DEUTERONOMI 23 - Khasi CL Bible (BSI)

Kiba shah kyntait na ki briew jong U Trai

¹ “U briew uba la shah shohdab kum u masi, lane uba la duh ïa la ka long shynrang ym dei ban kynthup hapdeng ki briew U Trai.

² “U khun pongka bad ki khun ki ksiew jong u haduh kaba shiphew pateng bynriew ym dei ban kynthup hapdeng ki briew U Trai.

³ “U Ammon lane u Moab — lane uno uno na ki khun ki ksiew jong ki haduh kaba shiphew pateng bynriew — ym dei ban kynthup hapdeng ki briew U Trai.

⁴ Ki la kyntait ban ai jingbam bad ai um ïa phi mynba phi don ha lynti na Ijipt, bad ki la khot wai ïa u Balaam u khun jong u Beor, uba na ka shnong Pethor ha Mesopotamia, ban tim ïa phi.

⁵ Hynrei U Trai U Blei jong phi un ym sngap ïa u Balaam; u pynkylla pynban ïa kata ka jingtim sha ka jingkyrkhu, namar ba u ieit ïa phi.

⁶ Katba phi dang long kawei ka jaitbynriew, wat leh ïa kano kano ka ban ïarap ïa kine ki jaitbynriew ne pynmyntoi ïa ki.

⁷ “Wat ibeiñ ïa ki Edom; ki long hi ki para jong phi. Bad wat ibeiñ ïa ki Ijipt; phi la shong shipor ha ka ri jong ki.

⁸ Ïa ki khun ki ksiew jong ki naduh kaba lai pateng bynriew ter ter lah ban kynthup hapdeng ki briew U Trai.

Kaba pynkhuid ïa ka jaka shong dara ki shipai

⁹ “Haba phi don ha ka jaka shong dara ha ka por thma, kiar na kano kano ka ban pynlong ïa phi ki bymkhuid.

¹⁰ Lada don u briew u bymkhuid da kaba liat ksuit mynmiet, u dei ban leit sah shabar kata ka jaka shong dara.

¹¹ Ynda janmiet u dei ban sait ban sum ïa lade, bad ha ka por sep sngi u lah ban wan pat sha ka jaka shong dara.

¹² “Phi dei ban buh ka jaka ha kaba phi lah ban leit shabar kham jngai ka jaka shong dara.

¹³ Rah uwei u dieng kum shi bynta jong ki tiar jong phi, khnang ba ha ka por ba phi leit shabar, phi lah ban tih thliew bad ban tep pat ïa ka.

¹⁴ Sumar khuid ïa ka jaka shong dara jong phi, namar U Trai U Blei jong phi u don ryngkat bad phi hangta ban ïada ïa phi bad ai ha phi ka jingjop ïa ki nongshun jong phi. Wat leh ïa kano kano kaba khlem akor kaba lah ban pynlong ïa U Trai ban phai noh na phi.

Kiwei pat ki Aiñ

¹⁵ “Lada ki mraw kiba phet na la u kynrad ki wan wad jingïada na phi, wat phah pat ïa ki sha u kynrad jong ki.

¹⁶ Ki lah ban shong bad phi ha kano kano ka shnong ba ki mon, bad phim dei ban lehbeiñ ïa ki.

¹⁷ “Ym dei ïa u Israel, shynrang lane kynthei, ban leit long nuti ha ka jaka mane blei.

¹⁸ Nalor kata, ym dei ban wanrah ïa ka kamai nuti, la ka dei ka jong u shynrang ne ka kynthei, sha ka ïing U Trai U Blei jong phi kum ka jingpyndep ïa kano kano ka jingsmai, namar U Trai u isih ïa ki nuti ha ka jaka mane blei.

¹⁹ “Wat shim sut na la u para Israel haba phi ai ram, lane phi ai jingbam, lane phi ai shah ïa kaei kaei ha u.

²⁰ Phi lah ban kheiñ sut haba phi ai ram ïa u nongwei, ym haba phi ai ram ïa la u para Israel, ba kumta U Trai U Blei jong phi un kyrkhu kat ïa kaba phi leh ha kata ka ri ba phin ïohkynti.

²¹ “Haba phi ai kano kano ka jingkular ha U Trai U Blei jong phi, wat pynslem ha kaba pyndep ïa ka, U Trai un bat ïa ka kular jong phi, bad ka long ka pop ban ym pyndep ïa ka.

²² Kam long ka pop ban ym kular ei ei ha U Trai,

²³ hynrei lada phi kular ei ei da la ka mon sngewbha, kynmaw ban pyndep ïa ka.

²⁴ “Haba phi ïaid lynti na ka bri sohwaiñ jongno jongno, phi lah ban bam sohwaiñ katba phi kwah, hynrei phim dei ban rah ïa ki ha la ka jingdiang.

²⁵ Haba phi ïaid lynti na ka lyngkha kew jongno jongno, phi lah ban sip ïa u sohkew uba phi kheit da la ki kti, hynrei phim dei ban ot ïa u da ka rashi.