DEUTERONOMI 32 - Khasi CL Bible (BSI)

¹ “Ko ka bneng, shahshkor ïa ki ktien jong nga, bad ko ka pyrthei, sngap bha ïa kaei ba ngan kren.

² Ka jinghikai jong nga kan hap kum ki jingjaw slap, bad kan jreiñ ha khyndew kum ka umjer. Ki ktien jong nga kin hap kum u 'lap praw ha ki jingthung ba dang lung, kum u slap ñiup ñiup ha u phlang ba dang lung.

³ Ngan ïaroh ïa ka kyrteng U Trai, bad ki briew jong u kin pynbna ïa ka jingkhraw jong u.

⁴ “U Trai u long u nongïada bakhlaiñbor jong phi, ki lynti jong u ki long kiba janai, bad bahok; U Blei jong phi u long uba ïaineh bad uba shisha; u leh ïa kaba hok bad kaba beit.

⁵ Pynban phi, phi long kiba ïaid kdor, ki bym dei hok ban long ki briew jong u, ka jaitbynriew kaba pop bad kaba shukor.

⁶ Pleng da kumne mo phi siew kylliang ïa U Trai, a, phi ka jaitbynriew kaba bieit bad kaba anna? Hato um dei u kpa jong phi, uba la thaw ïa phi, uba la seng ïa phi kum kawei ka jaitbynriew?

⁷ “Pyrkhat ïa ki sngi kiba mynbarim, ïa ka por ba la leit noh, kylli na la ki kpa ban ïathuh ha phi aïu ka la jia, kylli na ki tymmen ban ïathuh ha phi ïa ka mynnor.

⁸ U Bahakhlieh Tam Eh u la bynta jaka ïa ki jaitbynriew; u la buh hangno ki briew kin shong. U la ai uwei u blei ïa kawei kawei ka jaitbynriew,

⁹ hynrei ïa ki khun ki ksiew u Jakob u la jied na ka bynta ïa lade.

¹⁰ “U lap ïa ki ha ka ri shyiap ba ki ïaid sakma, ka ri shyiap kaba kynjah. Ïa ki u sumar bad u ker u da, kumba u ïada ïa lade.

¹¹ Kumba ka pukni ka hikai her ïa la ki khun, bad ka pyiar la ki thapniang ban kyrshan ïa ki, kumta ruh U Trai u kyrshan ïa ki Israel ba kin ym hap.

¹² U Trai da lade hi u ïalam ïa la ki briew, ym don u blei nongwei uba ïarap ïa u.

¹³ “U ai ba kin synshar ïa ki ri lum, bad ki bam ïa ki jingmih na ki lyngkha. Hapdeng ki mawsiang ki lap ïa ka ngap; ki diengsoh Olib jong ki, ki san ki plung ha ki jaka maw.

¹⁴ Ki masi bad ki blang jong ki, ki ai kyrhai ka dud, ki la don ki langbrot, ki blang, bad ki masi ruh kiba da kynsai, u kew uba kynsai tam bad ka waiñ kaba bang tam.

¹⁵ “Ki briew U Trai ki la riewspah, hynrei kiba ïaleh pyrshah; ki la sngaid bad ki la dap bha da ka jingbam. Te ki la iehnoh ïa U Blei uba la thaw ïa ki, bad ki la kyntait ïa u nongpynim bakhrawbor jong ki.

¹⁶ Ka jingmane bleithaw jong ki ka pynlong ïa U Trai ban ym lah shah, ki kam bymman jong ki, ki la pynlong ïa u ban bitar.

¹⁷ Ki kñia ha ki blei ki bym dei shisha ki blei, ha ki blei thymmai kiba ki kpa tymmen jong ki kim ju tip, ki blei kiba ki Israel kim ju kohnguh.

¹⁸ Ki la klet ïa la U Blei, u nongpynim bakhrawbor jong ki, uta uba la ai ha ki ka jingim.

¹⁹ “Haba U Trai u la ïohi ïa kata, u bitar da shisha, bad u kyntait ïa la ki khun shynrang bad kynthei.

²⁰ ‘Ngan ym ïarap shuh ïa ki,’ u ong; ‘bad ngan peit kai kumno kan jia ïa ki. Kine ki dei ki briew kiba mutlop, kiba ym don ka jingïaineh.

²¹ Da la ki bleithaw ïa nga ki pynbitar, ïa ki blei jong ki, ki bym dei shisha ki blei, ngam lah shah. Kumta ngan pyndonkam da kito ki bym dei ka jaitbynriew ban pynbitar ïa ki, ngan kynshoit ruh ïa ki da ka jaitbynriew kaba bieit katba kin ym lah shah.

²² Ka jingbitar jong nga kan meh lep kum ka ding, bad kan thang duh katba don ha sla pyrthei. Kan pur de shaduh ñiamra, bad kan thang ïa ki tynrai jong ki lumbah.

²³ “ ‘Ha ki ngan pynngat ïa ki jingpynjot bymkut shuh, ngan siat lut la ki khnam ha ki.

²⁴ Kin ïap na ka jingthngan bad ka jingpang shit; kin ïap na ki jingpang kiba ishyrkhei. Te ngan phah ki mradkhlaw ban kynrup ïa ki, bad ki bseiñ kiba don bih ban puh ïa ki.

²⁵ Ka thma kan wallam ka jingïap ha ki lynti, ka jingshyrkhei kan lynshop ha ki ïing. Ki rangsamla bad ki theisamla kin ïap; yn ym map ïa ki khunlung ne ïa ki tymmen ruh.

²⁶ Ngan jin da la pynjot thiaw ïa ki, khnang ban ym don ba kynmaw shuh ïa ki.

²⁷ Hynrei ngan ym shah ïa ki nongshun jong ki ban kren kob ba ki dei ma ki kiba la pynjot ïa ki briew jong nga, haba dei ma nga hi uba la khñiot ïa ki.’

²⁸ “Ki Israel ki long ka jaitbynriew ka bym don ka bor sngewthuh; kim don satia ka jingstad.

²⁹ Kim lah sngewthuh balei ba ki la shahjop; kim lah shemphang ïa kaba la jia.

³⁰ Balei ba shihajar kin shahjop tang ha uwei, bad shiphew hajar pat tang ha ki ar ngut? U Trai U Blei jong ki u la iehnoh ïa ki, bad U Blei badonbor jong ki u la kyntait noh ïa ki?

³¹ Ki nongshun jong ki, ki tip ba ki blei jong ki, ki tlot, kim long kiba donbor kum U Blei ki Israel.

³² Ki nongshun jong ki, kiba jyrsieh kum ka Sodom bad ka Gomorrah, ki long kum ki dieng sohwaiñ kiba sei ki soh kiba kthang bad don bih,

³³ kiba ka waiñ na ki ka long kum ka bih bseiñ.

³⁴ “U Trai u kynmaw aïu ki nongshun jong ki, ki la leh; u ap ïa ka por kaba biang ban pynshitom ïa ki.

³⁵ U Trai un pynhiarkput bad pynshitom ïa ki; ka por kan poi haba kin kyllon; ka sngi ka jingjot jong ki ka la jan.

³⁶ U Trai un pyllait im ïa la ki briew haba u ïohi ba kim donbor shuh. Un isynei ïa kito kiba shakri ïa u haba u ïohi ba kim lah leh ei ei shuh.

³⁷ Te U Trai un ong ha la ki briew, ‘Shaei kito ki blei khrawbor ha kiba phi shaniah?

³⁸ Phi la bsa ïa ki da ka khleiñ na ki jingkñia jong phi, bad phi la ai waiñ de ïa ki ban dih. Ai ba kin wan mynta bad ïarap ïa phi, ai ba kin wan kloi ban pyllait im ïa phi.

³⁹ “ ‘Nga, bad tang ma nga hi, nga long U Blei; ym don uwei pat u blei uba shisha. Nga pynïap bad nga ai jingim, nga pynmong bad nga pynkoit, bad ym don uba lah ban ïaleh pyrshah ïa kaei ba nga leh.

⁴⁰ Kumba nga long U Blei uba im, nga rah la ka kti bad nga smai,

⁴¹ ba ngan shut pynnep ïa ka waitlam kaba phalang jong nga, bad ai ïa ka jingbishar bahok, ngan pynhiarkput ïa ki nongshun jong nga bad pynshitom ïa kito kiba isih ïa nga.

⁴² Ki khnam jong nga kin jreiñ da ka snam jong ki, bad ka waitlam jong nga kan pynïap lut ïa kiba pyrshah ïa nga. Ïa uno uno uba ïaleh pyrshah ïa nga ngan ym map; wat ki koidi bad kito kiba mynsaw ruh kin ïap.’

⁴³ “Phi ki jaitbynriew, ïaroh ïa ki briew U Trai; naba u pynshitom ïa kito baroh kiba pynïap ïa ki. U pynhiarkput ïa ki nongshun jong u, bad u map ïa ki pop jong ki briew jong u.”

⁴⁴ U Moses bad u Joshua u khun jong u Nun ki ïathuh ïa ki ktien jong kane ka jingrwai, ba ki Israel kin ïohsngew ïa ka.

Ki jingbthah kiba khatduh jong u Moses

⁴⁵ Ynda u Moses u la dep ai ïa ki jinghikai U Blei ha u paidbah,

⁴⁶ u ong, “Sumar bha ban kohnguh ïa kine ki hukum baroh kiba nga la ai ha phi mynta ka sngi. Ïathuh ïa ki ha ki khun ki kti jong phi, ba ki ruh kin ïai kohnguh ïa baroh ki jinghikai jong U Blei.

⁴⁷ Kine ki jinghikai kim long ki ktien thylli; ki long ka jingim jong phi hi. Kohnguh ïa ki, te phin sa im slem ha kata ka ri sha shiliang ka Jordan ïa kaba phin sa ïohkynti.”

⁴⁸ Ha kata kajuh ka sngi, U Trai u ong ha u Moses,

⁴⁹ “Khie leit sha ki Lum Abarim kiba ha ka ri Moab marpyrshah ïa ka shnong Jerikho; kiew ïa u Lum Nebo bad khmih ïa ka ri Kanaan ïa kaba ngan ai ha ki paid Israel.

⁵⁰ Men sa ïap halor uta u lum kumba u Aaron u hynmen jong me u la ïap ha u Lum Hor,

⁵¹ namar baroh ar ngut phi la leh palat ïa nga ha khmat ki Israel. Mynba phi ïadon ha ki um Meribah, hajan ka shnong Kadesh, ha ka ri khlaw Sin, phi la pynjahburom ïa nga ha khmat u paidbah.

⁵² Men shu khmih ïa kata ka ri na jngai, ka ri ba nga ai ha ki Israel, hynrei men ym ïoh leit rung shata.”