbieit, ka jingstad bad ka jinglamwir. Hynrei nga shem ba nga ruh imat nga beh ïa ka lyer.

¹⁸ Katba phi nang stad, phin don bun ki jingkhuslai; katba phi nang tip kham bun, ka nang pynmong bun.