DEUTERONOMI 4 - Khasi CL Bible (BSI)

U Moses u kyntu jur ïa ki Israel ban long kiba kohnguh

¹ Nangta u Moses u ong ha uta u paidbah, “Kohnguh ïa ki hukum baroh ïa kiba nga hikai ïa phi, te phin ïoh im bad phin ïohkynti ïa kata ka ri kaba U Trai U Blei ki kpa tymmen jong phi, u ai ha phi.

² Wat pyntam ei ei nalor kaba nga hukum ïa phi, lane pynduna ei ei na ka. Kohnguh ïa ki hukum U Trai U Blei jong phi ïa kiba nga la ai ha phi.

³ Phi la ïohi da lade aïu U Trai u la leh ha u lum Peor. U la pynjot ïa uwei pa uwei uba mane ïa u Baal hangta,

⁴ hynrei kito na phi kiba ïaineh ha U Trai U Blei jong phi ki dang im haduh mynta.

⁵ “Nga la hikai ïa phi ïa ki hukum, kumba U Trai U Blei jong nga u la hukum ïa nga. Sumar bad leh ïa ki ha kata ka ri sha kaba phin sa leit bad ïohkynti.

⁶ Sumar bad lehhok ïa ki, bad kata hi kan kren ha ki briew jong kiwei pat ki jaitbynriew haduh katno phi long kiba stad bad kiba shemphang. Haba ki ïohsngew shaphang kine ki aiñ, kin sa ïa-ong, ‘Haduh katne pleng, kane ka jaitbynriew ka don ka jingstad bad ka jingshemphang!’

⁷ “Ym don kawei pat ka jaitbynriew, la ka khraw katno katno, kaba don u blei uba hajan kum U Trai U Blei jong ngi, haba ki donkam ïa u. Man ka por ba ngi khot kyrpad ïa u, u jubab ïa ngi.

⁸ Ym don kawei pat ka jaitbynriew, la ka khraw katno katno, kaba don ki aiñ kiba hok kat kito kiba nga la hikai ïa phi mynta ka sngi.

⁹ Da leh husiar! Kynmaw ba katba phi dang im phim dei ban klet ïa kaei kaba phi la ïohi da la ki khmat.

¹⁰ Ïathuh pateng ha ki khun ki ksiew jong phi shaphang kata ka sngi ba phi ïeng ha khmat U Trai U Blei jong phi ha u Lum Sinai, mynba u ong ha nga, ‘Lumlang ïa u paidbah. Nga kwah ba kin ïohsngew aïu ngan ong, ba kumta kin tiengburom ïa nga katba ki dang im bad ba kin hikai ïa la ki khun ki kti ban leh kumjuh.’

¹¹ “Ïathuh ha ki khun ki kti jong phi kumno phi leit ïeng ha trai uta u lum ha uba u lyoh tdem uba ïong synñia u tap bad na uba ka ding kaba rhem ka klang shaduh suiñbneng.

¹² Ïathuh ïa ki kumno U Trai u la kren ha phi na kata ka ding, kumno phi la ïohsngew ba u kren hynrei phim shym la ïohi satia ïa ka dur jong u.

¹³ U la ïathuh ha phi kaei kaba phi dei ban leh ha kaba bat ïa ka jutang kaba u la pynlong bad phi, kata, ïa ki Shiphew Hukum ba u la thoh ha ki ar tylli ki mawlyngkniap.

¹⁴ U Trai u la hukum ïa nga ban hikai ïa phi ïa ki aiñ bad ki hukum baroh ïa kiba phi dei ban sumar bad leh ha kata ka ri sha kaba phin sa leit bad ïohkynti.

Ka jingmaham pyrshah ïa ka jingmane bleithaw

¹⁵ “Mynba U Trai u kren ha phi napdeng ka ding ha u Lum Sinai, phim shym la ïohi ïa kano kano ka dur.

¹⁶ Te, na ka bynta ka jingbha jong phi hi, sumar ba phin ym leh pop da kaba thaw na ka bynta ïa lade kano kano ka durblei — la ka long ka dur u briew lane ka briew,

¹⁷ u mrad lane ka sim,

¹⁸ u bseiñ lane ka dohkha.

¹⁹ Sumar ban ym shah pynshoi kat haduh ban da mane bad shakri ïa kaei kaba phi ïohi ha sahit bneng — la ka long ka sngi, u bnai, lane ki khlur, ïa kiba U Trai U Blei jong phi u la ai ha kiwei pat ki briew baroh ha ka pyrthei ba kin ïoh mane.

²⁰ Hynrei phi, phi dei ki briew kiba u la pyllait im na Ijipt, ka pajwa kaba klang da ka ding. U la wan ïalam ïa phi ban pynlong ïa phi ki briew jong u hi, kumne kumba phi long mynta.

²¹ Dei namar jong phi ba U Trai U Blei jong phi u la bitar ïa nga bad u la kren da kaba shai ba ngan ym ïoh jam ïa ka wah Jordan ban leit sha kata ka ri kaba seisoh kaba u ai kum ka jingïohkynti jong phi.

²² Nga te ngan ïap ha kane ka ri bad lano lano ngan ym ïoh jam ïa kata ka wah, hynrei phi pat phin sa ïoh leit shatai sha shiliang ban ïohkynti ïa kata ka ri kaba seisoh.

²³ Sumar ban ym klet ïa ka jutang ba U Trai U Blei jong phi u la pynlong bad phi. Kohnguh ïa ka hukum jong u ban ym thaw na ka bynta ïa lade ïa kano kano ka durblei,

²⁴ namar U Trai U Blei jong phi u long kum ka ding kaba bam duh; um lah shah ba ki Israel kin mane ïa kiwei pat ki blei.

²⁵ “Haba phi la shong slem ha kata ka ri bad phi la ïoh khun ïoh ksiew, wat leh pop da kaba thaw blei ïa lade da kano kano ka dur. Kata ka long ka kam bymman ha khmat U Trai, bad kan pynbitar ïa u.

²⁶ Nga khot ïa ka bneng bad ïa ka khyndew ban sakhi pyrshah ïa phi ba, lada phim kohnguh ïa nga, phin sa jah noh shen na kata ka ri; phin ym im slem ha kata ka ri sha shiliang ka Jordan ïa kaba phin sa ïohkynti. Yn sa pynjot thiaw ïa phi.

²⁷ U Trai un pynsakma ïa phi hapdeng kiwei pat ki jaitbynriew, bad hangta tang khyndiat eh na phi phin lait im.

²⁸ Hangta phin shakri ïa ki blei dieng bad ki blei maw ïa kiba la thaw da ka kti briew, ki bym lah ban ïohi lane ban ïohsngew, ban bam lane ban sma.

²⁹ Bad hangta phin wad ïa U Trai U Blei jong phi, bad lada phi wad ïa u da ka dohnud jong phi baroh, phin shem ïa u.

³⁰ Ynda phi don ha ka jynjar, bad kita kiei kiei baroh ki wan jia ha phi, te ha kaba khatduh phin phai sha U Trai bad kohnguh ïa u.

³¹ U long U Blei uba isynei. Un ym iehnoh lane pynjot ïa phi, bad un ym klet ïa ka jutang kaba u hi u la pynlong bad ki kpa tymmen jong phi.

³² “Phai sha ka mynnor, sha kata ka por shuwa ban kha ïa phi, ter shi ter haduh kata ka por mynba U Blei u la thaw ïa u briew ha ka pyrthei. Wad ha ka pyrthei baroh kawei. Hato kaei kaei kaba khraw kat kane ka la ju jia mynshuwa? Don mo u briew uba la ju ïohsngew ïa kaei kaei kaba kat kane?

³³ Don mo ki briew kiba dang im hadien ba ki la ïohsngew ïa u blei uba kren ha ki na ka ding, kumba phi, phi la ïohsngew?

³⁴ Ju don mo u blei uba nud ban leit shim ïa ka jaitbynriew napdeng kawei pat ka jaitbynriew bad pynlong ïa ka, ka jong u hi, kumba U Trai U Blei jong phi u la leh ïa phi ha Ijipt? Phi la ïohi da la ki khmat ba u la pyndonkam ïa la ka borbah; u la wallam ïa ki khlam bad ïa ka thma, u la leh ïa ki kambah bad ki kamphylla, bad u la pynjia ïa kiei kiei kiba ishyrkhei.

³⁵ U Trai u la pynpaw ha phi ïa kane, ban pynshisha ha phi ba tang ma u hi u long U Blei, bad ba ym don uwei pat lait na u.

³⁶ U la ailad ïa phi ban ïohsngew ïa ka ktien jong u na bneng khnang ba u lah ban hikai ïa phi; bad hangne ha pyrthei u la ailad ba phin ïohi ïa ka ding kaba kyntang jong u, bad u la kren ha phi na ka.

³⁷ Namar ka jingieit ïa ki kpa tymmen jong phi, u la jied ïa phi, bad da ka borbah jong u, u hi da lade u la wan ïalam ïa phi na Ijipt.

³⁸ Katba nang ïaid sha khmat, u la beh noh ïa ki jaitbynriew kiba kham khraw bad kham khlaiñ ban ïa phi, khnang ba un buh ïa phi ha ka ri jong ki, bad ai ïa ka ha phi kum ka jingïohkynti jong phi.

³⁹ Namar kata, kynmaw ïa kane ka sngi, bad wat klet ïa ka lano lano: U Trai u long U Blei ha bneng bad ha pyrthei. Ym don blei da uwei pat.

⁴⁰ Kohnguh ïa ki hukum jong u baroh kiba nga la ai ha phi mynta ka sngi, khnang ba ma phi bad ki khun ki ksiew jong phi phin manbha. Phin ïaishong sah ha kata ka ri ïa kaba U Trai U Blei jong phi u la ai ha phi ba kan long ka nongkynti jong phi junom.”

Ki shnong jakarieh sha mihngi jong ka Jordan

⁴¹ Nangta u Moses u buh kyrpang lai tylli ki shnong sha mihngi na wah Jordan

⁴² sha kiba u briew u lah ban phet rieh bad lait im lada jia ba u kum pynïap ïa uno uno u briew u bym dei u nongshun jong u. U lah ban phet rieh sha kawei na kine ki shnong bad un ym shah pynïap.

⁴³ Ïa kiba na ka jait Reuben, ka don ka shnong Beser ha kawei ka madan kaba halor lum ha ka ri shyiap; ïa kiba na ka jait Gad, ka don ka Ramoth ha ri Gilead; bad ïa kiba na ka jait Manasseh, ka don ka Golan ha ri Bashan.

Ka jinglamphrang ïa ka jingai ïa ka Hukum U Blei

⁴⁴ U Moses u ai ïa ki hukum bad ki jinghikai jong U Blei ha ki Israel.

^45-46 Dei hadien ba ki la wan mih na Ijipt bad mynba ki don ha kata ka them kaba sha mihngi na ka wah Jordan, marpyrshah ïa ka shnong Bethpeor, ba u ai ha ki ïa kine ki hukum. Kane ka long ha ka hima u Sihon u syiem Amor, uba synshar ha ka shnong Heshbon. Mynba U Moses bad ki Israel ki la jop ïa u ynda ki la mih na Ijipt.

⁴⁷ Ki la ïohknieh ïa ka ri jong u bad ïa ka ri u Og u syiem Bashan, uwei pat u syiem Amor uba shong sha mihngi na ka wah Jordan.

⁴⁸ Kane ka ri ka ïar naduh ka shnong Aroer harud ka wah Arnon haduh u lum Seïon (Sirion) shaphang shatei, (kaba mut, u lum Hermon.)

⁴⁹ Kane ka kynthup ïa kata ka thain baroh kaba sha mihngi na ka wah Jordan haduh ka Duriaw Baïap kaba shaphang shathie, bad nangta haduh ka kjat lum Pisgah shaphang mihngi.