DEUTERONOMI 20 - Khasi CL Bible (BSI)

Shaphang ka thma

¹ “Haba phi leit ïaleh ïa ki nongshun jong phi bad phi ïohi ba ki kali ïaleh thma, ki kulai, bad ki shipai jong ki, ki kham bun ban ïa ki jong phi, wat sheptieng ïa ki. U Trai U Blei jong phi, uba la pyllait ïa phi na Ijipt, un don ryngkat bad phi.

² Shuwa ba phin sdang ïaleh, u lyngdoh un wan sha khmat bad kren ha kata ka kynhun shipai,

³ ‘To sngap, ko Israel! Mynta ka sngi phin leit ban ïaleh thma. Wat sheptieng ïa ki nongshun jong phi, wat noh mynsiem, lane wat sngew syier.

⁴ U Trai U Blei jong phi un leit ryngkat bad phi bad un ai ha phi ïa ka jingjop.’

⁵ “Nangta ki rangbah synshar kin kren ha uta u paidïapom, bad kin ong, ‘Don mo hangne uba dang shu dep shna ïing thymmai, hynrei u bym pat pynkyntang ïa ka? Lada don, ai un leit phai sha la ïing, ïoh ba u ïap ha madan thma, bad ba uwei pat u pynkyntang ïa ka ïing jong u.

⁶ Don mo hangne uba dang shu dep rep bri sohwaiñ, hynrei u bym pat ïohlad ban kheit ïa ki soh jong ka? Lada don, ai un leit phai sha la ïing, ïoh ba u ïap ha madan thma, bad ba uwei pat un ïoh bam ïa ki soh jong ka.

⁷ Don mo hangne uba dang shu dep ïatehktien? Lada don, ai un leit phai sha la ïing, ïoh ba u ïap ha madan thma, bad ba uwei pat un shongkurim ïa ka.’

⁸ “Kita ki rangbah synshar kin ong ruh ha uta u paidïapom, ‘Don mo hangne uba sheptieng bad uba rit mynsiem? Lada don, ai un leit phai sha la ïing, ïoh ba u pynsyier mynsiem ïa kiwei pat.’

⁹ Ynda kita ki rangbah synshar ki la dep kren ha uta u paidïapom, sa jied ïa ki nongïalam ïa kawei pa kawei ka kynhun shipai.

¹⁰ “Haba phi leit ïaleh ïa kano kano ka shnong, ailad ïa ki briew jong ka ban pan ïasuk.

¹¹ Lada ki plie ïa ki khyrdop shnong bad ki kloi ban ïasuk, baroh ki dei ban long ki mraw jong phi bad kin trei ruh kum ki mraw.

¹² Hynrei lada kim treh ïasuk, bad ki ïaleh pyrshah pynban ïa phi, kerkut ïa ka.

¹³ Te, ynda U Trai U Blei jong phi u ai ha phi ïa kata ka shnong, pynïap lut ïa uwei pa uwei u shynrang.

¹⁴ Hynrei phi lah ban shim sha lade ïa ki kynthei, ki khun rit, ki jingri jingdup, bad ïa kiei kiei baroh kiba ha kata ka shnong. Phi lah ban rah ïa kata baroh kaba dei ka jong ki nongshun jong phi. U Trai u la ai ïa ka ha phi.

¹⁵ Da kumta phin leh ïa kita ki shnong kiba sha jngai na kata ka ri ha kaba phin shong.

¹⁶ “Hynrei haba phi ïohknieh ïa ki shnong kiba hapoh kata ka ri ba U Trai U Blei jong phi u ai ha phi ban long ka jingïohpateng, pynïap ïa uwei pa uwei.

¹⁷ Pynduh khoit ïa kita ki jaitbynriew baroh: ïa ki Hit, ki Amor, ki Kanaan, ki Peris, ki Hib, bad ki Jebus, kumba U Trai u la hukum ïa phi.

¹⁸ Pynïap ïa ki, ba kin ym ïoh hikai shuh ïa phi ban leh ïa kiei kiei kiba isaitmet ba ki ju leh haba ki mane ïa ki blei jong ki, kumta ba phin ym leh pop pyrshah ïa U Trai U Blei jong phi.

¹⁹ “Haba phi ïaleh ban knieh ïa kano kano ka shnong, wat pom ïa ki diengsoh jong ka, wat lada phi kerkut slem ïa ka. Bam ïa u soh, hynrei wat pynjot ïa ki diengsoh, naba kim dei ki nongshun jong phi.

²⁰ Phi lah ban pynngat ïa kiwei pat ki jait dieng bad pyndonkam ïa ki ha kaba tei ïa ki kynton ïada pyrshah ïa kata ka shnong haduh ba kan da kyllon.