DEUTERONOMI 2 - Khasi CL Bible (BSI)

¹ ngi leit phai sha ka ri shyiap shaphang ka Duriaw Basaw, kumba U Trai u la hukum, bad ngi la pynlut por slem ha kaba ïaid sakma ha ri lum Edom.

² “Nangta U Trai u la ïathuh ha nga

³ ba ngi la kham pynlut por da kaba ïaid sakma ha kata ka ri lum bad ba ngi la dei ban leit shaphang shatei.

⁴ U la ong ïa nga ban ai ha phi ïa kine ki jinghikai: ‘Mynta phin ïaid lyngba ïa ka ri lum Edom, ka ri ki kur ki jait jong phi, ki khun ki ksiew u Iso.

⁵ Kin tieng ïa phi, hynrei phim dei ban ïaknieh jaka bad ki, namar ngan ym ai ha phi wat tang khyndiat ruh na kata ka ri jong ki. Nga la ai ïa ka Edom ha ki khun ki ksiew u Iso.

⁶ Ïa ka jingbam bad ka um phi lah ban thied na ki.’

⁷ “Kynmaw kumno U Trai U Blei jong phi u la kyrkhu ïa phi ha kiei kiei baroh kiba phi la leh. U la sumar sukher ïa phi haba phi ïaid sakma lyngba kane ka ri shyiap kaba ïar. U la don ryngkat bad phi ha kine ki sawphew snem, bad phi la ïoh ruh kat ïa kaba phi donkam.

⁸ “Kumta ngi la nang ïaid, bad ngi kiar ïa ka lynti kaba leit na ki shnong Elath bad Esiongeber sha ka Duriaw Baïap, bad ngi phai shaphang shatei-lam-mihngi sha ka ri Moab.

⁹ U Trai u ong ha nga, ‘Wat pynjynjar ïa ki briew jong ka ri Moab, ki khun ki ksiew jong u Lot, lane wat ïaleh thma bad ki. Nga la ai ha ki ïa ka shnong Ar, bad ngan ym ai ei ei ïa phi na ka ri jong ki.’ ”

¹⁰ (Ki jaitbynriew Emim kiba ju shong ha Ar ki dei ki ramhah kiba khrawbor. Ki long kiba jrong kat ki Anakim, kawei pat ka jait ki ramhah.

¹¹ Kum ïa ki Anakim, la ju khot ruh ïa ki, ki Rephaim; hynrei ki nong Moab ki khot ïa ki, ki Emim.

¹² Ki Hor ki la ju shong ha Edom, hynrei ki khun ki ksiew jong u Iso ki beh ïa ki, ki pynjot ïa ka ri jong ki, bad ki buhai shnong ïa lade hangta, kumjuh kumba ki Israel kham hadien ki beh ïa ki nongshun jong ki na kata ka ri ïa kaba U Trai u la ai ha ki.)

¹³ “Nangta ngi jam sha shiliang ka wah Sered kumba U Trai u la ong ïa ngi.

¹⁴ Kane ka long laiphew phra snem hadien ba ngi la mih na Kadesh Barnea. Ki rangïapom baroh jong kata ka pateng ki la ïap lut, kumba U Trai u la kren lypa.

¹⁵ U Trai u ïai ïaleh pyrshah ïa ki haduh ba un da ïoh pynjot lut ïa baroh.

¹⁶ “Hadien ba ki la ïap lut,

¹⁷ U Trai u ong ha ngi,

¹⁸ ‘Mynta ka sngi phi dei ban ïaid lyngba ïa ka ri Moab ha Ar.

¹⁹ Te phin sa poi hajan ka ri ki Ammon, ki khun ki ksiew jong u Lot. Wat pynjynjar ïa ki lane ïaleh thma bad ki, namar ngan ym ai ei ei ïa phi na kata ka ri ïa kaba nga la ai ha ki.’ ”

²⁰ (Ïa kane ka ri la ju tip kum ka ri ki Rephaim, ka kyrteng jong kita ki briew kiba ju shong hangta. Ki Ammon ki khot ïa ki, ki Samsummim.

²¹ Ki long kiba jrong kat ki Anakim, kiba bun paid, bad kiba khlaiñ. Hynrei U Trai u la pynjot ïa ki baroh, kumta ki Ammon ki ïohknieh ïa ka ri jong ki bad ki shong hangta.

²² U Trai u la leh kumjuh na ka bynta ki Edom, ki khun ki ksiew u Iso, kiba shong ha ri lum Edom. U pynjot ïa ki Hor, kumta ki Edom ki ïohknieh ïa ka ri jong ki bad ki shongsah hangta haduh mynta.

²³ Ka jaka harud ka Duriaw Mediterranian ka long kaba shong da ki Kaphtorim kiba wan na ka dewlynnong Krit. Kine ki la pynjot ïa ki Abbim kiba dei ki trai jaka, bad ki knieh lut ïa ka ri jong ki haduh ka shnong Gasa kaba shaphang shathie.)

²⁴ “Hadien ba ngi la ïaid lyngba ïa ka ri Moab, U Trai u ong ha ngi, ‘Khreh mynta ban jam ïa ka wah Arnon. Nga la aiti ïa u Sihon u syiem ka Heshbon jong ki Amor bad ïa ka hima jong u ha phi. Tur ïaleh ïa u bad kam kynti ïa ka ri jong u.

²⁵ U briew baroh un khynñiuh da ka jingsheptieng tang shu ïohsngew ïa ka kyrteng jong phi.’

Ki Israel ki jop ïa u syiem Sihon

²⁶ “Nangta nga phah ïa ki nonglamktien na ka ri shyiap Kedemoth sha u Sihon u syiem Heshbon ban tyrwa ïa ka jingïasuk, da kaba ong,

²⁷ ‘Shah ngin ïaid lynti na ka ri jong phi. Ngin shu ïaid beit beit na lynti bah bad ngin ym kynriah nangta.

²⁸ Ngin da siewdor ïa ka jingbam ba ngi bam bad ïa ka um ba ngi dih. Kaba ngi kwah ka long tang ban ïaid lyngba ïa ka ri jong phi,

²⁹ haduh ba ngin da jam ïa ka wah Jordan sha kata ka ri ïa kaba U Trai U Blei jong ngi u ai ha ngi, kumba ki khun ki ksiew u Iso, kiba shong ha Edom, bad ki Moab kiba shong ha Ar, ki la shah ïa ngi ban ïaid lyngba ïa ka ri jong ki.’

³⁰ “Hynrei u syiem Sihon um shah ïa ngi ban ïaid lynti na ka ri jong u. Naba U Trai U Blei jong phi u la pyneh ïa ka mynsiem jong u bad u la pynlong mutlop ïa u, khnang ba ngin ïoh jop bad shim ïa ri jong u ïa kaba ngi dang bat haduh mynta.

³¹ “Te U Trai u ong ha nga, ‘Khmih shane, nga la aiti ïa u syiem Sihon bad ïa ka ri jong u ha phi; knieh ïa ka ri jong u bad kam kynti ïa ka.’

³² U syiem Sihon u wan ryngkat bad la ki rangïapom ban ïaleh ïa ngi ha Jahas,

³³ hynrei U Trai U Blei jong ngi u la aiti ïa u ha ngi, bad ngi la pynïap ïa u, ïa ki khun shynrang jong u, bad ïa ki briew jong u baroh.

³⁴ Ha kajuh ka por ruh ngi la ïohknieh bad pynjot ïa kawei pa kawei ka shnong, bad ngi la pynïap lut ïa uwei pa uwei u briew, shynrang bad kynthei bad khynnah khlem pynsah ei ei shuh.

³⁵ Ngi rah noh ïa ki jingri jong ki bad ki jinglute na ki shnong jong ki.

³⁶ U Trai U Blei jong ngi u la shah ba ngin ïohknieh ïa ki shnong baroh naduh Aroer kaba harud ka Them Arnon, bad ïa ka nongbah hapdeng kata ka them, haduh Gilead. Ym don kawei ruh ka shnong ïa kaba ngim shym jop.

³⁷ Hynrei ngim shym leit sha jan ka ri ki Ammon lane sha ki jaka harud ka Wah Jabbok lane sha ki shnong ha ri lum lane sha kano kano ka jaka sha kaba U Trai U Blei jong ngi u la adong ïa ngi.