DEUTERONOMI 10 - Khasi CL Bible (BSI)

U Moses u ïohpdiang biang ïa ki Hukum

¹ “Te U Trai u la ong ha nga, ‘Shtah ar tylli ki mawlyngkniap kum kito kiba nyngkong bad shna ruh kawei ka synduk dieng ban buh ïa ki.

² Wan kiew sha nga ha uta u lum, bad ngan thoh ha kita ki mawlyngkniap ïa kito ki ktien kiba nga la thoh ha ki mawlyngkniap ïa kiba me la lynthaw, bad nangta men buh ïa ki ha kata ka synduk.’

³ “Kumta nga la thaw kawei ka synduk kaba da u dieng Akasia bad nga la shtah ruh ar tylli ki mawlyngkniap kum kita kiba nyngkong, bad nga leit rah ïa ki shalor uta u lum.

⁴ Nangta U Trai u thoh ha kita ki mawlyngkniap ïa kijuh ki ktien ba u la thoh ha ka sien kaba nyngkong, ïa ki Shiphew Hukum keiñ ba u la ai ha phi mynba u la kren napdeng ka ding ha kata ka sngi ba phi ïalumlang ha uta u lum. U Trai u ai ha nga ïa kita ki mawlyngkniap, bad nga phai bad leit hiar na uta u lum.

⁵ Nangta, kumba U Trai u la hukum, nga buh ïa ki ha kata ka synduk ba nga la thaw — bad ki dang don hangta naduh kata ka por.”

⁶ (Ki Israel ki mihnoh na ki pukri ki nong Jaakan bad ki leit sha Moserah. Hangta u Aaron u la ïap, bad hangta ruh la tep ïa u, bad u Eleasar u khun jong u, u shim ïa ka jaka jong u kum u lyngdoh.

⁷ Nangta ki leit sha Gudgodah bad nangta pat sha Jotbathah, ka jaka kaba pahuh um.

⁸ Ha kata ka por U Trai u thung ïa ki rangbah kiba na ka jait Lebi ban sumar ïa ka Synduk ka Jutang, ban shakri ïa u kum ki lyngdoh, bad ban ai ïa ki jingkyrkhu ha ka kyrteng jong u. Kine ki dang dei ki kamram jong ki haduh mynta.

⁹ Namar kata, ka jait Lebi kam shym ïoh bynta ïa kano kano ka jaka kum kiwei pat ki jait; kumba U Trai U Blei jong phi u la kular.)

¹⁰ “Nga la sah ha uta u lum sawphew sngi bad sawphew miet, kumba nga la leh ha ka sien kaba nyngkong. U Trai u la shahshkor ïa nga sa shisien bad um mon ban pynjot ïa phi.

¹¹ Nangta u ong ïa nga ban leit bad ïalam ïa phi, khnang ba phi lah ban kam kynti ïa kata ka ri ba u la kular ban ai ha ki kpa tymmen jong phi.

Kaei kaba U Blei u dawa

¹² “Mynta, ko ki paid Israel, shahshkor ïa kaei kaba U Trai U Blei jong phi u dawa na phi: Mane ïa U Trai bad leh ïa kata baroh kaba u hukum. Ieit ïa u, shakri ïa u da ka dohnud jong phi baroh, bad kohnguh ïa ki hukum jong u baroh.

¹³ Nga ai ïa ki ha phi mynta ka sngi na ka bynta ka jingmyntoi ïa phi hi.

¹⁴ Wat ka bneng kaba jrong tam ka long ka jong U Trai; ka khyndew ruh ka long ka jong u, bad kiei kiei ruh kiba don ha ka.

¹⁵ Hynrei ka jingieit U Trai ïa ki kpa tymmen jong phi ka long kaba khraw katta katta ba u la jied ïa phi napdeng ki jaitbynriew baroh, bad phi dang long haduh mynta ka jaitbynriew ba la jied jong u.

¹⁶ Kumta, naduh mynta, kohnguh ïa U Trai, bad wat long shuh kiba mutlop.

¹⁷ Naba U Trai U Blei jong phi u long uba khrawbor tam halor ki blei baroh bad halor ki bor baroh. U long uba khraw bad uba donbor, bad uba dei ban sheptieng. U bym ñiewshiliang khmat bad u bym ju pdiang ïa ki jingai kiba da ka dohnud ka bymkhuid.

¹⁸ U lehhok ïa ki khunswet bad ïa ki riewkynthei; u ieit ïa ki nongwei kiba don bad ngi, bad u ai bam bad ai kup ai sem ïa ki.

¹⁹ Namar kata, ieit ïa kita ki nongwei, namar phi ruh phi la long ki nongwei ha ka ri Ijipt.

²⁰ Kohnguh ïa U Trai U Blei jong phi bad mane ruh tang ïa u. Ïaineh ha u bad kular skhem tang ha ka kyrteng jong u.

²¹ U long uba phi dei ban ïaroh — u long U Blei jong phi; bad phi la ïohi da la ki khmat ïa ki kam kiba khraw bad kiba phylla kiba u la leh na ka bynta jong phi.

²² Mynba ki kpa tymmen jong phi ki leit sha Ijipt, ki ïadon baroh tang hynñiewphew ngut; hynrei mynta U Blei u la pynroi ïa phi kat ki khlur ha ka sahit bneng.