DEUTERONOMI 21 - Khasi CL Bible (BSI)

Shaphang ka jingpynïap briew bym lap sabut

¹ “Lada ha kata ka ri ba U Trai U Blei jong phi u ai ha phi, phi lap ha lum ha wah ïa u briew uba la shah pynïap, bad phim tip mano ba la pynïap ïa u.

² Ki nongïalam bad ki nongbishar jong phi ki dei ban leit thew ïa ka jingjngai hapdeng kata ka jaka ha kaba la lap ïa ka metïap bad ki shnong kiba marjan.

³ Nangta ki nongïalam jong ka shnong kaba jan tam na kata ka jaka ha kaba la shem ïa ka metïap kin jied kawei ka masi lud ka bym pat ju ring lyngkor.

⁴ Kin leit ïalam ïa ka sha ka jaka kaba harud kawei ka wahduid ka bym ju rngad um, ha kaba ym pat ju don ba lur ne thung jingthung, bad hangta kin pynkheiñ ïa u ryndang jong ka.

⁵ Ki lyngdoh Lebi ruh kin leit lang shata, namar dei ma ki, ki ban rai ïa kawei pa kawei ka jingïania bad ka jingïashoh. U Trai U Blei jong phi u la jied ïa ki ban shakri ïa u bad kyrkhu ha ka kyrteng jong u.

⁶ Nangta ki nongïalam baroh na kata ka shnong kaba jan eh bad ka jaka ha kaba la shem ïa ka metïap kin thet ïa la ki kti halor kata ka masi,

⁷ bad kin phla, ‘Ym dei ma ngi kiba pynïap ïa uto u briew, bad ngim shym ïohi ruh mano ba la leh ïa kata ka kam.

⁸ A Trai, map ïa ki briew jong me, ki Israel, ïa kiba me la pyllait na Ijipt. Map ïa ngi bad wat pynkit pop ha ngi namar ka jingpynïap ïa uta uba lui lui.’

⁹ Da kumta, phin weng noh ïa ka jingshah kynnoh pop napdeng jong phi, haba phi leh ïa kata kaba dei ha khmat U Trai.

Shaphang ki kynthei kiba shah kem ha ka thma

¹⁰ “Haba U Trai U Blei jong phi u pynjop thma ïa phi bad phi ïohkem koidi,

¹¹ bad phi ïohi hapdeng jong ki ïa ka kynthei kaba bhabriew kaba phi imon ban shongkurim,

¹² ïalam ïa ka sha ïing jong phi, bad hangta kan khi ïa la ka khlieh, kan ot ïa la ki tyrsim,

¹³ bad pli ïa la ki jaiñ. Ka dei ban sah ha ïing jong phi, bad ïam sngewsih shi bnai ïa la u kpa bad ïa la ka kmie. Hadien kata, phi lah ban shongkurim ïa ka.

¹⁴ Te, lada phim mon shuh ïa ka, phi lah ban pyllait ïa ka. Namar ba phi la pynbor ban ïathiah shongkha bad ka, phim lah ban ñiew ïa ka kum ka mraw bad die ïa ka.

Shaphang ka jingïohpateng u khun nyngkong

¹⁵ “Lada u briew u don ar ngut ki tnga bad baroh ar ki ïoh khun shynrang na u, hynrei u khun uba nyngkong um dei na ka tnga kaba u kham ieit,

¹⁶ ha ka sngi ba uta u briew u rai ban sam ïa ka spah ka phew jong u ha la ki khun, um dei ban leh shiliang ïa u khun jong kata ka tnga ba u kham ieit da kaba ai noh ha u ïa ka bynta u khun nyngkong jong u.

¹⁷ U dei ban ai ar bynta na ka spah ka phew jong u ha la u khun nyngkong, wat la um dei u khun na ka tnga ba u kham ieit. U dei ban ai ha la u khun nyngkong ïa ka hok kaba u dei ban ïoh.

Shaphang u khun tamsneng

¹⁸ “Lada u briew u don u khun uba mutlop bad uba tamsneng, u bymkohnguh ïa la ki kmie ki kpa, wat la ki sneng ki sympat ïa u,

¹⁹ ki kmie ki kpa jong u kin leit ïalam ïa u ha khmat ki nongïalam jong ka shnong ha kaba u shong ban pynïeng ha khmat ka jingbishar,

²⁰ bad kin ong ha ki, ‘Une u khun jong ngi te uba da mutlop bad uba tamsneng, um kohnguh ïa kaba ngi ong, uba im lutphut bad dih buaid.’

²¹ Te ki briew jong kata ka shnong kin lynthem maw ïa u haduh ba un da ïap, bad da kumta phin pynduh noh ïa kata ka jingbymman. Uwei pa uwei ha Israel un sa bna aïu ka la jia bad un sngewsheptieng.

Kiwei pat ki Hukum

²² “Lada u briew u leh ïa kano kano ka kam runar bad na ka bynta kata u shah phasi ha u dieng,

²³ ym dei ban ieh ïa ka metïap hangta baroh shi miet. Tep ïa ka ha kajuh ka sngi, namar ka metïap kaba sdien ha u dieng ka long ka jingtim U Blei, khnang ba phin ym pyntngit ïa kata ka ri ba U Trai U Blei jong phi u ai ha phi.