DEUTERONOMI 8 - Khasi CL Bible (BSI)

Ka ri kaba bha ban ïohkynti

¹ “Da kohnguh hok ïa ki hukum baroh ba nga la ai ha phi mynta ka sngi, ba phin ïoh im, phin roi, bad phin ïohkynti ïa kata ka ri ïa kaba U Trai u la kular ha ki kpa tymmen jong phi.

² Kynmaw kumno U Trai U Blei jong phi u la ïalam ïa phi baroh shi lynter lynti lyngba ka ri shyiap ha kine ki sawphew snem kiba la dep ba un pyndem ïa phi, u da tynjuh ïa phi ba un ïoh tip aïu phi thmu ban leh, bad la phin kohnguh ne em ïa ki hukum jong u.

³ U la pyndem ïa phi, u la pynshahthngan ïa phi, bad hadien kata u la ai ha phi ïa ka manna ban bam, ka jingbam kaba ma phi bad ki kpa tymmen jong phi phim pat ju ïoh mynno mynno. Ban hikai ïa phi ba u briew um im tang da u kpu hynrei da ka ktien baroh kaba mih na U Trai.

⁴ Ha kine ki sawphew snem ki jaiñkup jong phi kim shym man rim bad ki kjat jong phi ruh kim shym at.

⁵ Kynmaw ba kumba u kpa u sneng pynbeit ïa la u khun, kumta ruh U Trai U Blei jong phi u sneng pynbeit ïa phi.

⁶ Kumta, leh kumba U Trai u la hukum ïa phi: im kat kum ki hukum jong u bad kohnguh ïa u.

⁷ U Trai U Blei jong phi un ïalam ïa phi sha ka ri kaba seisoh — ka ri kaba don ki wah, ki pukri, bad ki umpohliew kiba tuid ha ki them bad ki lum;

⁸ ka ri kaba pynmih ïa u kew bad u barli, u dieng sohwaiñ bad u diengsoh Dumbur, u diengsoh Pomkranet bad u diengsoh Olib, bad ka ngap.

⁹ Hangta lano lano phin ym thngan, bad phin ym kyrduh ei ei. Ha ki mawsiang jong ka don u nar, bad ha ki lum jong ka lah ban tih tama.

¹⁰ Phin ïoh bam kat ïa kaba phi kwah, bad phin ainguh ïa U Trai U Blei jong phi na ka bynta kata ka ri kaba seisoh ba u la ai ha phi.

Ki jingmaham haba klet ïa U Trai

¹¹ “Sumar ban ym klet ïa U Trai U Blei jong phi; wat lyndet ïa ki hukum bad ki aiñ jong u ïa kiba nga ai ha phi mynta ka sngi.

¹² Wat ynda phi la ïoh ban bam kat ïa kaba phi kwah bad tei la ki ïing kiba itynnat ban shong,

¹³ bad wat ynda ki masi bad ki langbrot jong phi, ka rupa bad ka ksiar jong phi, bad ki jingdon jingem jong phi baroh ki la nang bun kyrhai,

¹⁴ kynmaw ban ym sngewsarong bad ban ym klet ïa U Trai U Blei jong phi uba la pyllait ïa phi na ka ri Ijipt ha kaba phi la long ki mraw.

¹⁵ U la ïalam ïa phi lyngba ka ri shyiap kaba ïar bad kaba ishyrkhei eh, ha kaba la don ki bseiñ kiba don bih bad ki 'ñianglartham. Ha kata ka ri kaba tyrkhong bad ka bym don um, u la pynmih um na u mawsiang na ka bynta jong phi.

¹⁶ Ha kata ka ri shyiap u la ai ha phi ïa ka manna ban bam, ka jingbam kaba ki kpa tymmen jong phi kim ju ïoh mynno mynno. U la pyndem bad tynjuh ïa phi, khnang ba ha kaba kut un pynmanbha ïa phi da kiei kiei kiba bha.

¹⁷ Husiar ïoh phi ong ha lade, ‘Ka bor bad ka jingkhlaiñ jong nga hi ki la pynriewspah katne ïa nga.’

¹⁸ Kynmaw ba dei U Trai U Blei jong phi uba ai spah ïa phi, ba un ïoh pynskhem haduh kane ka sngi ïa kata ka jutang ba u la pynlong bad ki kpa tymmen jong phi.

¹⁹ Lada phi klet ïa U Trai U Blei jong phi, bad phi phai sha kiwei pat ki blei ban mane bad ban shakri ïa ki, nga maham jur ïa phi ha kane ka sngi ba phin ïap da shisha.

²⁰ Lada phim kohnguh ïa U Trai, phin shah pynjot kumjuh kumba kita ki jaitbynriew kin shah pynjot ha U Trai katba phi nang ïaid sha khmat.