DEUTERONOMI 7 - Khasi CL Bible (BSI)

U paidlang jong U Trai

¹ “U Trai U Blei jong phi un wan ïalam ïa phi sha kata ka ri kaba phin ïohkynti, bad un beh noh nangta ïa ki jaitbynriew kiba bun. Katba phi nang ïaid sha khmat, un beh noh ïa ki hynñiew ki jaitbynriew kiba kham bun paid bad kham khrawbor ban ïa phi. Kita ki dei ki Hit, ki Girgash, ki Amor, ki Kanaan, ki Peris, ki Hib, bad ki Jebus.

² Ynda U Trai U Blei jong phi u aiti ïa kine ki briew ha phi bad phi jop ïa ki, phi dei ban pynïap lut ïa ki baroh. Wat ïateh jutang bad ki bad wat leh-isynei ïa ki.

³ Wat ïashongkha khleh bad ki, bad khang ïa ki khun ki kti jong phi ban ïashongkha khleh bad ki,

⁴ ïoh kin phai dien noh na U Trai ban mane ïa kiwei pat ki blei. Lada jia kumta, U Trai un bitar lep ïa phi bad un pynjot ïa phi shisyndon.

⁵ Kumta, pynpra ïa ki duwan jong ki, pynpait pharia ïa ki rishot mawkyntang jong ki, mait ïa ki dak ka blei Asherah jong ki, bad thang ïa ki bleithaw jong ki.

⁶ Namar phi long kiba la pynkyntang khuid sha U Trai U Blei jong phi. U la jied ïa phi napdeng ki jaitbynriew baroh ha ka pyrthei ba phin long ka jaitbynriew kaba kyrpang jong u.

⁷ “U Trai um shym la ieit bad jied ïa phi namar ba phi kham bun paid ban ïa kiwei pat ki jaitbynriew; ha ka jingshisha phi long ka jaitbynriew kaba rit tam ha ka pyrthei.

⁸ Hynrei ka long namar ba U Trai u ieit ïa phi bad u bat ïa la ka kular kaba u la ai ha ki kpa tymmen jong phi, bad namar kata u la ïalam noh ïa phi da ka borbah jong u bad u la pyllait na ka jinglongmraw ïa phi na u Pharaoh u syiem ka Ijipt.

⁹ To kynmaw ba U Trai U Blei jong phi u long ma u hi U Blei, U Blei uba ïaineh. Un bat ïa la ka jutang bad pynpaw ïa la ka jingieit kaba ïaineh ha ki hajar pateng bynriew kiba ieit ïa u bad kiba kohnguh ïa ki hukum jong u,

¹⁰ hynrei un ym pynslem ban pynshitom ïa kito kiba isih ïa u.

¹¹ Namar kata, kohnguh ïa kaei kaba la lah hikai ïa phi, sumar ban leh ïa ki hukum bad ki aiñ baroh ïa kiba nga la ai ha phi mynta ka sngi.

Ki jingkyrkhu kiba mih na ka jingkohnguh

¹² “Lada phi shahshkor ïa kine ki hukum bad kohnguh hok ïa ki, U Trai U Blei jong phi un ïai bat ïa la ka jutang bad phi bad un pynpaw ha phi ïa ka jingieit jong u kaba ïaineh, kumba u la kular ha ki kpa tymmen jong phi.

¹³ Un ieit bad kyrkhu ïa phi, ba phin nang roi kyrhai. Un kyrkhu ruh ba phin ïoh shibun ki khun ki kti; un kyrkhu ïa ki lyngkha jong phi ba phin ïoh u kew, ka waiñ, bad ka umphniang Olib; bad un kyrkhu ruh ïa phi da kaba ai ha phi shibun ki masi bad ki langbrot, ha kata ka ri ïa kaba u la kular ha ki kpa tymmen jong phi ban ai ha phi.

¹⁴ Yn ym don ka jaitbynriew ha ka pyrthei ka ban ïoh kat kine ki jingkyrkhu. Yn ym don mano mano u ban lyngki napdeng jong phi, lane napdeng ki jingri jong phi.

¹⁵ U Trai un pyllait ïa phi na ka jait jingpang baroh, bad un ym pynngat ha phi wat tang kawei ruh na ki jingpang kiba sngewtriem ba phi la mad ha ka ri Ijipt, hynrei un pynngat ïa ki ha ki nongshun jong phi.

¹⁶ Pynjot ïa kawei pa kawei ka jaitbynriew kat ïa kaba U Trai U Blei jong phi u aiti ha phi, bad wat sngewsynei ïa ki. Wat mane ïa ki blei jong ki, namar kata kan long ka jingma ïa me.

¹⁷ “Wat leit ong ha la ka dohnud, kine ki jaitbynriew ki kham bun paid ban ïa ngi, kumno ngi lah ban beh ïa ki.

¹⁸ Wat sheptieng ïa ki; hynrei to ïai kynmaw aïu U Trai U Blei jong phi u la leh ïa u Pharaoh bad ïa ki briew jong u baroh.

¹⁹ Kynmaw ruh ïa ki jingtynjuh kiba shyrkhei kiba phi la ïohi, da ki kambah bad ki kamphylla, bad da ka borbah da ka ksang'ti kaba la kner da kaba U Trai U Blei jong phi u la pyllait ïa phi, kumta ruh un pynjot ïa kita ki jaitbynriew baroh ïa kiba phi sheptieng.

²⁰ Nalor kane U Trai uba U Blei jong phi un phah ruh ïa u kyieng hapdeng jong ki, bad un pynjot ïa kito kiba lait im bad kiba phet rieh.

²¹ Kumta wat sheptieng ïa kita ki briew. U Trai U Blei jong phi u don ryngkat bad phi; u long U Blei uba donbor bad uba itieng.

²² Suki pa suki un beh krad ïa kine ki jaitbynriew katba phi nang tur sha khmat. Phin ym lah ban pynduh lut ïa ki shisyndon, namar, lada phi leh kumta, ki mradkhlaw kin jyllei palat bad kin long ka jingma pynban ïa phi.

²³ U Trai un aiti ha phi ïa ki nongshun jong phi bad un pynkulmar ïa ki haduh ba kin da shah pynjot lut thiaw.

²⁴ Un aiti ha phi ïa ki syiem jong ki. Phin pynïap ïa ki, bad yn klet noh ïa ki. Yn ym don mano mano ban khang ïa phi; phin pynjot ïa ki baroh.

²⁵ Thang ïa ki bleithaw jong ki. Wat ikwah ïa ka rupa lane ïa ka ksiar kaba don ha ki, bad wat shim ïa ka sha lade ïoh phi ïap, namar U Trai u isih ïa ka jingmane bleithaw.

²⁶ Wat rah ïa kano kano ka bleithaw sha la ïing ïoh ba kajuh ka jingtim kan ngat sa ha phi ruh. Phi dei ban isih bad ibeiñ ïa kine ki bleithaw, namar ki long kiba la tim da U Trai.