DEUTERONOMI 16 - Khasi CL Bible (BSI)

Ka Niam Ka Jinglait

¹ “Burom ïa U Trai U Blei jong phi da kaba phi rakhe ïa ka Niam Ka Jinglait ha u bnai Abib, naba dei ha kawei ka miet jong uta u bnai ba u la pyllait ïa phi na Ijipt.

² Leit sha kata ka jaka mane Blei kaba U Trai un jied, bad kñia hangta kawei ka langbrot lane kawei ka masi jong phi na ka bynta ka Niam Ka Jinglait khnang ban pyndonburom ïa U Trai U Blei jong phi.

³ Haba phi bam ïa kane ka jingbam, wat bam ïa u kpu ba la khleh thiat. Hynñiew sngi phin bam ïa u kpu khlem thiat, kumba phi la bam mynba phi la dei ban mihnoh kyrkieh na Ijipt. Bam ïa une u kpu — yn khot ïa u, u kpu ka jingshah shitom — ba katba phi dang im phin ïai kynmaw ïa kata ka sngi mynba phi mihnoh na Ijipt, kata ka jaka ka jingshah shitom.

⁴ Hynñiew sngi lynter ym bit ïa uno uno ha kata ka ri ban don thiat ha ïing jong u; bad ïa ka doh ba phi kñia ha ka janmiet jong ka sngi kaba nyngkong dei ban bam lut ha kajuh hi ka miet.

^5-6 “Kñia ïa ki jingainguh na ka bynta ka Niam Ka Jinglait ha kata ka jaka mane Blei ba U Trai un jied — ym hawei pat ha kata ka ri ba U Trai U Blei jong phi un ai ha phi. Leh ïa kata ha ka por sep sngi, kaba ïadei bad ka por ba phi mih na Ijipt.

⁷ Shet ïa ka doh bad bam ïa ka ha kata ka jaka mane Blei; bad ha ka step kaba bud, leit phai noh sha la ïing.

⁸ Nangta sa hynriew sngi phin bam ïa u kpu khlem thiat, bad ha ka sngi kaba hynñiew ïalumlang ban mane ïa U Trai U Blei jong phi, bad wat trei ei ei ha kata ka sngi.

Ka Jingkhawai Niam Ka Jingot

⁹ “Ñiew hynñiew taïew naduh ba phi sdang ot ïa u kew,

¹⁰ bad nangta rakhe ïa ka Jingkhawai Niam Ka Jingot ban pyndonburom ïa U Trai U Blei jong phi, da kaba phi wanrah ïa ka jingainguh mon sngewbha jong phi kat kumba u la kyrkhu ïa phi.

¹¹ Lehkmen ha khmat U Trai ryngkat bad ki khun ki kti jong phi, ki shakri shakor jong phi, bad ki Lebi, ki nongwei, ki khunswet, bad ki riewkynthei kiba shong ha ki shnong jong phi. Leh ïa kane ha kata ka jaka mane Blei.

¹² Kynmaw ba phi dei ban kohnguh ïa kine ki hukum; wat klet ruh ba phi la long ki mraw ha Ijipt.

Ka Jingkhawai Niam Ki Ïingtrep

¹³ “Hadien ba phi la dep shoh kew bad dep khem ïa ki sohwaiñ, rakhe hynñiew sngi ïa ka Jingkhawai Niam Ki Ïingtrep.

¹⁴ To ïalehkmen ïa ka lem bad ki khun ki kti jong phi, ki shakri shakor jong phi, bad ki Lebi, ki nongwei, ki khunswet, bad ki riewkynthei kiba shong ha ki shnong jong phi.

¹⁵ Pyndonburom ïa U Trai U Blei jong phi da kaba phi rakhe hynñiew sngi ïa kane ka Jingkhawai Niam ha kata ka jaka mane Blei. To lehkmen, namar U Trai u la kyrkhu ïa ki jingmih baroh ba phi la ïoh ot bad ïa ka kam jong phi baroh.

¹⁶ “Lai sien shisnem, ki shynrang jong phi baroh ki dei ban wanpaw ha khmat U Trai U Blei jong phi ha kata ka jaka mane Blei: ha ka Niam Ka Jinglait, ha ka Jingkhawai Niam Ka Jingot, bad ha ka Jingkhawai Niam Ki Ïingtrep. Kim dei ban wan thylli ha khmat U Trai;

¹⁷ baroh ki dei ban ai katba ki kotbor, kat kum ba U Trai U Blei jong phi u la kyrkhu ïa phi.

Ka jingpynïaid ïa ka jingbishar hok

¹⁸ “Thung ïa ki nongbishar bad kiwei pat ki rangbah synshar ha man la ka shnong ba U Trai U Blei jong phi u ai ha phi. Kine kin bishar hok ïa ki briew.

¹⁹ Kim dei ban leh bymhok lane leh shiliang khmat ha ki jingbishar jong ki; kim dei ruh ban bamsap, namar ka jingbamsap ka pynmatlah wat ïa kito kiba stad bad kiba hok, bad ki pynlong ïa ki ban rai bakla.

²⁰ Leh beit bad lehhok borabor, khnang ba phin ïohkynti ïa kata ka ri ba U Trai U Blei jong phi u ai ha phi bad ba phin ïaishong hangta.

²¹ “Haba phi tei ïa ka duwan U Trai U Blei jong phi, wat pynïeng hajan jong ka ïa uno uno u dieng uba don ka dur jong ka bleithaw Asherah.

²² Wat pynïeng ruh ïa uno uno u païa maw na ka bynta ka jingmane bleithaw; U Trai u isih ïa kita.