DEUTERONOMI 22 - Khasi CL Bible (BSI)

¹ “Lada phi ïohi ïa ka masi lane ïa ka langbrot u para Israel ba ka sakma, wat shu ieh ïa ka; leit ïalam pat ïa ka sha u.

² Hynrei lada u shong jngai, lane lada phim tip uei u trai jong ka, ïalam ïa ka sha ïing jong phi. Ynda u trai u wan wad ïa ka, ai ïa ka ha u.

³ Leh kumjuh haba phi lap ïa ka kada, ka jaiñkup, lane kaei kaei kaba jah kaba dei ka jong u para Israel jong phi; wat shu ieh khlem da ïarap.

⁴ “Lada ka kada ne ka masi u para Israel ka kyllon, wat shu ieh ïa ka kumta; ïarap ïa u ban pynïeng pat ïa ka.

⁵ “Ka kynthei kam dei ban phong ïa ka sopti u shynrang, bad u shynrang um dei ban phong ïa ka sopti ka kynthei; U Trai U Blei jong phi u isih ïa kiba leh kumta.

⁶ “Lada jia ba phi lap ïa ka skum sim ha u dieng ne ha khyndew lem bad ïa ka sim kmie kaba pdem ïa ki pylleng lane kaba kdup ïa la ki khun, phim dei ban kem ïa ka sim kmie.

⁷ Phi lah ban rah ïa ki khun sim, hynrei phi dei ban pyllait ïa ka kmie jong ki, ba phin ïoh im slem bad manbha.

⁸ “Haba phi tei ïing thymmai, kynmaw ban da ker ïa ka tduh jong ka tnum ïing, ïoh phi hap kit pop lada uno uno u briew u hap nangta bad u ïap.

⁹ “Wat bet ïa uwei pat u symbai ha kajuh ka bri ba phi thung dieng sohwaiñ; lada phi leh kumta, phim lah ban pyndonkam ïa ki sohwaiñ lane ïa u soh jong uta uwei pat u jingthung.

¹⁰ “Wat pynlur lyngkha lang ïa u masi bad ka kada.

¹¹ “Wat phong ïa ka jaiñ ba la thain lang da u 'saiwul bad u 'sai linen.

¹² “Suh ïa ki rynjup ksai ha ki saw tylli ki dong jong ki jaiñkup jong phi.

Ki Aiñ shaphang ka jinglong sotti

¹³ “Lada jia ba u briew u shongkurim ïa ka briew bad hadien um mon shuh ïa ka,

¹⁴ bad u pynbudnam ïa ka bad u kynnoh sniew ïa ka da kaba ong nga la shim ïa kane ka briew hynrei haba nga leit sha ka ngam shem ïa ki dak ka jinglong sotti jong ka.

¹⁵ “Ki kmie ki kpa jong kata ka briew kin leit rah bad pyn-i ïa ki dak ka jinglong sotti jong kata ka briew ha ka ïingbishar jong ki nongïalam shnong.

¹⁶ U kpa jong kata ka briew un ong ha ki, ‘Nga la ai ïa la ka khun ha une u briew ban long ka tnga jong u, bad mynta um mon shuh ïa ka.

¹⁷ U la kynnoh pynban ïa ka da kaba ong ba kam long shuh kaba sotti haba u shongkurim ïa ka. Hynrei kine ki long ki dak jong ka jinglong sotti ka khun jong nga; khmih ïa ki jingbitsnam ha ka jingsiangthiah shongkurim!’

¹⁸ Te kita ki nongïalam shnong kin shim ïa uta u tnga bad kin sympat ïa u.

¹⁹ Kin daiñ kuna ïa u shispah tylli ki sbai rupa bad ai ïa kata ka kuna ha u kpa jong kata ka samla, namar uta u briew u la pynjahburom ïa ka theisotti Israel. Nalorkata, ma ka, kan ïailong ka tnga jong u, bad un ym lah ban pyllait ïa ka katba u dang im.

²⁰ “Hynrei lada kata ka jingkynnoh ka long kaba shisha bad ym don sabut ban pyn-i ba kata ka briew ka long kaba dang sotti,

²¹ te ki dei ban leit ïalam ïa kata ka briew ha khmat ka jingkhang ïing u kpa jong ka, bad ki rangbah jong kata ka shnong kin lynthem maw ïa ka hangta haduh ba kan da ïap. Ka la leh ïa kaei kaei kaba jahburom ha Israel da kaba pynjot ïa la ka jingsotti shuwa ka jingshongkurim. Da kumta phin pynduh noh ïa kane ka jingbymman napdeng jong phi.

²² “Lada lap ïa uno uno u briew ba u ïathiah shongkha bad ka tnga jong uwei pat u briew, baroh ar ngut ki dei ban shah pynïap, bad kumta phin pynduh noh ïa kane ka jingbymman na Israel.

²³ “Lada lap hapoh shnong ïa uno uno u briew ba u ïathiah shongkha bad ka briew kaba la ïatehktien bad uwei pat u briew,

²⁴ ïalam ïa ki baroh ar ngut shabar shnong bad lynthem maw ïa ki haduh ba kin da ïap. Kata ka briew ka dei ban ïap namar ba kam shym la kyang ban ïoh jingïarap, wat la ka don hapoh shnong, bad uta u shynrang pat u dei ban ïap namar u la ïathiah shongkha bad ka, bad kumta phin pynduh noh ïa kane ka jingbymman napdeng jong phi.

²⁵ “Lada u briew u ïakynduh ha lum ïa ka briew kaba la ïatehktien bad uwei pat u briew, bad u batbor ïa ka, dei ban pynïap tang ïa uta u shynrang.

²⁶ Ym dei ban leh ei ei ïa kata ka briew, namar kam shym la leh ïa ka pop ba ka dei ban ïap, naba kane ka kam ka ïasyriem kum ïa kato kaba u briew u shoh bad pynïap ïa uwei pat u briew.

²⁷ Uta u briew u la batbor ïa kata ka briew kaba la ïatehktien, bad wat la ka la lynñiar ruh, ym don mano mano ba wan ïarap ïa ka.

²⁸ “Lada lap ïa u briew ba u batbor ïa ka briew ka bym pat shym ïatehktien badno badno,

²⁹ uta u briew u dei ban siew ïa u kpa jong kata ka briew sanphew tylli ki sbai rupa, bad kata ka briew kan long ka tnga jong u, namar u la pynbor ïa ka ban ïathiah shongkha bad u. Katba u dang im um lah shuh ban pyllait ïa ka.

³⁰ “Uno uno u briew um dei ban pynkheiñ burom ïa la u kpa da kaba u ïathiah shongkha bad kawei na ki tnga u kpa jong u.