DEUTERONOMI 18 - Khasi CL Bible (BSI)

Ka bynta ki Lyngdoh

¹ “Ki lyngdoh kiba na ka jait Lebi baroh kim dei ban ïohpateng ei ei na ka khyndew kumba long ki para Israel; ha ka jaka kata, kin ïoh ka bam tang na ki jingainguh bad kiwei pat ki jingkñia ainguh sha U Trai.

² Kim dei ban don bynta na ka khyndew ka shyiap kum kiwei pat ki para jait jong ki; ka bynta jong ki ka long ka kabu ka jinglong ki lyngdoh jong U Trai, kumba u la kular.

³ “Na ki jingkñia ainguh kiba da u masi ne ka langbrot, ki lyngdoh ki dei ban ïoh ïa ka tyrpeng, baroh ar ki ngab, bad ka 'nierbah.

⁴ Ki dei ban ïohpdiang ïa ki soh nyngkong na u kew, ka waiñ, ka umphniang Olib, bad u 'saiwul jong phi.

⁵ Na ki jait jong phi baroh, U Trai u la jied ïa ka jait Lebi ban shakri ïa u kum ki lyngdoh pateng la pateng.

⁶ “Uno uno u Lebi uba don ka jingkwah, u lah ban wan na kano kano ka shnong ha Israel sha kata ka jaka mane Blei

⁷ bad u lah ban shakri hangta kum u lyngdoh jong U Trai U Blei jong u, kum kiwei pat ki Lebi kiba ïashakri hangta.

⁸ U dei ban ïoh bynta mar katjuh ka jingbam kumba long kiwei pat ki lyngdoh, bad u lah ban buh ïa kano kano kaba ki ba-ha-ïing ha-sem jong u ki phah sha u.

Ka jingmaham pyrshah ïa ki jingleh mane blei thala

⁹ “Ynda phi poi ha kata ka ri ba U Trai U Blei jong phi u ai ha phi, wat pyrthuh bud ïa ki jingleh kiba ijli jong ki jaitbynriew kiba shong hangta.

¹⁰ Wat kñia ïa la ki khun da kaba thang ïa ki ha ka duwan jong phi; wat shah ïa la ki briew ban khan, lane ban shat ban kheiñ, lane ban ai myntor,

¹¹ lane ban leh myntor, lane ban ïakren bad ki mynsiem jong kiba la ïap.

¹² U Trai U Blei jong phi u isih ïa ki briew kiba leh ïa kine ki kam kiba isaitmet, bad dei namar kata ba u la beh noh ïa kita ki jaitbynriew na kata ka ri katba phi nang tur sha khmat.

¹³ Ïaineh skhem ha U Trai.”

Ka jingkular ban phah ïa u nongïathuhlypa

¹⁴ Kumta U Moses u ong, “Ha kata ka ri kaba phin ïohkynti, ki briew ki shahshkor ïa kito kiba shat kiba kheiñ bad kiba wad ïa ki dak ki shin, hynrei U Trai U Blei jong phi u khang ïa phi ban leh kumta.

¹⁵ Un phah ha phi napdeng jong phi hi ïa u nongïathuhlypa uba kum ma nga, bad phi dei ban kohnguh ïa u.

¹⁶ “Ha kato ka sngi mynba phi ïalumlang ha u Lum Sinai, phi la kyrpad ba phim kwah ban ïohsngew shuh ïa ka sur U Trai, lymne ïohi shuh ïa ka ding ha kaba u don, namar ba phi sheptieng ïoh phi ïap.

¹⁷ Kumta U Trai u ong ha nga, ‘Ki la kyrpad ïa kaba dei eh.

¹⁸ Ngan phah ha ki ïa u nongïathuhlypa uba kum ma me napdeng ki para jait jong ki hi; ngan sa ïathuh ha u aïu un ong, bad un kren ha ki briew kat ïa kaba nga hukum.

¹⁹ Un kren ha ka kyrteng jong nga, bad ngan pynshitom ïa uno uno u bymkohnguh ïa u.

²⁰ Hynrei lada uno uno u nongïathuhlypa u nud ban kren ha ka kyrteng jong nga ïa ka khubor kaba ngam shym la hukum ïa u, u dei ban ïap namar kata; bad uno uno u nongïathuhlypa uba kren ha ka kyrteng jong kiwei pat ki blei u ruh u dei ban ïap.’

²¹ “Phi lah ban lyngngoh kumno phi lah ban ong haba ka khubor u nongïathuhlypa kam shym wan na U Trai.

²² Lada u nongïathuhlypa u kren ha ka kyrteng U Trai bad kata kaba u kren kam shym urlong, kata kam dei ka khubor U Trai. Uta u nongïathuhlypa u la kren na lade hi, bad phim dei ban sheptieng ïa u.