DEUTERONOMI 25 - Khasi CL Bible (BSI)

¹ “Lada ar ngut ki Israel ki ïakajia, bad ki leit sha ka ïingbishar, ki nongbishar kin rai pynksan ïa uba hok bad pynrem ïa uba leh palat.

² Lada la rai ban sympat ïa uta uba la leh palat, u nongbishar un pyndem pyllup ïa u ha madan bad un phah sympat ïa u. Ka jingsympat kan long kat kum ka kam palat jong u.

³ Lah ban sympat ïa u haduh sawphew thri, hynrei ym palat ïa kata; lada palat ïa kata, kan pynpoh dor ïa u ha khmat ki briew.

⁴ “Wat khum ïa ka shyntur u masi dab haba phi pyndonkam ïa u ha kaba shoh kew.

Ka kamram ïa u hynmen uba la ïap

⁵ “Lada ar ngut shi para ki ïashong lang ha kajuh ka jaka bad uwei na ki u ïap khlem da ïoh khun shynrang, ka tnga jong uta uba ïap kam dei ban shongkurim ïa uno uno u bym dei na ka ïing ka sem jong u; u para jong uta uba la ïap u dei ban shongkurim ïa ka.

⁶ Yn ñiew ïa u khun shynrang ba ki ïoh nyngkong kum u khun jong uta uba la ïap khnang ba ka kyrteng jong u kan ïaineh ha Israel.

⁷ Hynrei lada u para jong uta uba la ïap um mon ban shongkurim ïa ka, ka dei ban leit ha khmat ki nongïalam shnong bad ban ong, ‘U para kynsi jong nga um treh ban pynneh ïa ka kyrteng u hynmen jong u hapdeng ki Israel; um mon ban pyndep ïa la ka kamram.’

⁸ Te ki nongïalam shnong kin khot ïa u bad ïakren bad u. Lada u dang kyntait ban shongkurim ïa ka,

⁹ kata ka hynmen kynsi jong u kan leit sha u ha khmat kita ki nongïalam shnong, kan loit kawei ka juti jong u, kan bynthiew ha ka khmat jong u, bad kan ong, ‘Kumne yn leh ïa uta u briew u bym treh ban ai symbai ïa la u hynmen.’

¹⁰ Ïa ka ïing jong u yn tip ha Israel kum ‘Ka ïing jong uta u briew uba la shah loit juti.’

Kiwei pat ki Aiñ

¹¹ “Lada ar ngut ki briew ki ïashoh, bad ka tnga jong uwei na ki ka pyrshang ban ïarap ïa la u tnga da kaba bat tyngeh na ka rain jong uta uwei pat,

¹² wat isynei ïa ka; ot noh ïa ka kti jong ka.

^13-14 “Wat shukor haba phi thew jingthew da u mawser ne da u diengthew.

¹⁵ Pyndonkam hok ïa ki mawthew bad ki diengthew kiba beit, khnang ba phin im slem ha kata ka ri ba U Trai U Blei jong phi u ai ha phi.

¹⁶ U Trai u isih ïa ki briew kiba shukor.

Ka Hukum ban pynïap ïa ki Amalek

¹⁷ “Kynmaw aïu ki Amalek ki la leh ïa phi katba phi dang wan na Ijipt.

¹⁸ Kim sheptieng ïa U Blei, bad kumta ki wan ïaleh pyrshah ïa phi haba phi la thait bad la duh bor, bad ki la pynïap lut ïa kito baroh kiba bud suki nadien.

¹⁹ Te, ynda U Trai U Blei jong phi u la ai ha phi ïa kata ka ri bad u la pyllait im ïa phi na ki nongshun jong phi baroh kiba shong sawdong jong phi, pynïap lut ïa ki Amalek baroh, khnang ban ym don shuh uba kynmaw ïa ki. Wat klet ïa kane!