DEUTERONOMI 6 - Khasi CL Bible (BSI)

Ka Hukum kaba khraw

¹ “Kine ki long ki aiñ baroh ïa kiba U Trai U Blei jong phi u la hukum ïa nga ban hikai ïa phi. Sumar bad leh ïa ki ha kata ka ri sha kaba phin sa leit bad ïohkynti.

² Katba phi dang im, ma phi bad ki khun ki ksiew jong phi, phi dei ban tiengburom ïa U Trai U Blei jong phi, bad kohnguh ïa ki hukum jong u ïa kiba nga ai ha phi, khnang ba phi lah ban im slem ha kata ka ri.

³ Shahshkor ïa ki, ko Israel, bad kohnguh ïa ki! Te phin shem bha, bad phin nang roi bad long ka jaitbynriew kaba donbor bad phin ïoh shong ha kata ka ri kaba tuid da ka dud bad ka ngap, kumba U Trai U Blei ki kpa tymmen jong ngi, u la kular.

⁴ “To sngap ko ki Israel! U Trai U Blei jong ngi u long tang ma u hi U Trai.

⁵ Phin ieit ïa U Trai U Blei jong phi da ka dohnud jong phi baroh, da ka mynsiem jong phi baroh, bad da ka bor jong phi baroh.

⁶ Wat klet lano lano ïa kine ki hukum ïa kiba nga ai ha phi mynta ka sngi.

⁷ Hikai ïa ki ha ki khun ki kti jong phi. Ïai pynkynmaw ïa ki haba phi don ha ïing bad haba phi ïaid ha lynti, haba phi shongthait bad haba phi trei phi ktah.

⁸ Kum ka dak ka jingpynkynmaw, teh ïa ki ha ki ksang'ti jong phi bad deng ïa ki ha ki shyllangmat jong phi.

⁹ Thoh ruh ïa ki ha ki shawkad jong ki ïing bad ha ki khyrdop jong phi.

Kaba maham pyrshah ïa ka jingbymkohnguh

¹⁰ “Kumba U Trai U Blei jong phi u la kular ïa ki kpa tymmen jong phi, u Abraham, u Isaak, bad u Jakob, un ai ha phi ïa ka ri kaba don ki shnong kiba heh bad kiba pahuh pahai kiba phim shym la tei.

¹¹ Ki ïing kin dap da ki mar kiba bha kiba phim shym la leit buh hangta, bad kin don ki pukri kiba phim shym la tih, bad ki bri sohwaiñ bad ki dieng Olib kiba phim shym la thung. Ynda U Trai u ïalam ïa phi sha kata ka ri bad phi ïoh kat ïa kaba phi kwah ban bam,

¹² kynmaw ba phin ym klet ïa U Trai uba la pyllait ïa phi na ka ri Ijipt, ha kaba phi la long ki mraw.

¹³ Tiengburom ïa U Trai U Blei jong phi, mane tang ïa u, bad kular ruh tang ha ka kyrteng jong u.

¹⁴ Wat mane ïa kiwei pat ki blei, ïa kino kino ki blei jong kita ki jaitbynriew kiba don sawdong jong phi.

¹⁵ Lada phi mane ïa kiwei pat ki blei, ka jingbitar U Trai kan wan bad thang ïa phi kum ka ding bad kan pynjot thiaw ïa phi, namar U Trai U Blei jong phi, uba don ryngkat bad phi, um lah shah ba phin shakri ïa kiwei pat ki blei.

¹⁶ “Wat tynjuh ïa U Trai U Blei jong phi, kumba phi la leh ha Massah.

¹⁷ Kynmaw ba phi dei ban kohnguh ïa ki hukum baroh kiba u la ai ha phi.

¹⁸ Leh ïa kaei kaba U Trai u ong ba ka long kaba dei bad kaba bha, te phin manbha. Phin sa ïohkynti ïa kata ka ri kaba seisoh ïa kaba U Trai u la kular ha ki kpa tymmen jong phi,

¹⁹ bad beh ïa ki nongshun jong phi, kumba u la kular.

²⁰ “Hadien habud, ki khun ki kti jong phi kin kylli ïa phi, ‘Balei mo U Trai U Blei jong ngi u ong ïa ngi ban kohnguh ïa kine ki hukum baroh?’

²¹ Ïathuh ïa ki, ‘Ngi la long ki mraw u Pharaoh ha Ijipt, bad U Trai u la pyllait ïa ngi da ka borbah jong u.

²² Ngi la ïohi da la ki khmat ba u la leh ïa ki kamphylla bad ïa kiei kiei kiba ishyrkhei pyrshah ïa ki Ijipt, ïa u syiem jong ki, bad ïa ki rangbah synshar jong u baroh.

²³ U la pyllait ïa ngi na Ijipt ban wan ïalam ïa ngi shane bad ban ai ha ngi ïa kane ka ri, kumba u la kular ha ki kpa tymmen jong ngi.

²⁴ Nangta U Trai U Blei jong ngi u la ong ïa ngi ban kohnguh ïa kine ki hukum baroh bad ban tiengburom ïa u, na ka bynta ka jingbha jong ngi ba un ri pynim ïa ngi kumba ha kane ka sngi.

²⁵ Lada ngi kohnguh hok ïa kaei kaei baroh kaba U Blei u la hukum ïa ngi, u ruh un sngewbha ïa ngi.’