DEUTERONOMI 28 - Khasi CL Bible (BSI)

Ki jingkyrkhu kiba mih na ka jingkohnguh

¹ “Lada phi kohnguh ïa U Trai U Blei jong phi bad sumar hok ïa ki hukum jong u baroh ba nga la ai ha phi mynta ka sngi, un kyntiew ïa phi ha khlieh eh jong ki jaitbynriew baroh ha ka pyrthei.

² Kohnguh ïa U Trai U Blei jong phi, te kine ki jingkyrkhu baroh kin wan ha phi.

³ “U Trai un kyrkhu ïa ki shnong jong phi bad ïa ki lyngkha jong phi.

⁴ “U Trai un kyrkhu ba phin roi kyrhai ha ki khun ki kti, ba ki jingthung jong phi kin seisoh shibun, bad ba ki masi bad ki langbrot jong phi kin nang bun.

⁵ “U Trai un kyrkhu ïa u kew jong phi, bad ïa ka jingbam ba phi khreh da u.

⁶ “U Trai un kyrkhu ïa kaei kaei baroh kat kaba phi leh.

⁷ “U Trai un pynlong ïa ki nongshun jong phi ba kin shahjop haba ki wan ïaleh pyrshah ïa phi. Kin wan tur na kawei ka dong, hynrei kin sa her ïap na baroh ki dong.

⁸ “U Trai U Blei jong phi un kyrkhu ïa ka jingtrei jong phi bad un pyndap ïa ki thiar jong phi da u kew. Un kyrkhu ïa phi ha kata ka ri ba un ai ha phi.

⁹ “Lada phi kohnguh ïa U Trai U Blei jong phi bad leh kat ïa kaba u hukum, un pynlong ïa phi ki briew jong u hi, kumba u la kular.

¹⁰ Te ki jaitbynriew ka pyrthei kin ïohi ba U Trai u la jied ïa phi ban long ki briew jong u, bad kin sheptieng ïa phi.

¹¹ U Trai un ai ha phi kyrhai ki khun ki kti, kyrhai ki masi, bad kyrhai ki soh ha kata ka ri ba u la kular ha ki kpa tymmen jong phi ban ai ha phi.

¹² Un pynhap ïa u slap ha la ka aïom na ka ïing kynshew jong u ha bneng bad un kyrkhu ïa ka jingtrei jong phi baroh, ba phin ïoh ai kylliang ha kiba bun ki jaitbynriew, katba ma phi pat phin ym hap shim kylliang nano nano.

¹³ U Trai U Blei jong phi un pynlong ïa phi ki nongïalam napdeng ki jaitbynriew bad ym ki nongbud; phin ïai manbha bad phin ym kyrduh lada phi kohnguh ïa ki hukum jong u baroh kiba nga ai ha phi mynta ka sngi.

¹⁴ Hynrei phim bit ban kyntait ban kohnguh ïa ki ha kano kano ka rukom, lane mane bad shakri ïa kiwei pat ki blei.

Kiba mih na ka jingbymkohnguh

¹⁵ “Hynrei lada phim kohnguh ïa U Trai U Blei jong phi bad phim sumar hok ïa ki hukum bad ki aiñ baroh ba nga ai ha phi mynta ka sngi, kine ki jingtim baroh kin sa ngat ha phi.

¹⁶ “U Trai un tim ïa ki shnong bad ki lyngkha jong phi.

¹⁷ “U Trai un tim ïa u kew jong phi bad ïa ki jingbam ba phi khreh da u.

¹⁸ “U Trai un tim ïa phi da kaba pynduna ïa ki khun ki kti jong phi, da kaba pynduna ïa ka jingseisoh ki jingthung jong phi, bad da kaba pynduna ïa ki masi bad ki langbrot jong phi.

¹⁹ “U Trai un tim ïa kaei kaei baroh kat kaba phi leh.

²⁰ “Lada phi leh ïa kaba sniew bad kyntait ïa U Trai, un wallam ha phi ka jingpynjot, ka jingkulmar, bad ka jingjynjar ha kaei kaei baroh kaba phi leh, haduh ba phin da jot thiaw bad ïap syndon.

²¹ Un phah ha phi ïa ka jingpang kawei hadien kawei haduh ba yn ym don shuh uwei ruh na phi u ban lait im ha kata ka ri kaba phin sa ïohkynti.

²² U Trai un shoh ïa phi da ka jingkhrew, da ka khieshoh, da ka jingat thung, bad da ka jingshit kyr-ang; un phah ruh ïa ka jingryngkhiang, ki lyer khluit, ban pynjot ïa ki jingthung jong phi. Kine ki jingpynjot kin ïailong bad phi haduh ba phin da ïap.

²³ U slap un ym hap, bad ka khyndew kan kylla eh kum u nar.

²⁴ Ha ka jaka u slap, U Trai un pynkhie ka 'erïong pui pui bad ka 'erïong shyiap haduh ba phin da jot thiaw.

²⁵ “U Trai un shah ba ki nongshun kin jop ïa phi. Phin tur pyrshah ïa ki na kawei ka dong, hynrei phin sa her ïap na kiba bun ki dong, bad ki briew ka pyrthei kin sngewsheptieng haba ki ïohi aïu ka jia ïa phi.

²⁶ Ynda phi ïap, ki sim bad ki mrad kin bam ïa ki metïap jong phi, bad yn ym don ba leit beh ïa ki.

²⁷ U Trai un shoh ïa phi da ki tohjaw, kumba u la leh ïa ki nong Ijipt. Un pynlong ïa ka met jong phi ban dap da ka prum. Yn tap ïa phi da ka sarew, bad phin daitbuid, hynrei yn ym don jingpynkhiah.

²⁸ U Trai un pynlamwir ïa phi, un pynmatlah ïa phi, bad un pynshaïong ïa phi.

²⁹ Phin shu tare ruma mynsngi kum u matlah, bad phin ym lap lynti. Kat kaba phi leh kan pulom. Phin shah lehbeiñ bad shah lute man ka por, bad yn ym don ba ïarap ïa phi.

³⁰ “Phin ïatehktien bad ka samla — hynrei uwei pat un shongkurim ïa ka. Phin tei ïa ka ïing — hynrei phin ym ïoh shong ha ka. Phin thung ka bri sohwaiñ — hynrei phin ym ïoh bam ïa ki sohwaiñ.

³¹ Ïa ki masi jong phi yn pynïap ha khmat jong phi hi, hynrei phin ym ïoh bam ïa ka doh jong ki. Ïa ki kada jong phi yn rong jubor ha khmat jong phi hi, bad yn ym pynphai pat ïa ki sha phi. Ïa ki langbrot jong phi yn ai noh ha ki nongshun jong phi, bad yn ym don ba ïarap ïa phi.

³² Ïa ki khun shynrang bad ki khun kynthei jong phi yn ai noh kum ki mraw ha ki nongwei katba phi pat phi shu peit. Man ka sngi phin pynshitom sat ïa la ki khmat ba phi ap lehnoh-ei ïa la ki khun ba kin wan phai pat.

³³ Ki nongwei kin bam ei ïa ki jingmih na ki lyngkha jong phi ha kiba phi la trei shitom, katba phi pat phim ym ïoh ei ei lait tang ka jingshah banbeiñ bad ka jingshah lehbeiñ suda.

³⁴ Kine ki jingshah shitom kiba phi ïohi da la ki khmat kin pynlamwir ïa phi.

³⁵ U Trai un tap ïa ki kjat jong phi baroh da ki prum ki bym lah ban pynkhiah bad kiba tyrha; ki tohjaw kin tap ïa phi naduh khlieh haduh kjat.

³⁶ “U Trai un leit rah ïa phi bad ïa u syiem jong phi sha ka ri nongwei, ha kaba ma phi lane ki kpa tymmen jong phi kim pat ju poi; hangta phin shakri ïa ki blei kiba da u dieng bad da u maw.

³⁷ Ki briew ha ki ri sha kiba U Trai un pynsakma ïa phi, kin kyndit ïa kata kaba la jia ha phi; kin sa krenbeiñ bad rkhiebeiñ ïa phi.

³⁸ “Shibun u symbai phin bet ha lyngkha, hynrei tang khyndiat pat phin ïoh ot, namar ki puit kin bam ïa ki jingthung jong phi.

³⁹ Phin thung ki dieng sohwaiñ ha bri, bad phin sumar ïa ki, hynrei phin ym ïoh kheit ïa ki sohwaiñ lane dih waiñ na ki, namar ki khñiang kin bam ïa ki dieng sohwaiñ.

⁴⁰ Ki diengsoh Olib kin mih kyrhai ha ka ri jong phi, hynrei phin ym ïoh umphniang, naba ki soh Olib kin hap khlem por.

⁴¹ Phin ïoh ki khun shynrang bad kynthei, hynrei phin duh ïa ki, naba yn rong noh ïa ki kum ki koidi thma.

⁴² Ki khñiang kin bam duh ïa ki dieng bad ki jingthung jong phi baroh.

⁴³ “Ki nongwei kiba shong hapdeng jong phi kin nang kham ïohbor katba ma phi pat phin nang duh ïa la ka bor.

⁴⁴ Kin don ka spah ka phew kat ban ai kylliang ïa phi, hynrei phi pat phin ym don ei ei ban ai kylliang ïa ki. Ha kaba khatduh kin sa long ki nongsynshar jong phi.

⁴⁵ “Kine ki jingpynjot baroh kin sa ngat ha phi, bad kin bam bad lynshop ïa phi haduh ba phin da jot thiaw, namar ba phim kohnguh ïa U Trai U Blei jong phi bad phim sumar ïa ki hukum baroh ïa kiba u la ai ha phi.

⁴⁶ Kin long ka dak kaba sakhi ïa ka jingbishar U Blei ha phi bad ha ki khun ki ksiew jong phi junom.

⁴⁷ U Trai u la kyrkhu kyrhai ïa phi ha ki bynta baroh, hynrei phim shym shakri ïa u da ka dohnud kaba sngewbha bad kaba kmen.

⁴⁸ Kumta keiñ, phin hap ban shakri ïa ki nongshun ba U Trai un phah pyrshah ïa phi. Phin thngan, phin sliang, bad phin lyngkhuit — phin da kyrduh shisha khait. U Trai un pynshitom jur ïa phi haduh ba phin da jot thiaw.

⁴⁹ U Trai un phah ïa ka jaitbynriew na kaba kut ka pyrthei pyrshah ïa phi, ka jaitbynriew kaba ka ktien ka thylliej jong ka phin ym sngewthuh. Kin wan hiar kynsan ha phi kumba suh u pukni.

⁵⁰ Kin ym map lane leh-isynei ïano ïano, la ki dei ki samla ne ki tymmen.

⁵¹ Kin bam ïa ki jingri jingdup bad ïa ki jingthung jingtep jong phi, bad phin ïapthngan. Kin ym pynsah ei ei, ïa u kew, ka waiñ, ka umphniang Olib, ki masi, lane ki langbrot; bad phin ïap.

⁵² Kin tur pyrshah ïa ki shnong jong phi baroh ha kata ka ri ba U Trai U Blei jong phi u ai ha phi, bad ki kynroh kiba jrong bad kiba skhem ha kiba ai jingshngain ïa phi kin kyllon.

⁵³ “Ynda ki nongshun jong phi ki kerkut ïa ki shnong jong phi, phin sa kyrduh jingbam kat ban hap bam wat ïa la ki jong ki khun ba U Trai U Blei jong phi u la ai ïa phi.

^54-55 Wat u briew uba jem tam ka dohnud uba wan na ka ïing kaba donburom, un poi ha ka kutlad ha ka por ba u shah kerkut, kat ban da bam ïa la ki khun namar ba um don kawei pat ka jait jingbam. Un ym ai ei ei wat ïa la u para ne ka tnga kaba u ieit ne ïa la ki khun kiba dang don bad u.

^56-57 Wat ka kynthei kaba jem tam ka dohnud kaba wan na ka ïing kaba donburom, kaba riewspah katta katta katba kam donkam ban ïaid shano shano, kan leh kumjuh. Ynda u nongshun u kerkut ïa ka shnong jong ka, kan sa kyrduh jingbam kat ban da bam buhrieh wat ïa la i khun ba ka dang shu kha bad ïa iba la kha ruh. Kan ym ai ei ei ïa la u tnga uba ka ieit lane ïa la ki khun.

⁵⁸ “Lada phim kohnguh ïa ki jinghikai U Blei ïa kiba la thoh ha kane ka kitab, bad lada phim ñiewburom ïa ka kyrteng kaba phylla bad kaba khraw jong U Trai U Blei jong phi,

⁵⁹ un phah ha phi bad ha ki khun ki ksiew jong phi ïa ki jingpang bym lah pynkoit bad ïa ki jingïapthem kiba sngewtriem bad kiba neh slem.

⁶⁰ Un pynngat ha phi sa shisien ïa ki jingpang kiba sngewshyrkhei, kiba phi la mad ha Ijipt, bad phin ym ïohkhiah.

⁶¹ Un phah sa ïa ki jait jingpang bad jingïapthem baroh ïa kiba ym shym la thoh ha kane ka kitab jong ki aiñ bad ki jinghikai U Blei, bad phin sa jot thiaw.

⁶² Wat la phi bun kat ki khlur ha sahit bneng, tang khyndiat eh na phi phin lait im, namar ba phim shym kohnguh ïa U Trai U Blei jong phi.

⁶³ Kumba U Trai u pynmanbha bad pynroi ïa phi da kaba kmen, kumta ruh da kaba kmen un pynjot bad pynduh pyndam ïa phi. Yn sa rat dyngkhong ïa phi na kata ka ri ba phin ïohkynti.

⁶⁴ “U Trai un pynsakma ïa phi hapdeng ki jaitbynriew baroh, kylleng sawdong ka pyrthei, bad hangta phin shakri ïa kiwei pat ki blei kiba da ka dieng bad da u maw, ki blei kiba ma phi bad ki kpa tymmen jong phi phim pat ju mane mynshuwa.

⁶⁵ Phin ym shongsuk hapdeng kita ki jaitbynriew, bad phin ym ïoh jaka ban kam kum la ka jong; hangta U Trai un pynshong syier, un pynduh jingkyrmen, bad un pynswai mynsiem ïa phi.

⁶⁶ Ka jingim jong phi kan don borabor ha ka jingma. Synñia sngi phin khynñiuh da ka jingsheptieng, bad phin sngew kum ban ïap ha kano kano ka khyllipmat.

⁶⁷ Ka shadem jong phi kan kyndeh da ka jingsheptieng kat ïa kaba phi ïohi. Man ka step phin kwah ba kan wan noh ka janmiet; man ka janmiet pat phin kwah ba kan wan noh ka step.

⁶⁸ U Trai un phah biang ïa phi da ka lieng sha Ijipt, wat la nga la ong ba phim dei ban leit shuh shata lano lano; bad hangta phin sa tyrwa die mraw ïa lade ha ki nongshun jong phi, hynrei yn ym don ba thied ïa phi.”