DEUTERONOMI 24 - Khasi CL Bible (BSI)

Shaphang kaba pyllait tnga bad kaba shongkurim biang

¹ “Lada u briew u shongkurim ïa ka briew, bad hadien u shem ha ka ïa kaei kaei ha kaba um sngewbha; u rai ba um mon shuh ïa ka, kumta u thoh ïa ki kot ïapyllait tnga bad u ai ïa ki ha ka, bad u phah mihnoh ïa ka na ka ïing jong u,

² bad lada ka ïapoi shongkurim bad uwei pat u briew,

³ bad uta ruh u rai ba um mon shuh ïa ka, kumta u thoh ïa ki kot ïapyllait tnga, u ai ïa ki ha ka, bad u phah mihnoh ïa ka na ïing jong u, lane, haba u tnga jong ka uba ar u ïap,

⁴ uta u tnga nyngkong um dei shuh ban ïapoi shongkurim bad ka, namar ba ka la shah pyntngit. Lada u leh kumta, kan long kaba ijli ha khmat U Trai, bad phim dei ban leh kum kata ka pop kaba sngewshyrkhei ha kata ka ri ba U Trai U Blei jong phi u ai ha phi.

Kiwei pat ki Aiñ

⁵ “Haba u briew u dang shu dep shongkurim, ym dei ban phah ïa u sha ka thma, ne pynkit ha u ïa kano kano ka kam bakhia hapoh shisnem, khnang ba un ïoh shong ha ïing bad lehkmen bad la ka tnga.

⁶ “Haba phi ai kylliang ei ei ïano ïano, phim dei ban shim bynda da u mawtylliat kew jong u, namar kata ka long kumba phi shim bynda ïa ka tiar khreh bam kaba kyrshan ïa ka jingim jong u.

⁷ “Uno uno uba rong jubor ïa la u para Israel bad u pynlong mraw lane die mraw ïa u, u dei ban shah pynïap. Da kumta phin pynduh noh ïa kane ka jingbymman napdeng jong phi.

⁸ “Haba phi pang 'ñiangthohlieh, phi dei ban leh thik kumba ki lyngdoh Lebi ki ong ïa phi, bad bud ïa ki jinghikai ïa kiba nga la ai ha ki.

⁹ Kynmaw aïu U Trai U Blei jong phi u la leh ïa ka Miriam mynba phi wan na Ijipt.

¹⁰ “Haba phi ai kylliang ei ei ïa uno uno u briew, wat leit rung sha ïing jong u ban shim ïa ka jaiñkup ban buh bynda ha phi;

¹¹ ap habar bad ieh un da wallam hi ïa ka ha phi.

¹² Lada u dei u briew uba duk, wat bat ïa ka baroh shi miet;

¹³ pynphai pat ïa ka sha u man la ka janmiet ba un ïoh kup thiah da ka. Te un sngewnguh ïa phi, bad U Trai U Blei jong phi un sngewbha ïa phi.

¹⁴ “Wat shukor ïa u shakri uba bylla, uba duk bad uba kyrduh, la u dei u para Israel lane u nongwei uba shong ha ki shnong jong phi.

¹⁵ Man la ka sngi shuwa ban sep sngi, siew dep ïa ka bainong jong u ha kata ka sngi, namar u dei uba duk bad u ap dngong ban ïoh ïa ka. Lada phim ai ïa ka, un kyang ha U Trai pyrshah ïa phi, bad kata kan long ka pop ïa phi.

¹⁶ “Ki kmie ki kpa kim dei ban shah pynïap namar ki kam runar ki khun jong ki, bad ki khun ruh kim dei ban shah pynïap namar ki kam runar ki kmie ki kpa jong ki; u briew u dei ban shah pynïap tang namar ka kam runar jong u hi.

¹⁷ “Wat pynduh ïa ki hok jong ki nongwei lane ki khunswet, bad wat shim ïa ka jaiñkup jong ka riewkynthei kum ka bynda ïa kano kano ka ram.

¹⁸ Kynmaw ba phi la long ki mraw ha Ijipt bad ba U Trai U Blei jong phi u la pyllait ïa phi; dei namar kata ba nga la ai ha phi ïa kane ka hukum.

¹⁹ “Haba phi lum ïa u kew bad phi kum klet shi song ha lyngkha, wat leit tam shuh ïa u; ieh ïa u hangta na ka bynta ki nongwei, ki khunswet, bad ki riewkynthei, khnang ba U Trai U Blei jong phi un kyrkhu ïa phi ha ka kam jong phi baroh.

²⁰ Haba phi la dep kheit ïa ki soh Olib shisien, wat leit kheit shuh ïa kito kiba dang sah; kita ki dei ka bynta ki nongwei, ki khunswet, bad ki riewkynthei.

²¹ Haba phi la lum ïa ki sohwaiñ shisien, wat leit biang sha ki dieng sohwaiñ sa shisien; ki sohwaiñ kiba dang sah hangta ki dei ka bynta ki nongwei, ki khunswet, bad ki riewkynthei.

²² Wat klet ba phi la long ki mraw ha Ijipt; dei namar kata ba nga la ai ha phi ïa kane ka hukum.