DEUTERONOMI 13 - Khasi CL Bible (BSI)

¹ “U nongïathuhlypa ne u nongbatai ïa ki jingphohsniew u lah ban kular ïa ka kambah ne ka kamphylla,

² khnang ban ïalam ïa phi ban mane bad shakri ïa ki blei kiba phim pat ju mane mynshuwa. Wat la kata kaba u kular ka urlong shisha, wat shahshkor ïa u.

³ U Trai U Blei jong phi u pyndonkam ïa u ban tynjuh ïa phi, ban khmih la phi ieit ne em ïa U Trai da ka dohnud jong phi baroh.

⁴ Bud ïa U Trai bad tiengburom ïa u; kohnguh ïa u bad sumar ïa ki hukum jong u; mane ïa u bad ïaineh ha u.

⁵ Hynrei pynïap ïa uno uno u nongïathuhlypa lane uno uno u nongbatai ïa ki jingphohsniew uba ong ïa phi ban ïaleh pyrshah ïa U Trai, uba la pyllait ïa phi na ka ri Ijipt, ha kaba phi la long ki mraw. Kum uta u briew u long uba bymman bad u pyrshang ban khring noh ïa phi na kata ka rukom im ba U Trai u la hukum ïa phi. Ïa une dei ban pynïap, khnang ba phin lah ban pyllait ïa lade na kane ka jingbymman.

⁶ “Wat u hynmen u para jong phi, u khun jong phi, ka khun jong phi, ka tnga kaba phi ieit, lane u paralok uba jan eh jong phi, ki lah harieh harieh ban khring ïa phi ban leit mane ïa kiwei pat ki blei, ïa kiba phi bad ki kpa tymmen jong phi kim ju mane mynno mynno.

⁷ Uwei na ki, u lah ban pynshoi ïa phi ban mane ïa ki blei jong kita ki briew kiba shong marjan bad phi, lane kiba shong sha jngai na phi.

⁸ Hynrei wat shah ïa u ban pynkohnguh ïa phi; wat shahshkor ruh ïa u. Wat isynei ïa u lane wat sngewsynei ïa ki, bad wat ïada ïa ki.

⁹ Pynïap ïa u! Sdang nyngkong ma phi ban lynthem maw ïa u, bad nangta uwei pa uwei ruh un lynthem maw ïa u.

¹⁰ Lynthem maw ïa u haduh ba un da ïap! U la pyrshang ban khring noh ïa phi na U Trai U Blei jong phi, uba la pyllait ïa phi na ka ri Ijipt, ha kaba phi la long ki mraw.

¹¹ Te ki Israel baroh kin sa ïohsngew aïu ka la jia, bad kin sheptieng; bad yn ym don shuh mano mano u ban leh kum ïa kata ka kam bymman.

¹² “Ynda phi shong ha ki shnong ba U Trai U Blei jong phi u ai ha phi, lada phi ïohsngew

¹³ ba don ki riewbymman napdeng jong phi kiba la ïalam bakla ïa la ki para shnong para thaw ban mane ïa ki blei kiba phim ju mane mynno mynno.

¹⁴ Leit tohkit bniah shaphang kata; bad lada ka long kaba shisha ba la leh kum ïa kata ka kam bymman,

¹⁵ pynïap lut khoit ïa ki briew baroh ha kata ka shnong bad ïa ki jingri jong ki baroh ruh. Pynjot de thiaw ïa kata ka shnong.

¹⁶ Lumlang ïa ki jingdon jingem jong ki briew baroh kiba shong hangta bad kynton ïa ki ha ka madan shnong. Nangta thang ïa kata ka shnong bad ïa kata ka spah ka phew baroh kum ka jingainguh thang sha U Trai U Blei jong phi. Ka dei ban sah junom ha ka jingjot bad ym dei ban tei pat.

¹⁷ Wat shim sha lade ïa kaei kaei kaba la mang ban pynjot, te U Trai un phai na ka jingbitar shla jong u bad un isynei ïa phi. Un leh-isynei ïa phi bad un pynroi ïa phi, kumba u la kular ïa ki kpa tymmen jong phi,

¹⁸ lada phi kohnguh ïa ki hukum jong u baroh kiba nga la ai ha phi mynta ka sngi, bad phi leh ruh ïa kata kaba u kwah.