DEUTERONOMI 27 - Khasi CL Bible (BSI)

Ki Aiñ U Blei ba la thoh ha ki maw

¹ Te u Moses lem bad ki nongïalam Israel, ki ong ha uta u paidbah, “Kohnguh ïa ki hukum baroh ïa kiba nga ai ha phi mynta ka sngi.

² Ha kata ka sngi ba phi jam ïa ka wah Jordan bad rung sha kata ka ri ba U Trai U Blei jong phi u ai ha phi, pynïeng katto katne tylli ki maw kiba heh, ñiad astor ïa ki,

³ bad thoh ha ki ïa kine ki aiñ bad ki hukum baroh. Ynda phi la rung sha kata ka ri kaba tuid da ka dud bad ka ngap ba U Trai U Blei jong ki kpa tymmen jong phi u la kular ha phi,

⁴ bad ynda phi la poi sha shiliang ka Jordan, pynïeng ïa kita ki maw ha u lum Ebal, kumba nga la hukum ïa phi mynta ka sngi, bad ñiad astor ïa ki.

⁵ Tei ïa ka duwan hangta da ki maw ïa kiba ym pat pyndei shniah.

⁶ Tei ïa ka duwan na ka bynta U Trai U Blei jong phi da ki maw tylli; bad kñia ïa ki jingainguh thang hangta;

⁷ hangta ruh kñia bad bam ïa ki jingainguh ïasyllok, bad lehkmen ha khmat U Trai U Blei jong phi.

⁸ Ha kita ki maw ba phi la ñiad astor, thoh shai ïa ki ktien baroh jong ki hukum U Blei.”

⁹ Nangta u Moses, ryngkat bad ki lyngdoh Lebi, ki ong ha ki Israel baroh, “Ko phi ki Israel, sngap jar bad shahshkor ïa nga. Mynta ka sngi phi la long ki briew jong U Trai U Blei jong phi;

¹⁰ kumta kohnguh ïa u bad sumar ïa ki hukum jong u ïa kiba nga la ai ha phi mynta ka sngi.”

Ki jingtim kiba mih na ka jingbymkohnguh

¹¹ Nangta u Moses u ong ha ki paid Israel,

¹² “Ynda phi la jam ïa ka wah Jordan, kine ki jait ki dei ban ïeng ha u lum Gerisim katba nang pynbna ïa ki jingkyrkhu: ka jait Simeon, ka jait Lebi, ka jait Judah, ka jait Issakhar, ka jait Joseph, bad ka jait Benjamin.

¹³ Bad kine ki jait kin ïeng ha u lum Ebal katba dang pynbna ïa ki jingtim: ka jait Reuben, ka jait Gad, ka jait Asher, ka jait Sebulun, ka jait Dan, bad ka jait Naphtali.

¹⁴ Ki Lebi kin kren ïa kine ki ktien ha ka sur kaba jam:

¹⁵ “ ‘Ka jingtim U Blei kan hap ha uta u briew uba thaw durblei da u maw, da u dieng, lane da u nar bad uba mane ïa ka ha kaba rieh; U Trai u isih ïa ka jingmane bleithaw.’ “Bad u paidbah baroh un jubab lang, ‘Amen!’

¹⁶ “ ‘Ka jingtim U Blei kan hap ha uta u briew uba pynjahburom ïa la u kpa lane ïa la ka kmie.’ “Bad u paidbah baroh un jubab lang, ‘Amen!’

¹⁷ “ ‘Ka jingtim U Blei kan hap ha uta u briew uba pynkynriah ïa u mawpud jong u paramarjan.’ “Bad u paidbah baroh un jubab lang, ‘Amen!’

¹⁸ “ ‘Ka jingtim U Blei kan hap ha uta u briew uba ïalam lynti bakla ïa u briew uba matlah.’ “Bad u paidbah baroh un jubab lang, ‘Amen!’

¹⁹ “ ‘Ka jingtim U Blei kan hap ha uta u briew uba pynduh ïa ki hok jong ki nongwei, ki khunswet, bad ki riewkynthei.’ “Bad u paidbah baroh un jubab lang, ‘Amen!’

²⁰ “ ‘Ka jingtim U Blei kan hap ha uta u briew uba pynkheiñ burom ïa la u kpa da kaba ïathiah shongkha bad kano kano ka tnga u kpa jong u.’ “Bad u paidbah baroh un jubab lang, ‘Amen!’

²¹ “ ‘Ka jingtim U Blei kan long ha uta u briew uba ïathiah shongkha bad ka mrad.’ “Bad u paidbah baroh un jubab lang, ‘Amen!’

²² “ ‘Ka jingtim U Blei kan long ha uta u briew uba ïathiah shongkha bad la ka para ne bad la ka para ar kmie.’ “Bad u paidbah baroh un jubab lang, ‘Amen!’

²³ “ ‘Ka jingtim U Blei kan hap ha uta u briew uba ïathiah shongkha bad la ka kiaw kurim.’ “Bad u paidbah baroh un jubab lang, ‘Amen!’

²⁴ “ ‘Ka jingtim U Blei kan hap ha uta u briew uba pynïap briew ha kaba rieh.’ “Bad u paidbah baroh un jubab lang, ‘Amen!’

²⁵ “ ‘Ka jingtim U Blei kan hap ha uta u briew uba pdiang pisa ban pynïap ïa u briew uba lui lui.’ “Bad u paidbah baroh un jubab lang, ‘Amen!’

²⁶ “ ‘Ka jingtim U Blei kan hap ha uta u briew u bymkohnguh ïa ki aiñ bad ki jinghikai baroh jong U Blei.’ “Bad u paidbah baroh un jubab lang, ‘Amen!’