DEUTERONOMI 19 - Khasi CL Bible (BSI)

Ki shnong jakarieh

¹ “Ynda U Trai U Blei jong phi u la pynjot ïa kita ki jaitbynriew bad u ai ha phi ïa ka ri jong ki, bad hadien ba phi la ïohknieh ïa ki shnong bad ki ïing jong ki bad ba phi la shong la sah hangta,

^2-3 phiah ïa kata ka ri ha ki lai bynta. Kawei ka bynta kan don kawei ka shnong ha kaba yn don ruh ka lynti ka syngkien. Te u briew uba pynïap ïano ïano u lah ban phet rieh sha kawei na ki.

⁴ Lada u briew u kum pynïap ïa uno uno u bym dei u nongshun jong u, u lah ban phet sha kawei na kita ki shnong ban leit rieh.

⁵ Kum ka nuksa, haba ar ngut ki briew ki leit thoh dieng lang sha khlaw bad, katba uwei na ki u dang khet ïa uwei u dieng, u sdie u lait na u sping bad u leit dei ha uta uwei pat, bad kumta u ïap, u lah ban phet sha kawei na kita ki lai tylli ki shnong, bad un leit rieh bad ïohlait im hangta.

⁶ Lada don tang kawei ka shnong, ka lynti shata ka lah ban jngai than, bad uta uba wad kput u lah ban lap ïa u bad ha la ka jingbitar u lah ban pynïap ïa u briew u bym dei hok ban ïap, namar um shym don ka jingïashun bad la u paramarjan mynshuwa.

⁷ Namar kata nga hukum ïa phi ban buh kyrpang lai tylli ki shnong jakarieh.

⁸ “Bad lada U Trai U Blei jong phi u pynïar ïa ka ri jong phi, kumba u la ïathuh ha ki kpa tymmen jong phi, bad u ai ha phi ïa kata ka ri baroh ïa kaba u la kular,

⁹ te phi dei ban jied sa lai tylli ki shnong. (Un ai ha phi ïa kane ka ri lada phi leh ïa baroh kaba nga hukum ïa phi ha kane ka sngi bad lada phi ieit ïa U Trai U Blei jong phi bad im kat kum ki jinghikai jong U.)

¹⁰ To leh ïa kane, ba ki briew kiba shida kin ym shah pynïap ei, bad kumta phin ym kit pop ba dei ma phi kiba la pynïap ïa ki ha kata ka ri ba U Trai u ai ha phi.

¹¹ “Hynrei lada u briew u shun ïa la u paramarjan bad u apthap ïa u, bad u shoh bad pynmynsaw ïa u haduh ba un da ïap, bad nangta u phet sha kawei na kita ki shnong ban ïoh jingïada,

¹² ki rangbah shnong jong phi hi kin phah leit ring ïa u nangta, bad kin aiti ïa u ha u nongwad kput khnang ba un pynïap ïa u.

¹³ Wat leh-isynei ïa u. Rat noh na Israel kum ïa uta u nongpynïap briew, khnang ba phin manbha.

Ki pud kiba rim

¹⁴ “Ynda phi ïohkynti ïa kata ka ri ba U Trai U Blei jong phi u ai ha phi, wat pynkynriah ïa u mawpud jong u paramarjan jong phi ïa uba la thung naduh mynbarim.

Shaphang ki sakhi

¹⁵ “Kam biang tang uwei u sakhi ban rai pynrem ïa u briew na ka bynta kano kano ka kam palat; la kumno kumno, ar ngut ki sakhi ki dei ban pynsabut ba u briew u leh kam sniew.

¹⁶ Lada uno uno u briew u pyrshang ban pynsniew ïa uwei pat u briew da kaba mudui lamler ïa u,

¹⁷ baroh arliang ki dei ban leit sha kata ka jaka mane Blei ba yn bishar ïa ki da ki lyngdoh bad ki nongbishar kiba treikam ha kata ka por.

¹⁸ Kita ki nongbishar kin tohkit bniah ïa kata ka mokotduma; bad lada uta u briew u la mudui lamler,

¹⁹ u dei ban shah pynshitom kumba u thmu ban leh ïa la u para. Da kumta phin rat noh ïa kane ka jingbymman.

²⁰ Te kiwei pat kin ïohsngew aïu ka la jia; kin sngewsheptieng, bad kin ym nud shuh ban leh kum ïa kata ka kam bymman.

²¹ Ha kum kita ki mokotduma, wat ju leh-isynei; ka jingpynshitom kan long ka jingim namar ka jingim, ka khmat namar ka khmat, ka bniat namar ka bniat, ka kti namar ka kti, bad ka kjat namar ka kjat.