DEUTERONOMI 9 - Khasi CL Bible (BSI)

Ka jingbymkohnguh jong ki briew

¹ “Shahshkor ko Israel! Mynta ka sngi phin jam ïa ka wah Jordan bad knieh ïa kata ka ri jong ki jaitbynriew kiba kham khraw bad kham donbor ban ïa phi. Ki shnong jong ki, ki long kiba heh, bad ki kynroh jong ki, ki kot haduh suiñbneng.

² Ki briew pat ki long kiba radbah bad kiba jrong rynïeng; ki dei ki ramhah, bad phi la bna ba don kiba ong ba ym don mano mano uba lah ban ïeng ïaleh ïa ki.

³ Hynrei to tip mynta ba U Trai U Blei jong phi un ïaid ha shuwa jong phi kum ka ding kaba bam duh. Un jop bad pyndem ïa ki katba phi nang ïaid sha khmat, ba phi lah ban beh krad bad pynjot ïa ki kloi kloi, kumba u la kular.

⁴ “Wat ong ha la ka dohnud ynda U Trai U Blei jong phi u la pynher krad ïa ki na khmat jong phi, ka long namar ka hok jong ngi ba U Trai u la wan ïalam ïa ngi ban ïohkynti ïa kata ka ri.” Pynban ka long namar ka jingbymman kita ki jaitbynriew ba U Trai u la beh krad ïa ki namar jong phi.

⁵ Ym dei namar ka hok jong phi ne ka jinglong beit ha ka dohnud ba phin ïohkynti ïa ka ri jong ki, hynrei ka long namar ka jingbymman jong kita ki jaitbynriew ba U Trai U Blei jong phi u la beh krad ïa ki na khmat jong phi; ba un pynskhem ïa la ka kular ba u la ai ha ki kpa tymmen jong phi, u Abraham, u Isaak, bad u Jakob.

⁶ Phi dei ban tip, namar kata, ba U Trai um shym ai ha phi ïa kane ka ri kaba seisoh ban ïohkynti namar ka hok jong phi. Phi dei ka jaitbynriew kaba mutlop.

⁷ “Wat ju klet kumno phi la pynbitar lep ïa U Trai ha ka ri shyiap. Naduh ka sngi ba phi mih na Ijipt haduh ba phi poi hangne, phi la ïaleh pyrshah ïa u.

⁸ Wat ha Lum Sinai ruh phi la pynbitar shla ïa U Trai kat haduh ban pynjot ïa phi.

⁹ Nga kiew ïa uta u lum ban pdiang ïa ki mawlyngkniap ha kiba la thoh ïa ka jutang ba U Trai u la pynlong bad phi. Nga sah hangta sawphew sngi bad sawphew miet, bad ngam shym la bam ne dih ei ei.

¹⁰ Nangta U Trai u ai ha nga ïa ki ar tylli ki mawlyngkniap ha kiba u la thoh da la ka kti ïa kata kaba u la kren ha phi napdeng ka ding ha kato ka sngi ba phi ïalumlang ha uta u lum.

¹¹ Ho-oid, hadien kita ki sawphew sngi bad sawphew miet, U Trai u la ai ha nga ïa kita ki ar tylli ki mawlyngkniap ha kiba u la thoh ïa kata ka jutang.

¹² “Nangta U Trai u ong ha nga, ‘Khie leit hiar kloi na une u lum, namar kita ki briew jong me ïa kiba me la ïalam na Ijipt, ki la mut sniew bad ki la leh bymman. Ki lah da kynriah noh na kata ka lynti ïa kaba nga la hukum ïa ki, bad ki la thaw pynban ïa ka durblei na ka bynta ïa lade.’

¹³ “U Trai u la ong ruh ha nga, ‘Nga tip ba kine ki briew ki long kiba mutlop palat.

¹⁴ Me wat khang ïa nga, naba ngan pynjot thiaw ïa ki ba kumta yn ym don shuh u ban dang kynmaw ïa ki. Nangta ngan pynlong ïa me u kpa jong ka jaitbynriew kaba kham khraw bad kham donbor ban ïa ki.’

¹⁵ “Kumta nga la phai bad leit hiar na uta u lum, nga da rah ïa kita ki mawlyngkniap ar tylli, ha kiba la thoh ïa ka jutang. Ki thylliej ding ki dang meh ha uta u lum.

¹⁶ Nga la ïohi ba phi la lyndet ïa ka hukum ba U Trai U Blei jong phi u la ai ha phi, bad ba phi la leh pop pyrshah ïa u da kaba phi thaw na ka bynta ïa lade ka durblei ba la saiñ ha ka dur u khun masi.

¹⁷ Kumta, hangta ha khmat jong phi nga bret ïa kita ki mawlyngkniap bad nga pynpait pharia ïa ki.

¹⁸ Nangta sa shisien pat nga dem khrup ha khmat U Trai sawphew sngi bad sawphew miet, bad ngam shym la bam ne dih ei ei, namar ba phi la leh pop pyrshah ïa U Trai bad phi la pynbitar ïa u.

¹⁹ Nga la sheptieng ïa ka jingbitar shla U Trai, naba u la bitar lep kat haduh ba u la kloi wat ban pynjot ïa phi; hynrei sa shisien U Trai u la shahshkor ïa nga.

²⁰ U Trai u la bitar lep ïa u Aaron ruh kat ban pynïap ïa u; kumta ha kajuh ka por nga duwai na ka bynta jong u ruh.

²¹ Nga shim ïa kata kaei kaei kaba long hi ka pop — kata ka dur khun masi keiñ kaba phi la thaw bad nga bret ïa ka ha ka ding. Nangta nga pynpait pharia ïa ka, nga tylliat ni ïa ka haduh ba kan da long kum u pui pui, bad nga bret ïa kata ha ka wah kaba tuid na uta u lum.

²² “Phi la pynbitar ruh ïa U Trai U Blei jong phi mynba phi don ha Taberah, ha Massah, bad ha Kibroth Hattaabah.

²³ Bad haba u hukum ïa phi na Kadesh Barnea ban leit kam kynti ïa kata ka ri ïa kaba u la ai ha phi, phi ïaleh pyrshah pynban ïa u; phim shym shaniah bad kohnguh ïa u.

²⁴ Naduh ba nga la ithuh ïa phi, phi shait ïaleh pyrshah ïa U Trai.

²⁵ “Kumta nga la dem khrup ha khmat U Trai ha kita ki sawphew sngi bad sawphew miet, namar ba u la ong ba un pynjot ïa phi.

²⁶ Bad nga la duwai, ‘A Trai Nongsynshar, wat pynjot ïa la ki briew, ki briew kiba me la pyllait bad ïalam na Ijipt da ka jingkhlaiñ bad ka borbah jong me.

²⁷ Kynmaw ïa la ki shakri, ïa u Abraham, u Isaak, bad u Jakob, bad wat thew ïa ka jingmutlop, ka jingbymman, bad ka pop jong une u paidlang.

²⁸ Lymda kumta ki nong Ijipt kin ong ba mem lah ban ïalam ïa la ki briew sha ka ri kaba me la kular ha ki. Kin ong ba me la ïalam noh ïa la ki briew sha ka ri shyiap ban pynïap ïa ki, namar me la isih ïa ki.

²⁹ Nalor baroh, kine ki long ki briew kiba me la jied ban long ki jong me bad kiba me la wallam noh na ka ri Ijipt da ka bor bad ka jingkhlaiñ jong me.’