DEUTERONOMI 3 - Khasi CL Bible (BSI)

Ki Israel ki jop ïa u syiem Og

¹ “Hadien kata, ngi la ïaleit shaphang shatei sha ka thain Bashan, bad u Og u Syiem jong ka u la wan ryngkat bad la ki rangïapom ban ïaleh ïa ngi hajan ka shnong Edrei.

² Hynrei U Trai u ong ha nga, ‘Wat tieng ïa u. Ngan aiti ïa u, ïa ki briew jong u, bad ïa ka ri jong u baroh ha phi. Leh ïa u kumba phi la leh ïa u Sihon u syiem Amor uba synshar ha Heshbon.’

³ “Kumta U Trai u aiti ïa u Syiem Og bad ïa ki briew jong u baroh ha ka bor jong ngi, bad ngi pynïap lut ïa ki baroh.

⁴ Ha kajuh ka por ruh ngi ïohknieh ïa ki shnong jong u baroh — ym don kawei ruh kaba lait; baroh kita ki shnong ki long hynriewphew tylli — ïa ka thain Argob baroh kawei ha kaba u Og u Syiem Bashan u synshar.

⁵ Kine ki shnong baroh ki long kiba la kerkut skhem da ki kynroh kiba jrong, ki khyrdop, bad ki nar-khang khyrdop, bad don ruh bun ki shnong ki bym don kynroh.

⁶ Ngi la pynjot ïa ki shnong baroh bad ngi la pynïap lut ruh ïa ki shynrang, ki kynthei, bad ki khynnah, kumba ngi la leh ha ki shnong jong u Sihon u Syiem Heshbon.

⁷ Ngi rah noh ïa ki jingri, bad ki jinglute na ki shnong jong ki.

⁸ “Ha kata ka por, ngi la ïohknieh na kita ki ar ngut ki syiem Amor ïa ka ri kaba sha mihngi na ka wah Jordan, naduh ka wah Arnon haduh u lum Hermon.

⁹ (Ïa u lum Hermon la khot Sirion da ki nong Sidon, bad Senir da ki Amor)

¹⁰ Ngi la ïohknieh ïa ka ri u Og u Syiem Bashan baroh kawei: ïa ki nongbah baroh ha ka madan lum, ïa ki ri Gilead bad Bashan, haduh ki shnong Salekah bad Edrei shaphang mihngi.”

¹¹ (U Og u long u syiem uba khatduh na ki Rephaim. Ka jingthiah jong u, kaba la shna da u nar, ka long saw mitar ka lynter bad ar mitar ka pyngkiang, kat kum ka jingthew ba dei rukom. Dang lah ban ïohi ïa ka ha ka nongbah Rabbah jong ki Ammon.)

Ki jait kiba shong sha mihngi na Jordan

¹² “Ynda ngi la kam kynti ïa kata ka ri, nga ai ha ki jait Reuben bad ki jait Gad ïa ka jaka kaba shatei na ka shnong Aroer hajan ka wah Arnon bad shiteng na ka ri lum Gilead lem bad ki shnong jong ka.

¹³ Ha ki shiteng na ka jait Manasseh, nga ai ïa kaba sah na ka ri Gilead bad ïa ka Bashan baroh kawei, ha kaba u Og u synshar, kaba mut ïa ka thain Argob baroh kawei.” (Ïa ka Bashan la tip kum ka ri jong ki Rephaim.

¹⁴ U Jair, uba na ka jait Manasseh, u la kam kynti ïa ka thain Argob baroh kawei, kata ka mut ïa ka Bashan, haduh u pud jong ka Geshur bad ka Maakah. U khot ïa kine ki shnong da ka kyrteng la jong, bad haduh mynta la dang tip ïa ki kum ki shnong u Jair.)

¹⁵ “Nga ai ïa ka Gilead ha ki Makhir kiba na ka jait Manasseh.

¹⁶ Ha ki jait Reuben bad ki jait Gad nga ai ïa kata ka ri kaba naduh Gilead haduh ka wah Arnon. U pud uba shaphang shathie u long napdeng jong kata ka wah, bad u pud uba shaphang shatei pat u long ka wah Jabbok; kaba shi bynta na kata ka pynlong ruh ïa u pud ki Ammon.

¹⁷ Shaphang sepngi, ka ri jong ki ka poi haduh wah Jordan, naduh ka pung Galilaïa shaphang shatei, arsut haduh ka Duriaw Baïap shaphang shathie, bad nangta shaduh ka kjat lum Pisgah shaphang mihngi.

¹⁸ “Nangta nga ai ruh ha ki ïa kine ki jingbthah: ‘U Trai U Blei jong ngi u la ai ïa kane ka ri kaba sha mihngi na Jordan ba phin ïohkynti ïa ka. Mynta pat, pynkieng atiar ïa ki rangïapom jong phi bad phah ïa ki sha shiliang ka Jordan ha shuwa kiwei pat ki jait Israel ban ïarap ïa ki ban ïohkynti ïa ka bynta jong ki de.

¹⁹ Tangba ïa ki tnga jong phi, ki khun ki kti jong phi, bad ki jingri jong phi — nga tip ba phi don bun ki jingri — phin iehnoh ha kita ki shnong ba nga la ai ha phi.

²⁰ Ïarap lem ïa la ki para Israel haduh ba kin da ïohkynti ïa kata ka ri ba U Trai u ai ha ki sha sepngi na Jordan bad haduh ba U Trai un shah ba kin im suk im saiñ hangta, kumba u la leh ïa phi hangne. Hadien kata, phi lah ban wan phai sha kane ka ri ïa kaba nga la ai ha phi.

²¹ “Nangta nga ong ha u Joshua, ‘Me la ïohi ïa kata baroh kaba U Trai U Blei jong me u la leh ïa kito ki ar ngut ki syiem, u Sihon bad u Og; un leh kumjuh ïa kita baroh ïa kiba men dang hiarthma ha ka ri jong ki.

²² Wat tieng ïa ki, namar U Trai U Blei jong me un ïaleh na ka bynta jong me.’ ”

Ïa u Moses ym shym la shah ban rung sha ka Ri Kanaan

²³ “Ha kata ka por nga kyrpad jur,

²⁴ ‘Ko Trai Nongsynshar, me la pyn-i ha la u shakri dang tang ïa kaba sdang jong ki kam kiba khraw bad kiba phylla jong me. Ym don blei ha bneng ne ha khyndew uba lah ban leh ïa ki kam kiba khraw kiba me, me la leh!

²⁵ Shah ïa nga, A Trai, ban jam ïa ka wah Jordan bad ïohi ïa kata ka ri kaba seisoh shatai sha shiliang, ka ri lum kaba itynnat, bad ki lum Lebanon.’

²⁶ “Hynrei U Trai u la bitar ïa nga namar jong phi bad um shahshkor shuh ïa nga. U ong pynban, ‘Ka la biang katta! Wat kren ei ei shuh shaphang kata!

²⁷ Khie leit sha kliar u Lum Pisgah, bad peit baroh sawdong, shatei, shathie, sha mihngi, bad sha sepngi. Peit bha ïa kaei kaba me ïohi, namar lano lano ruh men ym ïoh leit sha shiliang ka Jordan.

²⁸ Hukum ïa u Joshua, bad pynshlur ïa u, naba un ïalam ïa u paidbah shatai sha shiliang ban ïohkynti ïa kata ka ri kaba me ïohi.’

²⁹ “Kumta ngi ïashong sah ha kata ka them kaba marpyrshah ka Bethpeor.”