DEUTERONOMI 34 - Khasi CL Bible (BSI)

Ka jingïap u Moses

¹ U Moses u leit kiew na ri them Moab sha u Lum Nebo haduh kliar jong u Lum Pisgah shaphang mihngi na Jerikho, bad nangta U Trai u pyn-i ha u ïa kata ka ri baroh kawei: ka ri Gilead shaduh Dan kaba shaphang shatei;

² ka ri Naphtali baroh kawei; ki ri Ephraim bad Manasseh; ka ri Judah shaduh ka Duriaw Mediterranian shaphang sepngi;

³ ka bynta bashathie jong ka ri Judah; bad ka ri thor kaba ïar naduh Soar haduh Jerikho, ka shnong ki dieng Tlai.

⁴ Nangta U Trai u ong ha u Moses, “Kane ka long kata ka ri ba nga la kular ïa u Abraham, u Isaak, bad u Jakob ban ai ha ki khun ki ksiew jong ki. Nga la shah ïa me ban ïohi ïa ka, hynrei ngan ym shah ba men leit shata.”

⁵ Kumta u Moses, u shakri U Trai, u la ïap hangta ha ri Moab, kumba U Trai u la ong.

⁶ U Trai u la tep ïa u ha kawei ka them ha Moab, marpyrshah ka shnong Bethpeor, hynrei haduh kane ka sngi ruh ym don uba tip ïa ka jaka tep jong u.

⁷ U Moses u la dap shispah arphew snem ka rta mynba u ïap; ki khmat jong u kim pat byr-ïe, bad ka bor met jong u ruh kam pat duna.

⁸ Ki Israel ki ïambriew ïa u laiphew sngi hangta ha ri them Moab.

⁹ U Joshua u khun jong u Nun u long uba la pyndap da ka jingstad, naba u Moses u la thung ïa u ban long u nongshimti pateng. Ki Israel ki kohnguh ïa u Joshua bad ki sumar ïa ki hukum ba U Trai u la ai ha ki lyngba u Moses.

¹⁰ Ym pat ju don u nongïathuhlypa ha Israel uba kum u Moses; U Trai u ïakren bad u markhmat.

¹¹ Ym don uwei pat u nongïathuhlypa uba la leh ïa ki kambah bad ki kamphylla kum kito kiba U Trai u la phah ïa u Moses ban leh ha u syiem ka Ijipt, ha ki rangbah synshar jong u, bad ha ka ri hi baroh kawei.

¹² Ym don uwei pat u nongïathuhlypa uba la lah ban leh ïa kiei kiei kiba khraw bad kiba sngewtriem kum kiba u Moses u la leh ha khmat ki Israel baroh.