DEUTERONOMI 26 - Khasi CL Bible (BSI)

Ki jingainguh ka jingot

¹ “Ynda phi la ïohkynti ïa kata ka ri ba U Trai U Blei jong phi u ai ha phi bad phi la shong la sah hangta,

² iwei pa iwei na phi phin buh ha ka shang ïa u soh nyngkong hadien ba phi la lum na uwei pa uwei u jait jingthung, bad leit rah ïa ka sha ka jaka mane Blei.

³ Leit sha u lyngdoh uba dei peit kam ha kata ka por, bad ong ha u, ‘Nga pynbna mynta ka sngi ha U Trai U Blei jong nga ba nga la wan rung ha kata ka ri ba u la kular ha ki kpa tymmen jong ngi ban ai ha ngi.’

⁴ “Uta u lyngdoh un shim ïa kata ka shang na phi bad buh ïa ka ha khmat ka duwan U Trai U Blei jong phi;

⁵ nangta, hangta ha khmat ka jingdon ryngkat U Trai phin ong ïa kine ki ktien: ‘U kpa tymmen jong nga u dei u nong Aram uba ïaidwir, uba la leit ïalam ïa la ki ba-ha-ïing ha-sem sha Ijipt ban shong ban sah. Ki ïadon tang khyndiat eh mynba ki ïadon hangta, hynrei ki la man long ka jaitbynriew kaba bun paid bad kaba khrawbor.

⁶ Ki nong Ijipt ki lehbeiñ ïa ngi bad pyntrei jubor ïa ngi kum ki mraw.

⁷ Te ngi kyang sha U Trai, U Blei jong ki kpa tymmen jong ngi, ban ïarap ïa ngi. U la shahshkor ïa ngi, bad u la ïohi ba ngi shah jynjar, ngi hap trei shitom, bad ngi shah lehbeiñ.

⁸ Da ka borbah bad ka jingkhlaiñ jong u, u la pyllait ïa ngi na Ijipt. U leh ki kambah bad ki kamphylla, bad u la pynjia ïa kiei kiei kiba sngewtriem.

⁹ U la wan ïalam ïa ngi shane bad u la ai ha ngi ïa kane ka ri kaba tuid da ka dud bad ka ngap.

¹⁰ Kumta nga wallam mynta sha U Trai ïa u soh nyngkong na ka jingot ba u la ai ha nga.’ “Nangta buh ïa ka shang ha ka jingdon ryngkat U Trai bad mane hangta.

¹¹ To long kiba sngewnguh namar kiei kiei kiba bha ba U Trai U Blei jong phi u la ai ha phi bad ha ka ïing ka sem jong phi; shah ruh ïa ki Lebi bad ki nongwei kiba shong hapdeng jong phi ban ïalehkmen lem bad phi.

¹² “Shisien man ka lai snem, ai kawei-na-kaba-shiphew — kaba shiphew na ki jingthung jong phi — ha ki Lebi, ki nongwei, ki khunswet, bad ki riewkynthei, khnang ba ha man la ka shnong kin ïoh bam kdang. Haba phi la leh ïa kane,

¹³ phin ong ha U Trai U Blei jong phi, ‘Ngam shym pynsah ei ei shuh ha ïing na kata kaba nga la lum kyrpang; nga la ai ïa ka ha ki Lebi, ki nongwei, ki khunswet, bad ki riewkynthei, kumba me la hukum ïa nga. Ngam shym la leh palat lane leh klet ïa ki hukum jong me kiba ïadei bad kawei na ki shiphew.

¹⁴ Mynba nga ïambriew, ngam shym la bam ei ei na ka; mynba nga long u bymkhuid, ngam shym la rah ei ei na ka shabar ïing; bad ngam shym la ai ei ei na ka kum ka jingainguh ïa kiba ïap. Nga la kohnguh ïa me, ko Trai; nga la leh ïa kaei kaei baroh kat kaba me la hukum ïa nga kiba ïadei bad kawei na ki shiphew.

¹⁵ To khmih nangto na ka jaka shong bakhuid jong me ha bneng bad kyrkhu ïa ki briew jong me, ki Israel, bad ïa kane ka ri kaba tuid da ka dud bad ka ngap ba me la ai ha ngi, kumba me la kular ha ki kpa tymmen jong ngi.’

U paidlang jong U Trai

¹⁶ “Mynta ka sngi, U Trai U Blei jong phi u hukum ïa phi ban kohnguh ïa ki aiñ jong u baroh; kumta kohnguh ïa ki da ka dohnud jong phi baroh.

¹⁷ Mynta ka sngi phi la pynbna ba U Trai u long U Blei jong phi; phi la kular ban kohnguh ïa u, ban sumar ïa ki aiñ bad ki hukum jong u, bad ban leh ruh kat ïa kaba u hukum.

¹⁸ Mynta ka sngi U Trai u la pdiang ïa phi kum la ki jong ki briew, kumba u la kular ïa phi; bad u hukum ïa phi ban kohnguh ïa ki aiñ jong u baroh.

¹⁹ Un kyntiew ïa phi ha khlieh eh ïa ki jaitbynriew baroh ba u la thaw, bad phi pat phin ïaroh bad ai burom ïa ka kyrteng jong u. Phi phin long ki briew jong u hi, kumba u la kular.”