DEUTERONOMI 29 - Khasi CL Bible (BSI)

Ka jutang jong U Trai bad ki Israel ha ka ri ki Moab

¹ Kine ki long ki ktien jong kata ka jutang ba U Trai u la hukum ïa u Moses ban pynlong bad ki Israel ha ka ri ki Moab; kane baroh ka la long ka jingbynrap shuh shuh halor kata ka jutang kaba U Trai u la pynlong bad ki ha u Lum Sinai.

² U Moses u khot lang ïa ki Israel baroh, bad u ong ha ki, “Phi la ïohi da lade hi aïu U Trai u la leh ïa u Pharaoh ha Ijipt, ïa ki rangbah synshar jong u, bad ïa ka ri jong u baroh kawei.

³ Phi la ïohi ïa ki khlam kiba ishyrkhei, ïa ki kambah bad ki kamphylla kiba khraw ba U Trai u la leh.

⁴ Hynrei haduh kane ka sngi um pat shym la ai ha phi ban shemphang ïa kaei kaba phi la mad.

⁵ Sawphew snem U Trai u la ïalam ïa phi lyngba ka ri shyiap, hynrei ki jaiñkup jong phi kim shym man rim, bad ki juti jong phi kim shym jot.

⁶ Phim shym ïoh kpu ban bam, bad phim shym ïoh waiñ lane kyiad ban dih, hynrei U Trai u pyndap ïa ki jingdonkam jong phi khnang ba phin tip ba u long U Blei jong phi.

⁷ Bad ynda ngi la poi ha kane ka jaka, U Sihon u syiem Heshbon bad u Og u Syiem Bashan ki la wan ban ïaleh pyrshah ïa ngi.

⁸ Hynrei ngi la jop ïa ki, ngi knieh ïa ka ri jong ki, bad ngi pynbynta ïa ka hapdeng ki jait Reuben bad ki jait Gad, bad ha ki shiteng na ka jait Manasseh.

⁹ Namar kata, kohnguh hok ïa ki ktien baroh ba la thoh ha kane ka jutang khnang ba phin manbha ha ki jingtrei jingktah jong phi baroh.

¹⁰ “Mynta ka sngi phi ïa-ïeng lang baroh ha khmat U Trai U Blei jong phi — ki nongïalam, ki rangbah synshar jong phi, ki shynrang,

¹¹ ki kynthei bad ki khynnah jong phi, ki nongwei kiba shong bad phi, bad kito kiba long ki nongthoh dieng bad ki nongtong um ïa phi,

¹² ba phin ïohrung ha kata ka jutang kaba U Trai U Blei jong phi u pynlong bad phi bad ban pdiang ïa ki ktien ba la thoh ha ka,

¹³ khnang ba U Trai un pynskhem ïa phi mynta kum ki briew jong u bad ba un long U Blei jong phi, kumba u la kular ïa phi bad ïa ki kpa tymmen jong phi, u Abraham, u Isaak, bad u Jakob.

¹⁴ Ym dei tang bad phi ba U Trai u pynlong ïa kane ka jutang bad ki jingdawa baroh kiba don ha ka.

¹⁵ U pynlong ïa ka bad ngi baroh kiba ïeng hangne ha khmat jong u mynta ka sngi lem bad ki khun ki ksiew jong ngi ki ban dang kha.

¹⁶ “Phi kynmaw kumno ngi la im ha Ijipt bad kumno ka la jia bad ngi haba ngi ïaid lynti na ka ri jong kiwei pat ki jaitbynriew.

¹⁷ Phi la ïohi ïa ki bleithaw kiba isaitmet jong ki, kiba da u dieng, da u maw, da ka rupa, bad da ka ksiar.

¹⁸ Pynthikna ba yn ym don napdeng jong phi u shynrang, lane ka kynthei, lane ka longïing, lane ka jait, ki ban phai noh na U Trai U Blei jong phi ban mane ïa ki blei jong kiwei pat ki jaitbynriew. Kum uta, un long kum u thied uba pynmih u soh uba kthang bad uba don bih.

¹⁹ Pynthikna ba yn ym don hangne mynta ka sngi uba ïohsngew ïa ki ktien jong kane ka jutang, pynban uba pynngeit ïa lade ba kaei kaei kan ym jia ïa u wat la u ïaid mon da ka dohnud kaba mutlop. Ka jingmih na kata kan long ba phi baroh phin jot thiaw, kiba bha bad kiba sniew kumjuh.

²⁰ U Trai un ym map kum ïa uta u briew. Hynrei ka jingbitar shla jong u kan meh lep pyrshah ïa u, bad ki jingjynjar baroh ïa kiba la thoh ha kane ka kitab kin ngat ha u haduh ba U Trai un da pynjot thiaw ïa u.

²¹ U Trai un pynlong ïa u ka nuksa hapdeng ki jait Israel baroh, bad un wallam ki jingpynjot halor jong u kat kum kita ki jingtim ba la jer ha ka jutang ïa kaba la thoh ha kane ka kitab jong ki jinghikai U Trai.

²² “Ha ki pateng ki ban wan, ki khun ki ksiew jong phi bad ki nongwei na ki ri kiba jngai kin ïohi ïa ki jingpynjot bad ki jingshah shitom ba U Trai u la pynngat ha ka ri jong phi.

²³ Ki lyngkha kin long shrah bad kin ym seisoh shuh, naba kin dap da u kyndok bad ka mluh suda; yn ym thung ei ei hangta, bad wat u ñiut ruh, un ym mih hangta. Ka ri jong phi kan long kum ki shnong Sodom bad Gomorrah, kum ka Admah bad ka Seboiim, ïa kiba U Trai u la pynjot mynba u bitar shla.

²⁴ Te ka pyrthei baroh kawei kan sa kylli, ‘Balei keiñ U Trai u la leh haduh katne ïa ka ri jong ki? Na ka daw aïu mo ba u bitar shla haduh katne?’

²⁵ Bad ka jubab kan long, ‘Dei namar ba ki la pynkheiñ ïa ka jutang ba U Trai, U Blei jong ki kpa tymmen jong ki, u la pynlong bad ki mynba u wan ïalam ïa ki na Ijipt.

²⁶ Ki la shakri ïa kiwei pat ki blei ba kim ju mane mynno mynno, bad ïa kiba U Trai u la adong ïa ki ban mane.

²⁷ Kumta U Trai u la bitar lep ïa la ki briew bad u la pynngat ha ka ri jong ki ïa ki jingtim baroh ïa kiba la thoh ha kane ka kitab.

²⁸ U Trai u la bitar shla, bad ha kata ka jingbitar, u rat dyngkhong ïa ki na ka ri jong ki bad u bret ïa ki sha ka ri nongwei, bad hangta ki dang don haduh mynta.’

²⁹ “Don kiei kiei kiba U Trai U Blei jong ngi u dang buhrieh na ka jingtip u briew; hynrei u la pynpaw ïa ka Aiñ jong u, bad ma ngi lem bad ki khun ki ksiew jong ngi, ngi dei ban kohnguh ïa ka junom.