DEUTERONOMI 30 - Khasi CL Bible (BSI)

Ki kyndon na ka bynta ka jingwanphai bad ka jingkyrkhu

¹ “Mynta nga la ai ba phin jied napdeng ka jingkyrkhu bad ka jingtim. Ynda kine kiei kiei baroh ki la wan jia ha phi, bad phi shong hapdeng ki jaitbynriew sha kiba U Trai U Blei jong phi u la pynsakma ïa phi, phin sa kynmaw ïa ka jingjied ba nga la ai ha phi.

² Lada ma phi bad ki khun ki ksiew jong phi phin phai pat sha U Trai, bad kohnguh da ka dohnud jong phi baroh, bad da ka mynsiem jong phi baroh ïa ki hukum jong u kiba nga ai ha phi mynta ka sngi,

³ U Trai U Blei jong phi un leh-isynei ïa phi. Un wan ïalam pat ïa phi napdeng kita ki jaitbynriew sha kiba u la pynsakma ïa phi, bad un pynbha pat ïa phi.

⁴ Wat la phi la sakma kylleng sawdong ka pyrthei ruh, U Trai U Blei jong phi un lumlang bad wan ïalam pat ïa phi,

⁵ khnang ba phin ïoh kam kynti biang ïa kata ka ri ha kaba ki kpa tymmen jong phi ki la shong shisien. Un pynmanbha bad un pynroi ïa phi kham bun shah ban ïa kaba u la leh ïa ki kpa tymmen jong phi.

⁶ U Trai U Blei jong phi un pynlong ïa phi kiba kohnguh hukum, khnang ba phin ieit ïa u da ka dohnud jong phi baroh bad da ka mynsiem jong phi baroh, bad ba phin ïaishong ha kata ka ri.

⁷ Un pynngat kylla ïa kine ki jingtim baroh ha ki nongshun jong phi, kiba isih bad banbeiñ ïa phi,

⁸ bad phin kohnguh biang ïa u bad sumar ïa ki hukum jong u baroh kiba nga ai ha phi mynta ka sngi.

⁹ U Trai un pynroi kyrhai ïa phi kat ha kaba phi leh; phin ïoh kyrhai ki khun ki kti bad kyrhai ki jingri, bad ki lyngkha jong phi ruh kin pynmih kyrhai. Un da sngewbha eh ban pynmanbha ïa phi kumba u la sngewbha ban pynmanbha ïa ki kpa tymmen jong phi;

¹⁰ hynrei phi dei ban kohnguh ïa u bad sumar ïa ki aiñ jong u baroh ïa kiba la thoh ha kane ka kitab jong ki jinghikai jong u. Phi dei ban phai sha u da ka dohnud bad ka mynsiem jong phi baroh.

¹¹ “Ka hukum ba nga ai ha phi mynta ka sngi kam dei kaba eh ban sngewthuh lane kaba sha palat ka bor jong phi.

¹² Kam don hangtei ha sahit bneng. Phim donkam ban da ong, ‘Uei keiñ u ban leit kiew shatei bad wallam ïa ka shane sha ngi, khnang ba ngi lah ban ïohsngew bad kohnguh ïa ka?’

¹³ Kam don ruh ha shiliang duriaw. Phim donkam ban da kylli, ‘Uei keiñ u ban leit sha shiliang duriaw bad wallam ïa ka sha ngi, khnang ba ngi lah ban ïohsngew bad kohnguh ïa ka?’

¹⁴ Em, ka don hangne bad phi. Phi tip ïa ka bad phi lah ban sot ïa ka; kumta mynta, kohnguh ïa ka.

¹⁵ “Mynta ka sngi nga ai ba phin jied napdeng kaba bha bad kaba sniew, napdeng ka jingim bad ka jingïap.

¹⁶ Lada phi kohnguh ïa ki hukum U Trai U Blei jong phi ïa kiba nga ai ha phi mynta ka sngi, lada phi ieit ïa u, lada phi kohnguh ïa u, bad lada phi sumar ïa ki aiñ jong u, phin manbha bad phin long ruh ka jaitbynriew kaba bun paid. U Trai U Blei jong phi un kyrkhu ïa phi ha kata ka ri ba phin ïohkynti.

¹⁷ Hynrei lada phim kohnguh bad phi kyntait ban shahshkor, bad phi shah ïalam bakla ban mane ïa kiwei pat ki blei,

¹⁸ yn pynjot thiaw ïa phi — nga maham ïa phi hangne mynta. Phin ym im slem ha kata ka ri kaba phin ïohkynti ha shiliang ka Jordan.

¹⁹ Nga ai ha phi mynta ban jied napdeng ka jingim bad ka jingïap, napdeng ka jingkyrkhu U Blei bad ka jingtim U Blei, bad nga khot ïa ka bneng bad ka pyrthei ban sakhi ïano phi jied. Jied ïa ka jingim.

²⁰ To ieit ïa U Trai U Blei jong phi, kohnguh bad ïaineh ha u; te ma phi bad ki khun ki ksiew jong phi phin im slem ha kata ka ri ba u la kular ban ai ha ki kpa tymmen jong phi, u Abraham, u Isaak, bad u Jakob.”