DEUTERONOMI 15 - Khasi CL Bible (BSI)

Ka snem kaba hynñiew

¹ “Man kaba kut hynñiew snem, phi dei ban map ïa ka ram jong kito kiba kit ram na phi.

² Haba map, dei ban leh kumne. Uwei pa uwei uba ai ram ha la u para Israel u dei ban map ïa kata ka ram; um dei ban dawa shuh ïa ka, namar ba U Trai hi u la map ïa ka.

³ Phi lah ban dawa la ka ram kaba phi la ai ha u nongwei, hynrei phim dei ban leh kumta na la ki para jait.

⁴ “U Trai U Blei jong phi un kyrkhu ïa phi ha kata ka ri kaba u ai ha phi. Yn ym don uwei ruh uba duk na ki para jait jong phi,

⁵ lada phi kohnguh ïa u bad phi sumar biang biang ïa kata baroh kaba nga hukum ïa phi mynta ka sngi.

⁶ U Trai un kyrkhu ïa phi kumba u la kular. Phin sa ai kylliang ha kiba bun ki jaitbynriew, hynrei phin ym hap shim kylliang nano nano; phin long kynrad halor kiba bun ki jaitbynriew, hynrei yn ym don ka jaitbynriew ka ban long kynrad halor jong phi.

⁷ “Lada don u para Israel uba kyrduh ha kano kano ka shnong kaba ha kata ka ri ba U Trai U Blei jong phi u ai ha phi, wat khim mynsiem bad wat kyntait ban ïarap ïa u;

⁸ pynban, to long kiba kylluid mynsiem bad ai kylliang ïa u kat kaba u donkam.

⁹ Wat kyntait ban ai kylliang ei ei ïa u, tang namar ba ka snem map ram ka la jan poi. Wat shah ba kum kata ka jingmut bymman kan rung ha phi. Lada phi kyntait ban ai kylliang, un sa kyang ha U Trai pyrshah ïa phi, te kan long pop ha phi.

¹⁰ Ai ha u da ka mon sngewbha bad khlem da khñium, te U Trai un kyrkhu ïa phi ha ki kam jong phi baroh.

¹¹ Yn don hi man la ka por ki Israel kiba duk bad kiba kyrduh, bad kumta nga hukum ïa phi ban lehsbun ïa ki.

Ki mraw

¹² “Lada u para Israel, shynrang lane kynthei, ki die mraw ïa lade ha phi, phi dei ban pyllait ïa ki hadien ba ki la shakri ïa phi hynriew snem. Ha ka snem kaba hynñiew phi dei ban pyllait ïa ki.

¹³ Haba phi pyllait ïa ki, wat phah noh thylli ïa ki.

¹⁴ Ai kylluid mynsiem ïa ki na ki jingkyrkhu kiba U Trai u la ai ha phi — na ki langbrot, na u kew, bad na ka waiñ jong phi.

¹⁵ Kynmaw ba phi ruh phi la long ki mraw ha Ijipt bad U Trai U Blei jong phi u la pyllait ïa phi; dei namar kata ba nga ai ha phi mynta ka sngi ïa kane ka hukum.

¹⁶ “Hynrei lada u mraw jong phi um kwah ban mih, bad u ieit ïa phi bad ïa ki ba-ha-ïing jong phi, bad u sngewhun ban sah bad phi,

¹⁷ ïalam ïa u sha ka jingkhang ïing jong phi bad sam shkor ïa u hangta, te un sa long u mraw jong phi shi rta. Leh kumjuh ïa ka mraw jong phi.

¹⁸ Wat sngew bynnud haba phi pyllaitluid ïa la u mraw, naba u la pynmyntoi ïa phi ar shah ban ïa u nongbylla sngi haduh hynriew snem. Leh kumta, bad U Trai U Blei jong phi un kyrkhu ïa phi ha ki kam jong phi baroh.

Kiba la kha nyngkong na ki masi bad ki langbrot

¹⁹ “Buh kyrpang sha U Trai U Blei jong phi ïa ki shynrang baroh ba la kha nyngkong na ki masi bad ki langbrot jong phi; wat pyntreikam ïa kita ki masi, bad wat ot shñiuh ïa kita ki langbrot.

²⁰ Man ka snem, ma phi bad ki ba-ha-ïing jong phi, phi dei ban ïabam ïa ki ha khmat U Trai ha kata ka jaka mane Blei ba U Trai un jied.

²¹ Hynrei lada don ei ei kaba duna ha kita ki jingri, lada ki dkoh lane ki matlah, lane lada palat eh kano kano ka jingduna, phim dei ban kñia ïa ki ha U Trai U Blei jong phi.

²² Phi lah ban bam ïa ki ha ïing. Baroh na phi, la phi long kiba khuid ne ki bymkhuid, phi lah ban bam ïa ki, kumba bam ïa ka doh skei ne ka doh sier.

²³ Hynrei wat pyndonkam ïa ka snam jong ki kum ka jingbam; pynban, theh noh ïa ka ha khyndew kumba theh um.