DEUTERONOMI 14 - Khasi CL Bible (BSI)

Ka rukom leh ka bym dei haba ïambriew

¹ “Phi dei ki briew jong U Trai U Blei jong phi. Kumta haba phi ïam haba ïap mano mano, wat pynmong ïa lade lane khi ïa ki bynta ka khmat jong phi, kumba leh kiwei pat ki jaitbynriew.

² Phi long ki jong U Trai U Blei jong phi; u la jied ïa phi napdeng ki jaitbynriew baroh ha ka pyrthei ban long ki briew jong u.

Ki jait mrad kiba khuid bad ki bymkhuid

³ “Wat bam ïa kaei kaei ruh kaba U Trai u la pynbna ba ka long ka bymkhuid.

⁴ Phi lah ban bam ïa kine ki mrad: ki masi, ki langbrot, ki blang,

⁵ ki skei, ki langbrot khlaw, ki 'lang khlaw, lane ki sier —

⁶ bad uno uno u mrad uba pait khnap bad uba ktha ar sien.

⁷ Hynrei phim dei ban bam ïa kino kino ki jait mrad lymda ki dei kiba pait khnap bad kiba ktha ar sien. Phim lah ban bam ïa ki ut, ki rabbit, lane ki phyllad. Dei ban ñiew ïa ki ba ki long ki bymkhuid; ki ktha ar sien, hynrei kim dei kiba pait khnap.

⁸ Wat bam ïa ki sniang. Ñiew ba ki long ki bymkhuid; ki pait khnap, hynrei kim ktha ar sien. Ïa ka doh jong kine ki jait mrad phim bit ban bam, bad ïa ki metïap jong ki phim bit ban ktah.

⁹ “Phi lah ban bam ïa ki jait dohkha baroh kiba don shnet bad kiba don snep;

¹⁰ hynrei ïa kaei kaei kaba im ha um bad kaba khlem shnet bad khlem snep phim bit ban bam; dei ban ñiew bymkhuid ïa ka.

¹¹ “Phi lah ban bam ïa kano kano ka jait sim kaba khuid.

^12-18 Hynrei phim bit ban bam ïa kine ki jait sim: ki khlieng, ki dkhoh, ki kbeit, ka khlieng duriaw, ka khlieng ïong, ki pukni, ki tyngab; ki ostrit; ki tyngab duriaw, ki khap-snem, ki thring, ki pelikan, ki kormoran, ki proh-jyndem, ki lymbit.

¹⁹ “Baroh ki khñiang kiba don thapniang ki long ki bymkhuid; wat bam ïa ki.

²⁰ Phi lah ban bam ïa uno uno u kynja khñiang uba khuid.

²¹ “Wat bam ïa kano kano ka jait mrad kaba shu ïap hi. Phi lah ban shah ïa ki nongwei kiba shong hapdeng jong phi ban bam ïa ka, lane phi lah ban die ïa ka ha kiwei pat ki nongwei. Hynrei phi, phi long ki jong U Trai U Blei jong phi; phi dei ki briew jong u. “Wat shet ïa u khunlangbrot lane ïa u khunblang ha ka dud ka kmie jong u.

Ka Hukum kaba ïadei bad kawei-na-kaba-shiphew

²² “Buh kyrpang ïa kaba shiphew na ki jingmih ki lyngkha jong phi baroh man ka snem.

²³ Nangta leit sha kata ka jaka ha kaba U Trai U Blei jong phi u la jied ïa ka ban mane ïa u, bad hangta ha khmat jong u phin bam ïa kata kaba shiphew na u kew, na ka waiñ, bad na ka umphniang Olib jong phi, bad ïa kiba la kha nyngkong na ki masi bad ki langbrot jong phi.

²⁴ Lada kata ka jaka mane Blei ka jngai than na ka ïing jong phi ba phim lah ban kit shata ïa kata kaba shiphew na ki jingmih kiba U Trai u la kyrkhu ïa phi, te leh ïa kane:

²⁵ Die noh ïa ka bad wanrah ïa kaba mih na kata sha kata ka jaka mane Blei.

²⁶ Pynlut ïa ka kat ha kaba phi kwah — la ha ka doh masi, ka doh blang, ka waiñ, lane ka kyiad — bad hangta ha khmat U Trai U Blei jong phi, ma phi bad ki ba-ha-ïing ha-sem jong phi phin ïabam bad phin ïalehkmen ruh.

²⁷ “Wat leh klet ïa ki Lebi kiba shong ha ki shnong jong phi; kim don bri don khyndew la ka jong.

²⁸ Man kaba kut lai snem, wanrah ïa kaba shiphew na ki jingmih jong phi ha kata ka snem bad kynshew ïa ka ha ki shnong jong phi.

²⁹ Kane ka jingbam ka long na ka bynta ki Lebi, namar kim don bri don khyndew, bad na ka bynta ki nongwei, ki khunswet, bad ki riewkynthei kiba shong ha ki shnong jong phi. Kin ïawan bad kin ïoh kat ïa kaba ki donkam. Leh kumta, bad U Trai U Blei jong phi un kyrkhu ïa phi ha ki kam jong phi baroh.