DEUTERONOMI 5 - Khasi CL Bible (BSI)

Ki Shiphew Hukum

¹ U Moses u khot lang ïa ki Israel baroh bad u ong ha ki, “Ko phi ki Israel, shahshkor ïa ki hukum baroh ïa kiba ngan ai ha phi mynta ka sngi. Pule ïa ki bad pynthikna ba phi kohnguh ïa ki.

² Ha u Lum Sinai, U Trai U Blei jong ngi u la pynlong ka jutang,

³ ym tang bad ki kpa jong ngi, hynrei bad ngi baroh ruh kiba dang im haduh mynta ka sngi.

⁴ Hangta halor u lum, U Trai u la kren ha phi markhmat napdeng ka ding.

⁵ Nga la ïeng hapdeng jong phi bad U Trai ha kata ka por ban ïathuh ha phi aïu u ong, namar ba phi sheptieng ïa kata ka ding bad phim shym leit kiew sha uta u lum. “U Trai u la ong,

⁶ ‘Nga long U Trai U Blei jong phi, uba la pyllait im ïa phi na ka ri Ijipt, ha kaba phi la long ki mraw.

⁷ “ ‘Wat mane ïa uwei pat u blei lait na nga.

⁸ “ ‘Wat thaw durblei ïa lade, lane ïa kaei kaei kaba don ha bneng shajrong, lane ha ka khyndew sha tbian, lane ha ka um hapoh ka khyndew.

⁹ Wat dem ne mane ïa kano kano ka bleithaw, naba nga U Trai U Blei jong phi ngam lah shah ba phin mane ïa kiwei pat ki blei. Nga pynshitom ïa kito kiba isih ïa nga bad ïa ki khun ki ksiew jong ki haduh kaba lai bad kaba saw pateng.

¹⁰ Hynrei nga pynpaw ïa la ka jingieit ha ki hajar ki pateng kiba ieit ïa nga, bad kiba sumar ïa ki hukum jong nga.

¹¹ “ ‘Wat pyndonkam thala ïa ka kyrteng jong nga, naba nga U Trai U Blei jong phi ngan pynshitom ïa uba pyndonkam thala ïa ka kyrteng jong nga.

¹² “ ‘Kynmaw ban rakhe khuid ïa ka Sabbaton, kumba nga, U Trai U Blei jong phi, nga la hukum ïa phi.

¹³ Hynriew sngi phin trei bad phin leh ïa ka kam jong phi baroh,

¹⁴ hynrei ka sngi kaba hynñiew ka dei ka sngi shongthait ba la buh kyrpang na ka bynta jong nga. Ha kata ka sngi phim bit ban leh ïa kano kano ka kam — ma phi, lane ki khun jong phi, lane ki mraw jong phi, lane ki jingri jong phi, lane ki nongwei kiba shong basah bad phi. Ki mraw jong phi ki dei ban shongthait kumjuh.

¹⁵ Phi dei ban kynmaw ba phi la long ki mraw ha Ijipt, bad ba nga, U Trai U Blei jong phi, nga la pyllait im ïa phi da ka borbah jong nga. Dei namar kata ba nga hukum ïa phi ban rakhe ïa ka Sabbaton.

¹⁶ “ ‘Burom ïa la u kpa bad ïa la ka kmie, kumba nga, U Trai U Blei jong phi, nga hukum ïa phi, khnang ba phin manbha bad im slem ha kata ka ri ba nga ai ha phi.

¹⁷ “ ‘Wat pynïap briew.

¹⁸ “ ‘Wat klim.

¹⁹ “ ‘Wat tuh.

²⁰ “ ‘Wat sakhi lamler ïano ïano.

²¹ “ ‘Wat ikwah ïa ka tnga jong uwei pat u briew; wat ikwah ïa ka ïing jong u, ïa ka jaka jong u, ïa ki mraw jong u, ïa ki masi jong u, ïa ki kada jong u, lane ïa kaei kaei kaba dei ka jong u.’

²² “Kine ki long ki hukum ïa kiba U Trai u la ai ha phi baroh mynba phi ïalumlang ha uta u lum. U la kren da ka sur kaba donbor napdeng kata ka ding bad u lyoh uba rben, mynba u ai ïa ki ha phi khlem da bynrap ïa kiwei pat. Nangta u thoh ïa ki ha ki ar tylli ki mawlyngkniap bad u ai ïa ki ha nga.

Ka jingsheptieng u paidbah

²³ “Katba uta u lum baroh uwei u dang mehding bad phi ïohsngew ïa ka sur kaba wan napdeng ka jingdum, ki nongïalam bad ki tymmen ki san na ki jait jong phi ki ïawan sha nga

²⁴ bad ki ïa-ong, ‘U Trai U Blei jong ngi u la pynpaw ha ngi ïa ka jingkhraw bad ka burom jong u haba ngi ïohsngew ïa u ba u kren napdeng ka ding! Mynta ka sngi ngi la ïohi ba u briew u dang lah hi ban im, wat la U Blei u la kren ha u.

²⁵ Hynrei balei ngin shu ïap ei? Kata ka ding kaba ishyrkhei kan thang duh ïa ngi. Khlem pep ngin ïap lada ngi ïohsngew biang ba U Trai U Blei jong ngi u kren.

²⁶ Ju don mo u briew uba dang im hadien ba u la ïohsngew ïa U Blei uba im ba u kren napdeng ka ding?

²⁷ Khie leit biang, ko Moses, bad shahshkor ïa kaei kaei baroh kat kaba U Trai U Blei jong ngi u don ban ong. Nangta wan phai pat bad ïathuh ha ngi aïu u la kren ha phi. Ngin shahshkor bad kohnguh ïa ka.’

²⁸ “Haba U Trai u la ïohsngew ïa kane, u ong ha nga, ‘Nga la ïohsngew kine ki briew ki ong aïu; ki la kren ïa kaba dei.

²⁹ A, ba kin da la ïoh ïa kane ka dohnud! Ba kin da la sheptieng burom ïa nga bad kohnguh ïa ki hukum jong nga borabor, ma ki bad ki khun ki ksiew jong ki kin jin da la manbha junom.

³⁰ Khie ong ba kin ïaleit phai sha la ki dara.

³¹ Hynrei me pat, Moses, men sah hangne bad nga, bad ngan ai ha me ïa ki aiñ bad ki hukum jong nga baroh. Hikai ïa ki ha u paidbah ba kin sumar bad leh ïa ki ha kata ka ri ïa kaba ngan ai ha ki.’

³² “Ko phi ki Israel, wat pep ban leh ïa kaei kaei baroh kaba U Trai U Blei jong phi u la hukum ïa phi. Wat pynkheiñ ïa kawei ruh na ki aiñ jong u.

³³ Kohnguh ïa ki baroh, khnang ba phin manbha, bad ba phin im slem ha kata ka ri kaba phin sa ïohkynti.