DEUTERONOMI 31 - Khasi CL Bible (BSI)

U Joshua u wan long u nongmih bujli ïa u Moses

¹ U Moses u bteng ïa la ka jingkren ha ki paid Israel,

² bad u ong, “Mynta nga la dap shispah arphew snem bad ngam lah shuh ban long u nongïalam jong phi. Nalorkata, U Trai u la ïathuh ha nga ba ngan ym ïoh ban jam ïa ka wah Jordan.

³ U Trai U Blei jong phi hi un leit ha shuwa jong phi bad un pynjot ïa ki jaitbynriew kiba shong hangta, khnang ba phin ïohkynti ïa ka ri jong ki; bad u Joshua un long u nongïalam jong phi, kumba U Trai u la ong.

⁴ U Trai un pynjot ïa kita ki jaitbynriew kumba u la leh ïa u Sihon bad u Og, ki syiem Amor, bad kumba u la pynjot ïa ka ri jong ki.

⁵ U Trai un ïa ha phi ka jingjop halor jong ki bad phin leh ïa ki kumba nga la hukum ïa phi.

⁶ To long kiba kut jingmut bad sngewskhem bha. Wat sheptieng ïa ki. U Trai U Blei jong phi hi un don ryngkat bad phi. Un ym ieh ïa phi lane kyntait ïa phi.”

⁷ Nangta u Moses u khot ïa u Joshua, bad hangta ha khmat ki Israel u ong ha u, “To long uba kut jingmut bad sngewskhem bha, namar me long uta u ban ïalam ïa kine ki briew bad pynïoh kynti ha ki ïa kata ka ri ba U Trai u la kular ha ki kpa tymmen jong ki.

⁸ U Trai hi un ïalam ïa me bad un don ryngkat bad me. Un ym ieh ïa me lane kyntait ïa me; kumta wat syier bad wat sheptieng.”

Ka Hukum kaba dei ban pule shisien man la ka hynñiew snem

⁹ Kumta u Moses u thoh ïa ka Hukum U Blei bad u ai ïa ka ha ki lyngdoh Lebi kiba khmih ïa ka Synduk ka Jutang U Trai, bad ha ki nongïalam jong ki Israel.

¹⁰ U hukum ïa ki, “Man kaba kut ka hynñiew snem, ynda poi ka snem ban pyllait noh ïa ki jingkit ram baroh, pule jam ïa kane ka hukum ha ka Jingkhawai Niam Ki Ïingtrep.

¹¹ Pule ïa ka ha ki paid Israel haba ki wan ban mane ïa U Trai U Blei jong ki ha kata ka jaka mane Blei.

¹² Khot lang ïa ki shynrang, ïa ki kynthei, bad ïa ki khynnah baroh, bad ïa ki nongwei ruh kiba shong ha ki shnong jong phi, khnang ba uwei pa uwei un ïohsngew ïa ka bad un nang ban burom ïa U Trai U Blei jong phi bad kohnguh ïa ki jinghikai jong U.

¹³ Ha kane ka rukom ki khun ki ksiew jong phi ki bym pat ju ïohsngew ïa ka Aiñ U Trai U Blei jong phi kin ïohsngew ïa ka. Te kin sa nang ban kohnguh ïa u katba ki dang im ha kata ka ri kaba phin ïohkynti ha shiliang ka Jordan.”

Ka jingbthah bakhatduh jong U Trai ïa u Moses

¹⁴ Nangta U Trai u ong ha u Moses, “Me te, men ym im slem shuh. Khot ïa u Joshua bad wan ïalam ïa u sha ka Ïingjaiñ khnang ba ngan ai hukum ïa u.”

¹⁵ U Moses bad u Joshua ki la leit sha ka Ïingjaiñ bad U Trai u wanpaw ha ki hangta ha u rishot lyoh uba ïeng ha ka jingkhang ka Ïingjaiñ.

¹⁶ U Trai u ong ha u Moses, “Shen men sa ïap noh, bad ynda me ïap u paidbah un sa phai noh na nga bad pynkheiñ ïa ka jutang kaba nga la pynlong bad ki. Kin kyntait ïa nga bad mane ïa ki blei thala jong kata ka ri sha kaba kin sa leit rung.

¹⁷ Te ngan bitar lep ïa ki; ngan kyntait bad pynjot thiaw ïa ki. Shibun ki jingjynjar kiba sngewshyrkhei kin wan ngat ha ki, ba kumta kin sa sngewthuh ba kita kiei kiei ki wan jia ha ki namar ba nga, U Blei jong ki, ngan ym don ryngkat shuh bad ki.

¹⁸ Te ngan kyntait ban ïarap ïa ki namar ba ki la leh bymman bad mane ïa kiwei pat ki blei.

¹⁹ “Mynta, thoh ïa kane ka jingrwai. Hikai ïa ka ha ki Israel, khnang ba ka kan ïeng kum ka sakhi pyrshah ïa ki.

²⁰ Ngan ïalam ïa ki sha kata ka ri kaba tuid da ka dud bad ka ngap, kumba nga la kular ïa ki kpa tymmen jong ki. Hangta kin ïoh bam katba ki kwah, bad kin im pahuh pahai. Hynrei kin phai noh sha kiwei pat ki blei bad kin mane ïa ki. Kin sa kyntait ïa nga bad pynkheiñ ïa ka jutang jong nga,

²¹ bad shibun ki jingjynjar kiba ishyrkhei kin wan ngat ha ki. Hynrei ïa kane ka jingrwai yn dang ïai rwai, bad ka kan ïeng kum ka sakhi pyrshah ïa ki. Wat mynta hi, shuwa ba ngan ïalam ïa ki sha kata ka ri ba nga la kular ban ai ha ki, nga tip aïu ki pyrkhat.”

²² Ha kata hi ka sngi, u Moses u thoh ïa kata ka jingrwai bad u hikai ïa ka ha ki paid Israel.

²³ Nangta U Trai u kren ha u Joshua u khun jong u Nun, bad u ong ha u, “Long uba sngewskhem bha bad uba kut jingmut, namar me men ïalam ïa ki Israel sha kata ka ri ba nga la kular ban ai ha ki, bad ngan don ryngkat bad me.”

²⁴ U Moses u thoh lut ïa ka Aiñ U Blei ha ka kitab, khlem da ieh kawei ruh ka ktien.

²⁵ Ynda u la dep, u ong ha ki lyngdoh Lebi kiba khmih ïa ka Synduk ka Jutang U Trai,

²⁶ “Shim ïa kane ka kitab ka Aiñ U Blei bad buh ïa ka ha syndah ka Synduk ka Jutang U Trai U Blei jong phi, ba kan don hangta kum ka sakhi pyrshah ïa ki briew jong u.

²⁷ Nga tip haduh katno phi long kiba mutlop bad kiba ïaleh pyrshah. Phi la ïaleh pyrshah ïa U Trai mynba nga dang im, bad ynda nga la ïap lei lei, phin nang kham ïaleh pyrshah ïa u.

²⁸ Lumlang ïa ki nongïalam baroh na ki jait jong phi bad ïa ki rangbah synshar jong phi, ba ngan ïathuh ha ki ïa kine kiei kiei; ngan khot ïa ka bneng bad ka khyndew ba kin long ki sakhi jong nga pyrshah ïa ki.

²⁹ Nga tip ba hadien ka jingïap jong nga, phin sa leh ïa ki kam bymman bad kyntait ïa kaba nga la hikai ïa phi. Bad ha ki sngi ki ban wan ka jingjynjar kan ngat ha phi, namar ba phin pynbitar ïa U Trai da kaba phi leh ïa kata kaba u la adong.”

Ka jingrwai u Moses

³⁰ Nangta u Moses u ïathuh ïa ki ktien jong kane ka jingrwai baroh kawei katba ki paid Israel baroh ki shahshkor.