DEUTERONOMI 17 - Khasi CL Bible (BSI)

¹ “Wat kñia ainguh ha U Trai U Blei jong phi ïa u masi lane ka langbrot kiba don kano kano ka jingduna; U Trai u isih ïa kaba kum kata.

² “Lada phi shem ha kawei na ki shnong jong phi ïa u shynrang lane ka kynthei kiba la leh pop pyrshah ïa U Trai bad pynkheiñ ïa ka jutang jong u,

³ da kaba mane bad shakri ïa kiwei pat ki blei, lane ïa ka sngi, lane ïa u bnai, lane ïa ki khlur, kaba long pyrshah ïa ka hukum U Trai,

⁴ phi dei ban tohkit bniah ïa kata.

⁵ Lada ka long kaba shisha ba kum kata ka kam bymman ka la jia ha Israel, ïalam ïa kita ki briew shabar ka khyrdop shnong bad lynthem maw ïa ki haduh ba kin da ïap.

⁶ Hynrei lah ban pynïap ïa kita tang lada don ar ngut ne kham bun ki sakhi pyrshah ïa ki; ym dei ban pynïap ïa ki lada don tang uwei u sakhi.

⁷ Ki sakhi ki dei ban lynthem maw nyngkong, bad nangta kiwei pat ki briew kin pynbud ïa ki, da kumta phin pynkhuid noh ïa kane ka jingbymman napdeng jong phi.

⁸ “Lada don ki kam kiba kham eh ïa ki nongbishar shnong ban rai, kum ki mokotduma ïaknieh khyndew, lane kiba dei shaphang kaba ïashoh ïadat, lane kito kiba hap ban pynïapher hapdeng ka jingpynïap briew bad kawei pat ka jait jingpynïap briew, leit sha kata ka jaka mane Blei ïa kaba la jied da U Trai U Blei jong phi,

⁹ bad mudui ha u lyngdoh Lebi bad u nongbishar uba treikam ha kata ka por, bad ieh kin rai ma ki ïa kata ka mokotduma.

¹⁰ Kin ai ïa la ka jingrai jong ki, bad phi dei ban leh kumba ki ong ïa phi.

¹¹ Pdiang ïa ka rai jong ki bad leh thik kumba ki bthah ïa phi.

¹² Uno uno uba nud ban ïaleh pyrshah ïa u nongbishar lane ïa u lyngdoh uba shakri ha kata ka por ha khmat U Trai U Blei jong phi; u dei ban shah pynïap. Da kumta phin pynkhuid ïa kata ka jingbymman na Israel.

¹³ Te uwei pa uwei un sa ïohsngew ïa kata bad un sngewsheptieng, bad yn ym don shuh uba nud ban leh kumta.

Ki jingbthah kiba ïadei bad U Syiem

¹⁴ “Ynda phi la ïohkynti ïa kata ka ri ba U Trai U Blei jong phi u ai ha phi bad phi la shong la sah hangta, phin sa ïa-pyrkhat ban don noh u syiem kumba ïalong lem ki jaitbynriew baroh sawdong jong phi.

¹⁵ Da kynmaw ba u briew uba phi jied ban long u syiem u dei ban long uta ïa uba U Trai hi u la jied. U dei ban long na ka jait ka kynja jong phi hi; wat jied syiem ïa u nongwei.

¹⁶ U syiem um dei ban pynbun ki kulai na ka bynta ïa lade, bad um dei ban phah briew sha Ijipt ban thied kulai nangta, namar U Trai u la ong ba ki briew jong u kim dei ban leit phai shata lano lano.

¹⁷ U syiem um dei ban long uba bun tnga, namar kata kan pynphai noh ïa u na U Trai; bad um dei ruh ban pynriewspah ïa lade da ka rupa bad ka ksiar.

¹⁸ Ynda u long syiem, u dei ban don kopi ïa ka kitab jong ki aiñ U Blei bad ki jinghikai kaba la shna na ka kot aiñ kaba ki lyngdoh Lebi ki bat.

¹⁹ Un buh bad u ïa kata ka kitab bad un pule na ka synñia sngi, ba un tip ban tiengburom ïa U Trai bad kohnguh hok ïa ki aiñ bad ki hukum baroh ïa kiba la thoh hangta.

²⁰ Da kumta un ym sngew ba u kham halor ban ïa la ki para Israel bad un ym lyndet da kumno kumno ruh ïa ki hukum U Trai. Te un synshar bun snem, bad ki khun ki ksiew jong u ruh kin ïoh synshar bun pateng ha Israel.