DEUTERONOMI 12 - Khasi CL Bible (BSI)

Kawei ka jaka mane Blei

¹ “Kine ki long ki hukum ba phi dei ban kohnguh katba phi dang shong ha kata ka ri ïa kaba U Trai, U Blei jong ki kpa tymmen jong phi, u ai ha phi.

² Ha kata ka ri ba phi ïohkynti, pynjot ïa ki jaka baroh ha kiba ki briew ki mane ïa ki blei jong ki ha ki lum kiba jrong, ha ki lumrit, bad hapoh ki dieng kiba jyrngam.

³ Pynpra ïa ki duwan jong ki bad pynpait pharia ïa ki maw blei jong ki. Thang ïa ki dur jong ka blei Asherah bad mait ïa ki bleithaw jong ki, khnang ba kin ym mane shuh ha kito ki jaka.

⁴ “Wat mane ïa U Trai U Blei jong phi kumba leh kita ki briew.

⁵ Na ka ri ki jait jong phi baroh, U Trai un jied tang kawei ka jaka sha kaba phi dei ban wan mane ïa u.

⁶ Shata phi dei ban leit rah ïa ki jingainguh thang bad ki jingkñia jong phi, ïa kawei-na-kaba-shiphew jong phi, bad ïa ki jingainguh jong phi, ïa ki jingai sngewbha ba phi kular ïa U Trai, ïa ki jingainguh mon sngewbha jong phi, bad ïa kiba la kha nyngkong na ki masi bad ki langbrot jong phi.

⁷ Hangta ha khmat U Trai U Blei jong phi, uba la kyrkhu ïa phi, ma phi bad ki ba-ha-ïing ha-sem jong phi phin ïabam bad ïalehkmen ha kiei kiei kiba bha kiba phi la trei shitom.

⁸ “Ynda poi kata ka por, phim dei shuh ban leh kumba phi la ju leh. Haduh mynta, phi ïamane Blei katba phi sngewdei,

⁹ namar phim pat rung ha kata ka ri ba U Trai U Blei jong phi u ai ha phi, ha kaba phin ïoh shongsuk shongsaiñ.

¹⁰ Ynda phi jam ïa ka wah Jordan, U Trai un shah ïa phi ban ïohkynti ïa kata ka ri bad un ïada ïa phi na ki nongshun jong phi baroh, ba phin ïoh shongsuk shongsaiñ.

¹¹ U Trai un jied tang kawei ka jaka ha kaba yn mane ïa u, bad hangta phi dei ban wanrah sha u ïa kata baroh kaba nga la hukum: ïa ki jingainguh thang bad ki jingkñia jong phi, ïa kawei na ka shiphew bad ki jingainguh jong phi, bad ïa kita ki jingai sngewbha ba phi la kular sha U Trai.

¹² Shadkmen ha khmat jong u hangta, lem bad ki khun ki kti jong phi, ki shakri shakor jong phi, bad ki Lebi kiba shong ha ki shnong jong phi; to kynmaw ba ki Lebi kim don bri don khyndew la ka jong.

¹³ Phim dei ban leit rah ïa la ki jingainguh kat shaba phi ibit;

¹⁴ hynrei leit rah ïa ki tang ha kawei ka jaka ha kaba U Trai un jied na ka ri jong kawei na ki jait jong phi, bad hangta phin leh ïa kita baroh kiba nga la hukum ïa phi.

¹⁵ “La katta ruh, phi lah ban pynïap bad bam ïa ki jingri jong phi kat shaba phi shong phi sah. Phi lah ban bam kat kumba U Trai u la kyrkhu ïa phi. Baroh na phi, kiba khuid ne ki bymkhuid, phi lah ban bam ïa ki, kumba bam ïa ka doh skei ne ka doh sier.

¹⁶ Hynrei phim bit ban bam ïa ka snam jong ki; phi dei ban theh ïa ka ha ka khyndew kumba theh ïa ka um.

¹⁷ Phim bit ban bam ha ki jaka ba phi shong ïa kata kaba phi wanrah sha U Trai, la ka dei kaba shiphew na u kew, na ka waiñ, ne na ka umphniang Olib jong phi; lane kiba la kha nyngkong na ki masi bad ki langbrot jong phi, ki jingai sngewbha ba phi la kular ha U Trai, ki jingainguh mon sngewbha jong phi, lane kiwei kiwei pat ki jingainguh.

¹⁸ Ma phi bad ki khun ki kti jong phi, lem bad ki shakri shakor jong phi, bad ki Lebi ruh kiba shong ha ki shnong jong phi, phi dei ban bam ïa kine ki jingainguh tang ha khmat U Trai U Blei jong phi, ha kawei ka jaka mane Blei kaba u la jied. Bad hangta phi dei ban sngewkmen na ka bynta kaei kaei baroh kaba phi la leh.

¹⁹ Kynmaw ruh ban ym leh klet ïa ki Lebi katba phi dang shong ha la ka ri.

²⁰ “Ynda U Trai U Blei jong phi u pynïar ïa ka ri jong phi, kumba u la kular, lada phi kwah bam doh phi lah ban bam katba phi mon.

²¹ Lada kata ka jaka mane Blei ka jngai eh, phi lah, ha kano kano ka por ba phi kwah, ban pynïap ïa kano kano ka masi lane ka blang ba U Trai u la ai ha phi, bad bam ïa ka doh jong ka ha la ïing, kumba nga la hukum ïa phi.

²² Uno uno, u lah ban bam ïa kata ka doh, uba khuid ne bymkhuid, kumba bam ïa ka doh skei ne ka doh sier.

²³ Tangba wat bam ïa ka doh kaba dang don snam hapoh jong ka, namar ka jingim ka don ha ka snam, bad phim dei ban bam ïa kata ka jingim lem bad ka doh.

²⁴ Wat pyndonkam ïa ka snam kum ka jingbam; pynban, theh noh ïa ka ha ka khyndew kumba theh ïa ka um.

²⁵ Lada phi kohnguh ïa kane ka hukum, U Trai un sngewbha, bad ma phi bad ki khun ki ksiew jong phi phin manbha.

²⁶ Leit rah ïa ki jingainguh jong phi bad ïa ki jingai sngewbha ba phi la kular sha U Trai tang sha kata ka jaka mane Blei.

²⁷ Kñia ïa ki jingainguh thang hangta ha ka duwan U Trai. Kñia ruh ïa kita ki jingainguh na kiba phi bam ïa ka doh jong ki, bad theh ïa ka snam jong ki ha ka duwan.

²⁸ Da shahshkor ïa kata baroh kaba nga la hukum ïa phi, ba ma phi bad ki khun ki ksiew jong phi phin manbha junom, namar ba phi leh ïa kata kaba dei bad kaba pynsngewbha ïa U Trai U Blei jong phi.

Ka jingmaham pyrshah ïa ka jingmane bleithaw

²⁹ “U Trai U Blei jong phi un pynjot ïa kita ki jaitbynriew katba phi nang leit ban knieh ïa ka ri jong ki, ba phin ïohkynti ïa ka bad shong hangta.

³⁰ Ynda U Trai u la pynjot ïa kita ki jaitbynriew, da lei lei wat bud ïa ki rukom lehniam jong ki, namar ka long kaba ma. Wat pyrshang ban tip kumno ki mane ïa ki blei jong ki, ïoh ba phi mane Blei kumba leh ma ki.

³¹ Wat mane ïa U Trai U Blei jong phi kumba ki mane ïa ki blei jong ki, namar ba ha kaba mane ïa ki, ki leh ruh ïa ki kam isaitmet baroh kiba U Trai u isih. Ki kñia wat ïa la ki khun ki kti ruh ha ka ding halor ki duwan jong ki.

³² “Leh ïa kata baroh kaba nga la hukum ïa phi; wat pyntam ha ka ne pynduna ei ei na ka.